आयातमा भन्सार छुट विदेशी पुस्तकलाई मात्रै : अर्थ मन्त्रालय
काठमाडौँ — मन्त्रिपरिषद् बैठकले विदेशी पुस्तकहरुलाई मात्रै आयात गर्दा भन्सार छुट दिने निर्णय गरेको अर्थ मन्त्रालयले प्रष्ट्याएको छ ।
मन्त्रिपरिषद निर्णयलगत्तै सबै पुस्तकमा भन्सार छुट भनिए पनि वास्तविकता त्यस्तो नभएको अर्थको स्पष्टोक्ति छ । अर्थ मन्त्रालयका राजस्व सचिव रामशरण पुडासैनीले नेपाली प्रकाशकले विदेशमा मुद्रण गरी पैठारी गर्ने पुस्तकमा १० प्रतिशत भन्सार महसुल लाग्ने साविकको व्यवस्थालाई यथावत राखिएको बताए । उनले सरकारको निर्णयले स्वदेशी मुद्रण उद्योगलाई संरक्षण गर्ने भन्दै असन्तुष्टिहरुलाई पनि सम्बोधन गरेको बताए ।
गत आर्थिक वर्षबाट पूर्व अर्थमन्त्री युवराज खतिवडाले सबै प्रकारका पुस्तक आयात गर्दा अधिकतम खुद्रा मूल्य (एमआरपी) मा १० प्रतिशतका दरले भन्सार महसुल लाग्ने व्यवस्था बजेटमार्फत् गरेका थिए ।
त्यसअघि नेपाली प्रकाशकले विदेशमा छपाइ गरी ल्याउँदा छपाइ मूल्यमा १५ प्रतिशत भन्सार महसुल लाग्ने व्यवस्था थियो । अन्य पुस्तक आयात गर्दा भन्सार लाग्दैन थियो ।
प्रकाशित : कार्तिक २७, २०७७ १८:०२