निजी क्षेत्रको आत्मविश्‍वास र मनोबल नबढाई अर्थतन्त्र गतिशील बनाउन सकिन्‍‍न : अर्थमन्त्री पौडेल- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

निजी क्षेत्रको आत्मविश्‍वास र मनोबल नबढाई अर्थतन्त्र गतिशील बनाउन सकिन्‍‍न : अर्थमन्त्री पौडेल

कान्तिपुर संवाददाता

काठमाडौँ — अर्थमन्त्री विष्णुप्रसाद पौडेलले निजी क्षेत्रको आत्मविश्वास र मनोबल नबढाई अर्थतन्त्रलाई गतिशील बनाउन नसकिने बताएका छन् । 

अर्थमन्त्री विष्णुप्रसाद पौडेल । फाइल तस्बिर ।

नेपाल चेम्बर अफ कमर्सका पदाधिकारीहरूसँग बुधबार भएको भेटमा अर्थमन्त्री पौडेलले निजी क्षेत्र बिना अर्थतन्त्रलाई गतिशील बनाउन नसकिने बताएका हुन् ।

कोरोना भाइरस (कोभिड- १९) ले सिर्जना गरेको चुनौतीलाई परास्त गर्दै अर्थतन्त्रलाई पुनरोत्थान गर्न, रोजगारीका अवसर बढाउन र उत्पादन बढाउने काम निजी क्षेत्र बिना सम्भव नभएको मन्त्री पौडेलले बताए । अहिलेको प्रतिकूल परिस्थितिका बीच पनि व्यवसाय सुचारु गर्न र राष्ट्रिय अर्थतन्त्रमा आ–आफ्नो ठाउँबाट योगदान दिन अनुकूल परिस्थितिको निर्माण गर्ने भूमिकामा सरकार रहेको उनको भनाइ थियो ।

यस्तै, सरकारले घोषणा गरेका कार्यक्रमहरू कार्यान्वयनमा नगएको सम्बन्धमा आफ्नो ध्यान केन्द्रित भएको पनि अर्थमन्त्री पौडेलले बताए । सरकारले घोषणा गरेको पुनर्कर्जा तथा स्टीमुलस प्याकेज कार्यान्वयनको चरणमा रहेको पनि उनले जानकारी दिए ।

नेपाल चेम्बर अफ कमर्सका अध्यक्ष राजेशकाजी श्रेष्ठले राजश्वका दर घटाउन माग गरेका थिए । सरकारले राजश्वका दर घटाउँदा कारोबार बढ्न जाने र कारोबार बढेपछि स्वतः राजस्वको आकारसमेत बढ्ने भएकाले छिटोभन्दा छिटो राजश्वका दर घटाउनुपर्ने उनको भनाइ थियो ।

करका दर उच्च हुँदा कुनै पनि वस्तुको मूल्य बढी हुने भएकाले कतिपय सामानहरूको अवैध आयात हुने गरेको व्यवसायीहरूले बताएका छन् । त्यसैले पनि भन्सार दर, राजश्व, मूल्य अभिवृद्धि कर लगायतका करका दरहरूमा सुधार आवश्यक रहेको तर्क व्यवसायीहरूको छ ।

भिडियोः

प्रकाशित : कार्तिक २६, २०७७ १७:२५
प्रतिक्रिया
पठाउनुहोस्

हुवास बजार एक साताका लागि सिल

अगन्धर तिवारी

पर्वत — दस जनामा संक्रमण पुष्टि भएपछि पर्वतको पैंयु गाउँपालिका एक साताका लागि सिल गरिएको छ । स्थानीय विपत व्यवस्थापन समितिको बैठकले मंगलबार राति १२ बजेदेखि लागू हुनेगरि एक साता पैंयुको हुवास बजार सिल गर्ने निर्णय गरेको हो ।

प्रमुख प्रशासकीय अधिकृत नेत्रप्रसाद पौडेलका अनुसार गाउँपालिकाको मुख्य भीडभाड हुने क्षेत्रमा मंसिर २ गते राति १२ बजेसम्म सिल गर्ने निर्णय भएको हो । उनका अनुसार कन्ट्याक्ट ट्रेसिङका आधारमा गरिएको परीक्षणमा दस जनामा संक्रमण पुष्टि भएको हो । पौडेलका अनुसार सर्वसाधारणको बढी भीडभाड हुने क्षेत्र डुंड, अर्थुन, हातेमालोचोक, त्रिवेणी, मर्दीखोला, हुवास र भोर्ले बजार सिल गर्ने निर्णय भएको छ ।

यी क्षेत्रमा अत्यावस्यक सामान किनमेल गर्नुपरेमा बिहान ८ देखि ९ र बेलुका ४ देखि ५ बजे मात्र घरबाहिर निस्किन सर्वसाधारणलाई आग्रह गरिएको छ । खेतीपाती गर्ने किसानलाई खेतबारीमा काम गर्न भने रोक लगाइएको छैन । पैंयुमा हालसम्म १६ जना संक्रमित भएकोमा ४ जना पालिकाकै अस्थाइ कोरोना अस्पतालको आइसोलेसनमा छन् । ८ जना होम आइसोलेसनमा रहेको र ४ जना निको भएर घर फर्किसकेका छन् ।

प्रकाशित : कार्तिक २६, २०७७ १७:०९
पूरा पढ्नुहोस्
प्रतिक्रिया
पठाउनुहोस्
×