रारामा बढ्न थाले पर्यटक- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

रारामा बढ्न थाले पर्यटक

राजबहादुर शाही

मुगु — कर्णालीको प्रमुख पर्यटकीय गन्तव्य रारा घुम्न आउने आन्तरिक पर्यटकको संख्या बढेको छ । कोरोना महामारीका कारण ६ महिनादेखि सुनसान रारामा मानवीय चहलपहल बढ्न थालेको हो । 

लकडाउन खुलेसँगै पर्यटक हवाई र सडक मार्गबाट रारा आउन थालेका छन् । एक महिनायता मुगुसहित जुम्ला, सुर्खेत, कालीकोट, दैलेखलगायत जिल्लाबाट रारा घुम्न जानेको संख्या बढ्दै गएको छ । कर्मचारी, व्यापारी र विद्यार्थी समूहमा घुम्न आउन थालेपछि रारामा मानवीय चहलपहल बढेको स्थानीय प्रकाश जैसीले जानकारी दिए । ‘रारा घुम्न आउने उपयुक्त मौसम यही हो,’ उनले भने, ‘शनिबार र बिदाको दिन बढी चहलपहल हुन्छ, पर्यटकसँगै स्थानीय व्यापार बढेको छ ।’ यो समयमा रारासँगै आसपासका क्षेत्रको दृश्यावलोकन मनमोहक हुने उनी बताउँछन् । जुम्लाबाट आउने आन्तरिक पर्यटक बिहान आएर साँझ फर्कन्छन् । ६ महिनासम्म सुनसान बनेको रारामा आन्तरिक पर्यटक बढ्दै गएको हुटुस्थित डाँफे गेस्ट हाउसका प्रबन्धक बलीराज शाहीको भनाइ छ । दैनिक १५ देखि ४० जनासम्म पर्यटक रारा आउन थालेका छन् ।

‘जिल्लाबाहिरका पर्यटक एक दिन रारा बसेर फर्किन्छन्,’ उनले भने, ‘वर्षा सकिएसँगै यहाँ आउनेको संख्या बढ्दै गएको हो ।’ पर्यटक बढ्न थालेपछि बिदामा बसेका होटल कर्मचारीलाई रारा बोलाएको उनले जानकारी दिए । उनका अनुसार पर्यटकले हुटुका होटल भरिभराउ हुन थालेका छन् । पर्यटक बढेसँगै लामो समयदेखि बन्द रहेका झ्यारी, डाब, ताल्चलगायत क्षेत्रका होटल पनि खुल्न थालेका छन् । रारा घुम्न आएका आन्तरिक पर्यटक डुंगा चढेर रमाउने गरेको व्यवसायी दानबहादुर बुढाले बताए । उनका अनुसार केही पर्यटक घोडामा चढेर आसपासका गाउँमा घुम्न थालेका छन् । पर्यटक बढ्न थालेपछि रारा क्षेत्रमा कोरोना संक्रमण बढ्न नदिन उच्च सतर्कता अपनाइएको रारा राष्ट्रिय निकुञ्जका अधिकृत विष्णुप्रसाद थपलियाले जानकारी दिए ।

प्रकाशित : आश्विन १३, २०७७ ०७:०३
प्रतिक्रिया
पठाउनुहोस्

कोरोनाबाट विश्‍वभर मृत्यु हुनेको संख्या १० लाख नाघ्यो

कान्तिपुर संवाददाता

काठमाडौँ — कोरोना भाइरस (कोभिड–१९) को संक्रमणबाट मृत्यु हुनेको संख्या १० लाख  नाघेको छ । जोन्स हप्किन्स विश्वविद्यालयका अनुसार मंगलबार बिहानसम्म भाइरसका कारण १० लाख ५ सय ५५ जनाको मृत्यु भइसकेको छ ।

विश्वविद्यालयका अनुसार कोभिड–१९ बाट संक्रमित हुनेको संख्या विश्वभर ३ करोड ३२ लाख ७३ हजार नाघेको छ ।

कुल संक्रमितमध्ये २ करोड ३० लाखभन्दा बढी निको भएका छन् । विश्वभर अझै पनि ६५ हजार मानिसको स्वास्थ्य अवस्था निकै जटिल रहेको जनाइएको छ । भाइरसका कारण अमेरिका सबैभन्दा बढी प्रभावित छ ।

अमेरिकामा भाइरसका कारण २ लाख ५ हजारभन्दा बढीको मृत्यु भइसकेको छ भने ७१ लाख ४७ हजारभन्दा बढीमा संक्रमण पुष्टि भएको छ ।

भारतमा ६० लाख ७४ हजार ७ सयभन्दा बढी संक्रमित भएका छन् भने ९५ हजार ५ सयभन्दा बढीको ज्यान गइसकेको छ ।

प्रकाशित : आश्विन १३, २०७७ ०७:०३
पूरा पढ्नुहोस्
प्रतिक्रिया
पठाउनुहोस्
×