आइसोलेसनमा बस्ने कर्मचारीको खर्च बैंकको

राष्ट्र बैंकले बिहीबार बैंक तथा वित्तीय संस्थालाई दिएको निर्देशनमा भनिएको छ, ‘कोभिड–१९ बाट संक्रमित कर्मचारीलाई तुरुन्त व्यवस्थित रूपमा घर, अस्पताल वा होटलमा आइसोलेसनमा सुरक्षित राख्न आवश्यक व्यवस्था गर्ने र सोको सम्पूर्ण खर्च बैंक तथा वित्तीय संस्थाले बेहोर्ने ।’ पछिल्लो समयमा बैंक तथा वित्तीय संस्थाका कर्मचारीमा संक्रमण देखिन थालेपछि राष्ट्र बैंकले उक्त निर्देशन दिएको हो ।

संक्रमितको सम्पर्कमा आएका वा कन्ट्याक्ट ट्रेसिङमा परेका कर्मचारीलाई आवश्यकताअनुसार घर वा होटलमा सुरक्षित रूपमा क्वारेन्टाइनमा राख्ने र त्यसको पनि सम्पूर्ण खर्च सम्बन्धित बैंक तथा वित्तीय संस्थाले बेहोर्न राष्ट्र बैंकले निर्देशन दिएको छ । ‘कर्मचारीको पीसीआर परीक्षण गराउने र त्यसको सम्पूर्ण खर्च बैंकले बेहोर्ने,’ निर्देशनमा भनिएको छ ।

आइसोलेसनमा रहने कर्मचारीलाई उक्त अवधिमा तलबसहित अतिरिक्त बिदाको व्यवस्था गर्न पनि राष्ट्र बैंकले भनेको छ । क्वारेन्टाइनमा रहने कर्मचारीलाई सो अवधिमा ‘वर्क फर्म होम’ को व्यवस्था गर्न र विद्युतीय कारोबारलाई प्रोत्साहन गर्न पनि भनिएको छ ।

अत्यावश्यक बैंकिङ सेवा जस्तै– क्लियरिङ, ट्रेजरीलगायत निरन्तर चलाउन ‘कन्टिन्युटी प्लान’ बनाउन पनि राष्ट्र बैंकले निर्देशन दिएको छ । कुनै एक कार्यालयका कर्मचारीमा कोरोना पुष्टि भए सो कार्यालय सिल हुन्छ, त्यस्तो अवस्थामा त्यहाँबाट सञ्चालित अत्यावश्यक सेवा नरोकियोस् भन्न ‘कन्टिन्युटी प्लान’ बनाउन निर्देशन दिइएको राष्ट्र बैंकले बताएको छ ।

कार्यालयमा सामाजिक दूरी कायम गर्न, मास्क, सेनिटाइजरलगायत सुरक्षाका उपाय अपनाउन पनि राष्ट्र बैंकले भनेको छ । आइतबार राष्ट्र बैंकले पनि सूचना जारी गरी कर्मचारीको आलोपालो र सम्भव भएसम्म घरबाटै काम गराउन बैंक तथा वित्तीय संस्थालाई निर्देशन दिइसकेको छ । कोभिडको जोखिम व्यवस्थापन गर्न आवश्यकताअनुसार समूह विभाजन गरी आलोपालो प्रणालीमा कर्मचारी उपस्थित हुने व्यवस्था मिलाउने राष्ट्र बैंकले आग्रह गरेको छ ।

आलोपालोमा ५० प्रतिशत कर्मचारीमार्फत वित्तीय सेवा सञ्चालन गर्न पनि राष्ट्र बैंकले निर्देशन दिएको छ । ‘संक्रमितको संख्या २ सयभन्दा बढी भएका जिल्ला र काठमाडौं उपत्यकामा बैंक तथा वित्तीय संस्थाले बढीमा ५० प्रतिशत कर्मचारी मात्र कार्यालयमा आलोपालो गरी उपस्थित भई काम गर्ने, बाँकी कर्मचारीलाई सुरक्षित भई घरबाटै काम गर्ने व्यवस्था मिलाउने,’ निर्देशनमा भनिएको छ ।

कोभिडको जोखिम उच्च बन्दै गएकाले कर्मचारी र सेवाग्राहीको स्वास्थ्यलाई उच्च प्राथमिकता दिन भन्दै राष्ट्र बैंकले उक्त निर्देशन दिएको हो । यसअघि सरकारले गरेको निर्णय कार्यान्वयन गर्न पनि राष्ट्र बैंकले बैंक तथा वित्तीय संस्थालाई आग्रह गरेको छ । ‘यसअघि जारी गरिएका सूचना तथा स्वास्थ्य सुरक्षासम्बन्धी मापदण्ड पनि पूर्ण रूपमा पालना गरी सेवा प्रदान गर्न सूचित गरिन्छ,’ निर्देशनमा भनिएको छ ।