‘बूढीगण्डकीमा मुआब्जालाई तीव्रता देऊ’- अर्थ / वाणिज्य - कान्तिपुर समाचार

‘बूढीगण्डकीमा मुआब्जालाई तीव्रता देऊ’

कान्तिपुर संवाददाता

काठमाडौँ — बूढीगण्डकी जलविद्युत् आयोजनाबाट प्रभावित हुनेहरूले मुआब्जाको कामलाई तीव्रता दिन माग गरेका छन् । आयोजनाको वातावरण मुआब्जा, पुनर्वास तथा पुनःस्थापना इकाइले काम नगर्दा बाँकी प्रभावितले मुआब्जा नपाएको भन्दै बूढीगण्डकी जलविद्युत् आयोजना राष्ट्रिय सरोकार समितिले १३ बुँदे माग सार्वजनिक गरेको छ ।

इकाइले ९५ प्रतिशत जग्गाको मुआब्जा वितरण सकिएको भने पनि सार्वजनिक जग्गाको मुआब्जा वितरण नभएको, प्रभावितको घरगोठ, बोटबिरुवाको दर रेटसमेत हालसम्म निर्धारण नभएको सरोकार समितिका संयोजक हरेकराम ढकालले जानकारी दिए । ‘९५ प्रतिशत जग्गाको मुआब्जा वितरण गरिएको भनिए पनि ४० प्रतिशत मुआब्जा वितरण हुनै बाँकी छ,’ उनले भने, ‘सार्वजनिक जग्गाको मुआब्जा वितरण भएको छैन भने अन्य सम्पत्तिको मुआब्जा दिन दररेट तय भएको छैन ।’

समितिले मुआब्जा पाउन बाँकी जग्गाधनी र मुआब्जा दिँदा कित्ता छुटेका प्रभावितलाई तत्काल मुआब्जा दिन माग गरेको छ । जिल्ला मुआब्जा समितिले निर्धारण गरेको दररेटअनुसार नै मुआब्जा दिन पनि समितिको आग्रह छ । ५ रोपनीभन्दा कम जग्गा हुनेलाई १५ र १० रोपनीभन्दा कम जग्गा हुनेलाई १० प्रतिशत मुआब्जा थप्न पनि समितिको माग छ । दर्ता छुट भएका र भोगचलन भइरहेको जग्गाको पनि मुआब्जा दिन समितिले माग गरेको छ ।

आयोजना इकाइ कार्यालयले कर्मचारी भर्ना गर्दा डुबान क्षेत्रका बासिन्दामध्ये नियुक्त गर्न पनि समितिले माग गरेको संयोजक ढकालले जानकारी दिए । मुआब्जामा लिइएको पुँजीगत लाभ र फिर्ता गर्न र बूढीगण्डकी रिङरोडको काम अघि बढाउन पनि समितिले माग गरेको छ ।

मुआब्जा वितरण गर्दा सुरुमा राष्ट्रिय वाणिज्य बैंकबाट गर्ने गरिएको भए पनि निजी क्षेत्रका बैंकमार्फत वितरण गर्दा बैंकले पैसा हप्तौंसम्म प्रभावितको खातामा नपठाउने गरेको ढकालको आरोप छ ।

प्रकाशित : श्रावण २८, २०७७ ०६:५८
प्रतिक्रिया
पठाउनुहोस्

अस्पतालमा शय्या अभाव

गाह्रो भयो भने अस्पताल जान सक्नुहुन्छ, बेड व्यवस्था हुन्छ : प्रवक्ता गौतम
अतुल मिश्र

काठमाडौँ — कोभिड–१९ को बढ्दो संक्रमणसँगै देशभरका स्वास्थ्य संस्थामा शय्या अभाव हुन थालेको सरकारले जनाएको छ । संक्रमितले अस्पताल भरिन थालेपछि शय्या अभाव देखिएको स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले बताए ।

संक्रमण भइसके पनि लक्षण देखा नपरेमा (एसिम्प्टोम्याटिक) घरमै बसेर अन्य व्यक्तिलाई रोग सर्न नदिने सावधानीका उपाय अपनाएमा समेत यो रोग नियन्त्रण र रोकथाम गर्न सकिने उनको भनाइ छ । ‘कोरोना संक्रमणको विस्तार हुन नदिन सावधानीका उपाय अवलम्बन गर्नु बाहेकको विकल्प छैन,’ उनले भने ।

हाल पीसीआर परीक्षण संख्याका आधारमा संक्रमण दर ५.२ प्रतिशत छ ।

होम आइसोलेसनमा २ सय २४ संक्रमित छन् । आईसीयूमा उपचार गराउनेहरूको संख्यासमेत बढ्दो छ । स्वास्थ्य मन्त्रालयका सहप्रवक्ता डा.समीरकुमार अधिकारीका अनुसार मंगलबार देशभर ८५ जना संक्रमित आईसीयूमा र ३ जना भेन्टिलेटरमा छन् । सबैभन्दा बढी प्रदेश २ मा ४३ जना आईसीयूमा छन् । वाग्मतीमा ३५ जना आईसीयू र ३ जना भेन्टिलेटरमा छन् । प्रदेश–५ मा ६ जना र प्रदेश १ मा १ जना आईसीयूमा उपचाररत छन् ।

देशभर १ हजार १ सय ३४ वटा आईसीयू र ५ सय ७६ वटा भेन्टिलेटर शय्या रहेको उनले जनाए ।

यसअन्तर्गत आईसीयू शय्या प्रदेश १ मा ४४, प्रदेश २ मा ४५, वाग्मतीमा ६ सय ३०, गण्डकीमा १ सय ३७, प्रदेश ५ मा २ सय २०, कर्णालीमा ४० र सुदूरपश्चिममा १८ वटा छन् । भेन्टिलेटर भने प्रदेश १ मा ६ वटा, प्रदेश २ मा १७, वाग्मतीमा ३ सय ६१, गण्डकीमा ५९, प्रदेश ५ मा १ सय ६, कर्णालीमा १७ र सुदूरपश्चिममा १० वटा छन् । हालसम्म २३ हजार ९ सय ४८ जनामा संक्रमण देखिएकामा १६ हजार ६ सय ६४ जना निको भइसकेका छन् । निको हुनेको संख्या कुल संक्रमितको ६९.६ प्रतिशत हुन आउँछ । ७ हजार २१ जना उपचाररत छन् ।

काठमाडौंसहित पर्सा, रौतहट, महोत्तरी गरी चार जिल्लामा पाँच सय जनाभन्दा बढी संक्रमितको उपचार भइरहेको छ । मंगलबारसम्म काठमाडौंमा ९ सय ३३ जना संक्रमित उपचाररत छन् । हालसम्म काठमाडौंमा १ हजार ५७ जनामा संक्रमण पुष्टि भएकामा १ सय १७ जना डिस्चार्ज भइसकेका छन् । ७ जनाको मृत्यु भएको छ । यस्तै प्रदेश २ को पर्सा, रौतहट र महोत्तरीमा सक्रिय संक्रमितको संख्या क्रमशः ९ सय ६४, ७ सय ९६ र ५ सय ९१ तथा निको हुनेको संख्या क्रमशः २ सय २६, ७ सय ९५ र २ सय ६४ छ । पर्सामा १९ र रौतहटमा २ जनाको मृत्यु भएको छ ।

'गाह्रो भयो भने अस्पताल जान सक्नुहुन्छ, बेड व्यवस्था हुन्छ'

डा.जागेश्वर गौतम - प्रवक्ता, स्वास्थ्य तथा जनसंख्या मन्त्रालय

अस्पतालको आइसोलेसनको बेड लक्षण भएका र नभएका संक्रमितले भरिएका छन् । कोरोना संक्रमित बढ्ला भनेर सबै अस्पताललाई आइसोलेसन बनाएका थिएनौं । आइसोलेसन बनाइएका सीमित अस्पताल सबै भरिए । त्यसैले अहिले लक्षण भएकालाई पनि घरमै राख्नुपरेको छ । खासमा लक्षण भएकालाई मात्रै अस्पतालमा राख्नुपर्थ्यो । अब लक्षण नभएकालाई कीर्तिपुरको आयुर्वेद अस्पताल परिसरमा २ सय जनालाई राख्ने व्यवस्था गरेका छौं ।

यहाँ पनि घरमा आइसोलेसन बस्न नमिल्नेलाई मात्रै राख्छौं । घरमा आइसोलेसनमा बसेकालाई गाह्रो पर्दा जुनसुकै बेला आफैंले सवारीको व्यवस्थापन गरेर पाटन, एपीएफ, टिचिङमा जान सकिन्छ । त्यहाँ गएर आफू संक्रमित भएको र गाह्रो भएको चाहिँ जानकारी गराउनुपर्छ । बेडको व्यवस्थापन जसरी पनि हुन्छ ।

प्रकाशित : श्रावण २८, २०७७ ०६:३३
पूरा पढ्नुहोस्
प्रतिक्रिया
पठाउनुहोस्
×