सुन तोलाको एक लाखनजिक, बजारमा ‘डेडलक’ हुने चिन्ता !

राजु चाैधरी

काठमाडौँ — पहेंलो धातुका रूपमा चिनिने सुनको मूल्य १ लाख रुपैयाँनजिक पुगेको छ । कोभिड–१९ का कारण विश्व अर्थतन्त्रमै असर पुगेपछि सुनको मूल्य दैनिक उकालो लागेको छ । कोभिडकै कारण सुन उत्पादन गर्ने खानीमा श्रमिक अभाव हुँदा मूल्य बढ्नमा मद्दत पुगेको व्यवसायी बताउँछन् ।

‘लगानी सुरक्षित गर्न सबै लगानीकर्ता सुनतर्फ आकर्षित भएका छन् । कोभिडका कारण कामदार खानी गएनन्, जाने अवस्था पनि भएन,’ सुनचाँदी व्यवसायी महासंघका पूर्वअध्यक्ष तेजरत्न शाक्यले भने, ‘माग बढ्दो क्रममा छ । कोभिडकै कारण २०१८ मा अन्तर्राष्ट्रिय बजारमा वार्षिक उत्पादन र कारोबार ४ हजार ५ सय टन रहेकोमा अहिले घटेर ३ हजार ५ सय टन मात्रै भएको छ ।’ महासंघले शुक्रबार प्रतितोला सुनको भाउ ९९ हजार ३ सय रुपैयाँ निर्धारण गरेको छ ।

सुनचाँदी व्यवसायीहरूकै अर्को संस्था नेपाल सुनचाँदी रत्न तथा आभूषण महासंघले प्रतितोला ९९ हजार ५ सय रुपैयाँ तोकेको छ । अन्तर्राष्ट्रिय बजारमा मूल्य थप बढ्ने क्रममा रहेकाले भाउ आइतबार/सोमबारमै १ लाख रुपैयाँ नाघ्ने सुनचाँदी रत्न तथा आभूषण महासंघका अध्यक्ष रमेश महर्जनले जानकारी दिए । ‘एक साताको अवधिमा अन्तर्राष्ट्रिय बजारमा प्रतिऔंस ७० अमेरिकी डलरले सुनको मूल्य बढेको छ,’ उनले भने, ‘यही क्रममा बढे एक साताभित्र प्रतितोला १ लाख रुपैयाँ नाघ्छ ।’

मूल्य दिनहुँ बढ्नुको एउटा कारण अमेरिका र चीन विवाद हो । लामो समयदेखि चलिरहेको व्यापारिक युद्ध अहिले थप बल्झिएको छ । यसका अतिरिक्त अन्तर्राष्ट्रिय बजारमा बैंकहरूले ब्याजदर घटाएका छन । केहीले शून्यमा समेत झारिसकेको महर्जनले बताए । ‘घरजग्गा र सेयर लगानीकर्ताले बैंकबाट लगानी झिकेर सुनतर्फ लगानी गरेको देखिन्छ,’ उनले भने, ‘कोभिडको भ्याक्सिन अझै बजारमा आइनसकेकाले पनि सुनको मूल्य बढेको हो ।’ व्यवसायीका अनुसार साउन १ गते अन्तर्राष्ट्रिय बजारमा प्रतिऔंस १८ सय १० अमेरिकी डलरमा कारोबार भएको थियो । साउन १६ सम्म आइपुग्दा भाउ बढेर १९ सय ७१ डलर पुगेको छ । अन्तर्राष्ट्रिय बजारमा मूल्यवृद्धि भएसँगै नेपाली बजारमा पनि सोहीअनुसार बढेको छ । १६ दिनमा सुन प्रतितोला ६ हजार ६ सय रुपैयाँ बढेको छ ।

‘साउन १ मा प्रतितोला ९२ हजार ७ सय रुपैयाँमा कारोबार भएको सुन क्रमशः बढेर ९९ हजार ३ सय रुपैयाँ पुगेको छ,’ महासंघका पूर्वअध्यक्ष शाक्यले भने, ‘अन्तर्राष्ट्रिय बजारमा मूल्य शुक्रबार पनि तलमाथि भइरहेको छ । आइतबार पुनः बढ्ने सम्भावना देखिन्छ ।’

एक सातामा प्रतितोला ३ हजार ५ सय रुपैयाँ मूल्य बढेको व्यवसायी बताउँछन् । पछिल्लो चरणमा मूल्य बढ्नुको कारण हङकङमा देखिएको तनाव पनि हो । त्यहाँ हडताललगायत गतिविधि भइरहेका छन् । यसले पनि लगानीकर्ता सुनतर्फ आकर्षित देखिएका हुन् ।

‘अमेरिकी अर्थशास्त्रीहरूले कोभिडको भ्याक्सिन नआए पनि बीचमा एकपटक सुनको भाउ घट्ने संकेत पनि गरेका छन,’ शाक्यले भने, ‘प्रतिऔंस २ हजार पुगेपछि नयाँ टार्गेट आउन सक्छ । मूल्य एक पटक ‘पुल ब्याक’ हुन्छ । त्यो भनेको अन्तर्राष्ट्रिय बजारमा प्रतिऔंस १७ सयसम्म पुग्ने आकलन गरिएको छ, त्यसपछि समयले परिवर्तन गर्छ ।’ मूल्य ‘पुल ब्याक’ भए नेपाली बजारमा प्रतितोला ८० देखि ९० हजार रुपैयाँसम्ममा झर्ने उनले बताए ।

‘डेडलक’ को चिन्ता

सुनको भाउमा दिनदिनै नयाँ रेकर्ड बनेपछि बजारमा ‘डेडलक’ हुने चिन्ता भएको व्यवसायी बताउँछन् । डेडलक बजार चल्न नसक्ने अवस्था हो । ‘यस्तो अवस्थामा सुन खरिदबिक्री गर्न सक्ने अवस्था हुँदैन,’ शाक्यले भने, ‘त्यस्तो अवस्था नआओस् ।’ मूल्य बढेपछि बजारमा सुनसान छ । अत्यावश्यक भएका ग्राहकले छिटफुट रूपमा पुरानो सुन बिक्री गर्न आएका छन् । गहना पसलबाट भने सुन बिक्री नभएको व्यवसायी बताउँछन् ।

सबै ग्राहक एकै पटक सुन बिक्री गर्न आए समस्या हुने आभूषण महासंघका अध्यक्ष रमेश महर्जनको भनाइ छ । ‘पुराना गहना बिक्री गर्न आउने चाप बिस्तारै बढ्दै छ । भाउ एक लाख नाघेपछि थप बढ्न सक्छ,’ उनले भने, ‘एकोहोरो रूपमा मात्र आए समस्या हुन्छ ।’

प्रकाशित : श्रावण १७, २०७७ ०९:०२
प्रतिक्रिया
पठाउनुहोस्

‘ठूलाबडा’ नै लगाउँदैनन् मास्क, जनतालाई चाहिँ जरिवाना !

कान्तिपुर संवाददाता

काठमाडौँ — कोरोना संक्रमणको स्थिति दिनानुदिन भयावह बन्दै छ, तर साउन लागेयताका गतिविधिलाई मात्र नियाल्दा पनि हामीले राष्ट्रका अगुवाहरू प्रधानमन्त्री, सभामुख, प्रमुख प्रतिपक्षी दलका नेता, मुख्यमन्त्री, मन्त्री, सांसद, सेना र प्रहरीका उच्च अधिकारी, सरकारी निकायका उच्च तहका व्यक्तिले समूहमा रहँदासमेत मास्क नै नलगाएको पायौं  ।

र, लगाउँदा पनि सही तरिकाले नलगाउने, चिउँडोमा अड्काउने, बोल्दा खोल्ने जस्ता विश्व स्वास्थ्य संगठनले समेत ‘गर्न नहुने’ भनेकै कुरा गरेको पायौं ।

प्रधानमन्त्री केपी शर्मा ओली साउन १ गते बालुवाटारमा यातायात व्यवसायी र मजदुरहरूको ज्ञापनपत्र बुझ्दै तस्बिर : रासस

सरकारले शुक्रबार मास्क नलगाई सार्वजनिक स्थलमा हिँडडुल गर्ने करिब हजार सर्वसाधारणलाई सय रुपैयाँ जरिवानासहित दण्डित गरेको छ । असार २२ यता मास्क नलगाई हिँड्ने करिब १० हजार जना कारबाहीमा परिसकेका छन् । तर यही अवधिमा उच्च ओहदामा बसेकाहरू भने मास्क नलगाई निर्बाध रूपमा विभिन्न सार्वजनिक कार्यक्रममा समेत सहभागी हुँदै आएका छन् । संक्रामक रोग ऐन २०२० को दफा ३ को प्रावधान उल्लंघन गरेको आरोपमा सर्वसाधारण दण्डित भइरहँदा प्रधानमन्त्री, मन्त्री, मुख्यमन्त्री, सचिव र सुरक्षा निकायका अधिकारीलाई भने ऐनको यो प्रावधानले असर पारेको छैन ।

कांग्रेस सभापति शेरबहादुर देउवा साउन १५ गते पार्टी कार्यालय सानेपामा तस्बिर : प्रकाशचन्द्र तिमिल्सेना/कान्तिपुर

कोरोना संक्रमणको जोखिम कायम रहे पनि अति संवेदनशील र सार्वजनिक स्थलमा मास्क नलगाई हिँडेको कसुरमा सर्वसाधारणलाई प्रहरीले सय रुपैयाँ जरिवाना गराएर छाड्ने गरेको छ । प्रहरी प्रधान कार्यालयका अनुसार शुक्रबारसम्म १० हजार जनालाई जरिवाना गरिएको छ ।

नेकपा अध्यक्ष पुष्पकमल दाहाल, वरिष्ठ नेता माधवकुमार नेपाल र उपाध्यक्ष वामदेव गौतम साउन ३ गते बालुवाटारमा आयोजित सचिवालय बैठकमा तस्बिर : राजन काफ्ले/प्रधानमन्त्रीको निजी सचिवालय

महानगरीय प्रहरी प्रधान कार्यालयकी एसएसपी किरण बज्राचार्यका अनुसार शुक्रबार एकै दिन उपत्यकाका तीन जिल्लाबाट १ सय २५ जनासहित देशभर करिब एक हजार जनालाई जरिवाना गराइएको हो । पछिल्लो एक महिनामा जरिवाना र सम्झाइबुझाइ गरेर १४ हजार ४ सय २१ जनालाई कारबाहीको दायरामा ल्याइएको उनले बताइन् ।

सभामुख अग्निप्रसाद सापकोटा साउन १४ गते सिंहदरबारमा प्रतिनिधिसभाकी नवनिर्वाचित सांसद लीलादेवी सिटौलालाई शपथ गराएपछि तस्बिर : रासस

गृह मन्त्रालयले मास्क लगाएर मात्र सार्वजनिक स्थलमा हिँडडुल गर्ने गरी व्यवस्था मिलाउन असार पहिलो साता नै प्रहरी र जिल्ला प्रशासन कार्यालयलाई निर्देशन दिएको थियो । सोही निर्देशनअनुसार सम्झाइबुझाइ गर्दासमेत मास्क प्रयोगमा अटेर गरेपछि जरिवाना लिएर दण्डित गर्नुपरेको काठमाडौंका प्रमुख जिल्ला अधिकारी जनकराज दाहालले बताए ।

उपप्रधान तथा रक्षामन्त्री ईश्वर पोखरेल (बीच) साउन १६ गते रक्षा मन्त्रालयमा आयोजित कार्यसम्पादन सम्झौतापत्र आदानप्रदान कार्यक्रममा तस्बिर : रासस

‘अटेर गर्ने क्रम बढ्दै गए संक्रामक रोग ऐन २०२० मा कैदसमेत गर्न सक्ने प्रावधान छ,’ उनले भने । पछिल्लो एक महिनामा प्रहरीले लकडाउन उल्लंघन गर्ने २ लाखभन्दा बढीलाई नियन्त्रणमा लिएकामा १ लाख ९० हजार जनाभन्दा बढीलाई सम्झाइबुझाइ छाडेको र बाँकीलाई जरिवाना गराएको छ ।

गृहमन्त्री रामबहादुर थापा साउन ११ गते गृह मन्त्रालयमा विभिन्न प्रदेशका आन्तरिक मामिलामन्त्रीहरूसँग छलफल गर्दै तस्बिर : रासस

कांग्रेस वरिष्ठ नेता रामचन्द्र पौडेल (बीचमा), महामन्त्री शशांक कोइराला र नेता प्रकाशमान सिंह साउन १५ गते सानेपामा आयोजित पत्रकार सम्मेलनमा तस्बिर : इलिट जोशी/कान्तिपुर

सेनाका विभिन्न विभागका प्रमुखहरू साउन १६ गते सैनिक मुख्यालयमा आयोजित पत्रकार सम्मेलनमा तस्बिर : रासस

महानगरीय प्रहरी परिसर काठमाडौंका प्रमुख एसएसपी श्याम ज्ञवाली (बीचमा) साउन १३ गते बरामद गरिएका हतियार र नक्कली सुनबारे सञ्चारकर्मीलाई जानकारी दिँदै तस्बिर : सन्जोग मानन्धर/कान्तिपुर

खेलकुदमन्त्री जगतबहादुर सुनार विश्वकर्मा (बीच) साउन १४ गते सिंहदरबारमा राष्ट्रिय खेलकुद परिषद्का नवनियुक्त उपाध्यक्ष शिव कोइराला र सदस्यसचिव रमेशकुमार सिलवाललाई शपथ गराउँदै तस्बिर : हेमन्त श्रेष्ठ/कान्तिपुर

गण्डकी प्रदेशका मुख्यमन्त्री पृथ्वीसुब्बा गुरुङ साउन ११ गते पोखरामा सञ्चार तथा सूचना प्रविधि मन्त्रालयमा सरुवा भएका प्रमुख सचिव हरिप्रसाद बस्याललाई बिदाइ गर्दै तस्बिर : रासस

संस्कृति, पर्यटन तथा नागरिक उड्डयनमन्त्री योगेशकुमार भट्टराई र विभिन्न प्रतिष्ठानका कुलपतिहरू साउन ११ गते नेपाल प्रज्ञा प्रतिष्ठानमा आयोजित छलफलमा तस्बिर : रासस

प्रकाशित : श्रावण १७, २०७७ ०८:४९
पूरा पढ्नुहोस्
प्रतिक्रिया
पठाउनुहोस्
×