राजमार्गका होटल खुल्न थाले
धादिङ — लकडाउनयता बन्द रहेका पृथ्वी राजमार्ग छेउका होटल/रेस्टुरेन्ट खुल्न थाले पनि ग्राहक नहुँदा सुनसान छन् । राजधानी आउजाउ गर्ने यात्रुले भरिभराउ हुने होटलमा यतिबेला चहलपहल शून्यप्राय: छ । निजी र मालवाहक सवारी चल्न थालेपछि होटल खुल्न थालेका हुन् ।
आँगनमा सवारी पार्किङ गर्न नदिन डोरी र पर्खालले छेकेका होटल/रेस्टुरेन्ट सञ्चालक अहिले अवरोध हटाएर सफा गर्दै छन् । कोही तीन महिनासम्म आँगनमा हुर्किएका झारपात उखेल्न व्यस्त छन् । कोही भने चोटाकोठामा लागेको माकुराको जालो हटाउन व्यस्त देखिन्छन् । मुग्लिङदेखि नौबिसेसम्म करिब १४ सय सानाठूला होटल सञ्चालनमा रहेको अनुमान छ ।
पृथ्वी राजमार्गको मलेखुस्थित माछा बजार खुलिसकेको छ । सेल, पकौडा, आलुचप बनाएर व्यवसायी ग्राहक कुरेर बसे पनि यात्रु होटलमा छिर्दैनन् । ‘तराईबाट आउने माछा लकडाउनले पर्याप्त छैन, स्थानीय माछाका परिकार बनाए पनि हतपत होटलमा कोही आउँदैनन्,’ होटल व्यवसायी प्रकाश त्रिपाठीले भने ।
गल्छीदेखि पूर्वका साना खाजा पसल बालुवा बोक्ने टिपर चालकले धानेका छन् । लामो दूरीका सवारी नचलेका कारण अरू होटलले ग्राहक कुरेर मात्रै बस्नुपरेको व्यवसायी बताउँछन् । स्थानीय प्रशासनले होटल सञ्चालन गर्न औपचारिक अनुमति भने दिएको छैन । खोलेका होटललाई पनि प्रहरीले बन्द गर्न कर गरेको छैन । ‘लामो दूरीका यात्रुवाहक सवारी सञ्चालन नभएसम्म होटल लयमा फर्कन सक्दैनन्,’ मलेखुमा होटल चलाइरहेका बोधनाथ दुवाडीले भने, ‘खोलेर मात्रै के गर्नु ? ग्राहक नै आउँदैनन् ।’ विदेशबाट फर्कनेलाई क्वारेन्टाइनमै राख्न तयार भए कोही नआएको होटल व्यवसायी संघ धादिङका अध्यक्ष राजकुमार श्रेष्ठले बताए ।
प्रकाशित : असार १६, २०७७ ०७:३६