सुरुङमार्गको जग्गालाई ५० प्रतिशत क्षतिपूर्ति- अर्थ / वाणिज्य - कान्तिपुर समाचार

सुरुङमार्गको जग्गालाई ५० प्रतिशत क्षतिपूर्ति

सांसद विकास कोषको खर्च हुन बाँकी रकम कोरोना कोषमा
कान्तिपुर संवाददाता

काठमाडौँ — सरकारले नागढुंगा–सिस्नेखोला सुरुङमार्गअन्तर्गत धादिङतर्फ रहेको श्री ५ को वायु गुठीका मोहीलाई ५० प्रतिशत क्षतिपूर्ति उपलब्ध गराउने निर्णय गरेको छ । भौतिक पूर्वाधार तथा यातायात मन्त्रालयको प्रस्तावमा उक्त रकम दिने निर्णय भएको सरकारका प्रवक्ता एवं अर्थमन्त्री युवराज खतिवडाले बताए ।



‘उनीहरू आफैं जग्गाधनी होइनन्, जग्गाधनी भएको भए मुआब्जा दिइन्थ्यो,’ उनले भने । जग्गाधनी प्रमाणपत्र नभएका, प्रमाण पुर्जा नभएका तर मालपोत नापी कार्यालयमा रहेको स्रेस्ता फिल्ड बुकमा जनाउ रहेको आधारमा मात्र उक्त क्षतिपूर्ति उपलब्ध गराउने निर्णय भएको उनले प्रस्ट्याए ।

धादिङतर्फ मुआब्जाको समस्या नटुंगिँदा लामो समयदेखि निर्माणको काम अघि बढ्न सकेको थिएन । स्थानीयले लामो समयदेखि शतप्रतिशत मुआब्जा दिनुपर्ने माग गर्दै आएका छन् । उक्त क्षेत्रमा १ सय ९ रोपनीमध्ये ४४ रोपनी जग्गाको मुआब्जा दिनुपर्नेछ ।

यसैबीच सांसदहरूले सञ्चालन गर्ने सांसद विकास कोषको चालु आर्थिक वर्षमा खर्च हुन बाँकी रकम कोरोना कोषमा राख्ने निर्णय भएको छ । संघीय मामिला तथा सामान्य प्रशासन मन्त्रालयको प्रस्तावमा चालु आवका लागि छुट्याइएको उक्त कार्यक्रमको खर्च हुन बाँकी रकम सम्बन्धित निर्वाचन क्षेत्रका स्थानीय तहमा गठित कोरोना नियन्त्रण कोषमा राख्ने निर्णय भएको अर्थमन्त्री खतिवडाले जानकारी दिए ।

‘लामो समयदेखि स्थानीय पूर्वाधार साझेदारी कार्यक्रमको रकम कोभिड–१९ को सन्दर्भमा प्रयोग गरौं भन्ने जनमत आएको छ,’ मन्त्रिपरिषद्ले गरेका निर्णय सार्वजनिक गर्दै शुक्रबार सरकारका प्रवक्तासमेत रहेका खतिवडाले भने, ‘संसद्मा पनि छलफल भएको विषय हुनाले त्यसैअनुसार नै यो निर्णय गरिएको हो ।’ यसरी जम्मा भएको रकम कोभिड–१९ को रोकथाम, नियन्त्रण र उपचारका काममा मात्र खर्च गर्न पाउने निर्णय भएको उनले जानकारी दिए ।

चालु आर्थिक वर्षमा प्रतिसांसदले ६ करोड प्राप्त गरेका थिए । आगामी आवका लागि भने प्रत्येक निर्वाचित सांसदलाई ४ करोडका दरले ६ अर्ब रकम विनियोजन गरिएको छ ।

प्रकाशित : असार ६, २०७७ ०८:५१
प्रतिक्रिया
पठाउनुहोस्

खाडीबाट एकै दिन ४९४ जना फर्किए

साउदी अरबबाट १५३, कुवेतबाट १५०, यूएईबाट १४८ र कतारबाट ४३ जनालाई शुक्रबार ल्याइएको हो । तीमध्ये ९८ जना गर्भवती छन् ।
होम कार्की

काठमाडौँ — खाडी क्षेत्रमा अप्ठ्यारोमा परेकामध्ये ४ सय ९४ जना नेपालीलाई शुक्रबार काठमाडौं ल्याइएको छ । जसमा २ सय ३५ पुरुष र २ सय ५९ जना महिला छन् । तीमध्ये ९८ जना गर्भवती छन् । २३ वटा शव पनि ल्याइएको छ ।

साउदी अरब र संयुक्त अरब इमिरेट्स (यूएई) बाट नेपालका दुईवटा विमान चार्टर गरी उनीहरूलाई ल्याइएको हो भने कतार र कुवेतले आफ्नै शुल्कमा विमान चार्टर गरी पठाएका हुन् । उनीहरूलाई कोभिड संकट व्यवस्थापन समितिले होल्डिङ सेन्टरमा राखेर स्थानीय तहको क्वारेन्टाइन र होटलमा बस्ने व्यवस्था मिलाएको छ ।

सरकारले साउदी अरबबाट पहिलो पटक कामदार ल्याउन अनुमति दिएको हो । साउदी अरबको दमामबाट १ सय ५३ जना बोकेको पहिलो उडान शुक्रबार बिहान ७:३० बजे त्रिभुवन विमानस्थलमा आइपुगेको थियो । जसमा चार जना गर्भवतीसहित आठ जना महिला छन् । साउदीका लागि नेपाली राजदूत महेन्द्रसिंह राजपुतले पहिलो उडानमा निकै अप्ठ्यारोमा परेका कामदारलाई पठाइएको बताए । साउदीमा १० हजार जनाले स्वदेश फिर्न दूतावासमा आवेदन दिएका थिए । दूतावासले प्राथमिकताका आधारमा स्वदेश पठाउन थालिएको उनले बताए । उनीहरूको आरडीटीमार्फत परीक्षण गरी ल्याइएको हो । साउदीले आरडीटीलाई मान्यता दिएको छैन, पीसीआर परीक्षण गर्न १५ सय रियाल शुल्क लाग्ने बताइएको छ ।

कुवेतले आममाफी प्रक्रियामा समावेश १ सय ५० जना घरेलु कामदारलाई जजिरा एयरलाइन्समार्फत पठाएको हो । स्वदेश आउने सबै खर्च कुवेत सरकारले नै व्यहोरेको हो । कुवेतले स्वदेश पठाउन भन्दै वैशाख १४ देखि अस्थायी क्याम्पमा राखेका महिलालाई उद्धार गर्न पहिलो प्राथमिकता दिएको नेपाली दूतावासले जनाएको छ । अस्थायी क्याम्पभन्दा बाहिर अप्ठ्यारोमा परेकालाई अझै ल्याइसकिएको छैन ।

संयुक्त अरब इमिरेट्स (यूएई) बाट ९४ गर्भवती महिलासहित १ सय ४८ जना आइपुगेका छन् । जसमा १ सय १ महिला र ४७ जना पुरुष छन् । नेपाली दूतावासले जेठ २३ गते पहिलो उडानमै गर्भवतीलाई पठाउने तयारी थियो । तर, अन्तिम समयमा आएर नि:शुल्क उडान भनिएको एयर अरेबियाले शुल्क लाग्ने भनेपछि दूतावासको सूचीअनुसार यात्रुको उडान भएको थिएन । त्यतिखेर एयर अरेबियाले दुबईबाट १ सय ६८ जना यात्रु ल्याएको थियो ।

चार वर्षदेखि यूएईमा कार्यरत झापाका सुवास संग्रौलाले साढे चार महिनाकी गर्भवती श्रीमती लिएर स्वदेश फिर्ने अवसर पाएको बताए । यो उडानमा नेपाली दूतावासले प्राथमिकताको सूचीमा राखेका नेपाली कामदार छन् । उनीहरू आफैंले टिकटको प्रबन्ध मिलाएका हुन् । रोजगार करार अवधि समाप्त भएका कामदारलाई भने रोजगारदाता आफैंले टिकटको व्यवस्था गरिदिएका थिए । स्वदेश फिर्नुअघि विमानस्थलमै कोरोना परीक्षण गरिएको थियो ।

कतारबाट जेल सजायमा आममाफी पाएका ४३ जना आएका छन् । उनीहरूलाई कतार सरकारकै खर्चमा कतार एयरवेजमार्फत नेपाल पठाइएको हो । कतार एयरवेजको उडान नम्बर क्यूआर ३२३४ को उडानमार्फत त्रिभुवन विमानस्थलमा १२:३६ मा काठमाडौं ल्याइएको हो ।

विमानमा कतारबाट डिपोर्ट गरिएका थप १ सय ९ जना पनि ल्याउने तयारी गरिएको थियो । तर, स्वास्थ्य परीक्षण समयमा नहुँदा जेलबाट घरफिर्ती केन्द्रमा ल्याएर राखिएका ४३ जनाले मात्रै स्वदेश फिर्न अवसर पाएका हुन् । उनीहरू विभिन्न मुद्दामा दोषी भई सजाय भोगिरहेका बेला इदका अवसरमा कतारी अमिरले माफी दिएपछि स्वदेश फिर्ने ढोका खुलेको हो ।

२३ वटा शव ल्याइयो

लकडाउनको अवधिमा खाडी राष्ट्रमा मृत्यु भएकामध्ये शुक्रबार २३ जनाको शव ल्याइएको छ । सबैभन्दा बढी कतारबाट २०, कुवेतबाट दुई र साउदी अरबबाट एक/एक जना ल्याइएको हो ।

कतारस्थित नेपाली दूतावासका अनुसार ५५ वटा शव रहेकामा २० जनाको शव पठाइएको हो । परिवारको सहमतिमा ९ वटा शवलाई कतारमै अन्त्येष्टि गरिएको छ ।

कतारबाट दमौली–७ बर्दियाका सुकराम थारू, ईश्वरपुर–१४ सर्लाहीका अरुणकुमार पञ्जीपुर, मदाई–१ महोत्तरीका शिवकुमार राउत, भरतपुर–६ धनुषाका चाउतारवा मण्डल खत्वे, भीमफेदी–८ मकवानपुरका जितेन्द्र थापा मगर, देवदह–६ रूपन्देहीका यमबहादुर थापा, सुखचैन–१५ सिरहाका काशीनन्द्र यादव, सधोवा–९ सर्लाहीका मनोज पासवान, औरही–१ महोत्तरीका अनिल चौधरी, दोहनी–८ कपिलवस्तुका मोहम्मद अलामा मुसलमान, हरिवन–११ सर्लाहीका मस्तक शैक, परासी–८ सिरहाका रूपेशकुमार मण्डल, सिमी–८ लमजुङका कुम्बा तामाङ, रझेना–५ बाँकेका भक्तबहादुर थापा मगर, लोहोतार–५ सप्तरीका राजेन्द्रप्रसाद मण्डल, कोसी हरैंचन–८ मोरङका युवराज अधिकारी, देउराली–५ भोजपुरका धर्मकुमार थापा, शिखरमणि–९ उदयपुरका मीनबहादुर थापा, मर्छक्क–६ सुर्खेतका नरबहादुर कामी र कमेरापानी–९ भोजपुरका मंगलबहादुर तामाङको शव ल्याइएको हो । कुवेतबाट संखुवासभाका मानबहादुर आले, नुवाकोटकी सुमी तामाङ, यूएईबाट सिन्धुपाल्चोकका पेमा नेर्वु शेर्पा र साउदी अरबबाट भैरबहादुर बस्नेतको शव ल्याइएको छ ।

वैदेशिक रोजगार बोर्डका कार्यकारी निर्देशक राजन श्रेष्ठले काठमाडौंमा शव बुझ्न आउन नसक्नेलाई घरमै लगिदिने प्रबन्ध मिलाइएको बताए । १३ मृतकका परिवार शव बुझ्न काठमाडौं आइपुगेका थिएनन् ।

प्रकाशित : असार ६, २०७७ ०८:४४
पूरा पढ्नुहोस्
प्रतिक्रिया
पठाउनुहोस्
×