पूर्वाधारका काम सुरु हुँदै

निर्माण सामग्री नपाएर रोकिएका कामले पुन: गति लिँदै छन्
विमल खतिवडा

काठमाडौँ — लकडाउनका बेला निर्माण सामग्री अभावमा रोकिएका र सुरु हुन नसकेका आयोजनामा अहिले विस्तारै काम थालिएको छ । निर्माण सामग्री र कामदार जम्मा गरेर कामलाई गति दिइँदै छ । सुरु भएका आयोजनामा १० देखि ६० प्रतिशतसम्म काम भएको सडक विभागले जनाएको छ ।

सबैभन्दा बढी सवारी चाप हुने नागढुंगा–नौबीसे सडकखण्डमा अहिले ओभर–ले (पिचमाथि पिच) गर्ने कामलाई तीव्रता दिइएको छ । एक सातायता डेढ किमि ओभर–लेको काम सकिएको विभागका महानिर्देशक केशवकुमार शर्माले बताए । ‘चितवनबाट निर्माण सामग्री ल्याएर काम थालिएको हो,’ उनले भने, ‘पानी पर्दा मात्र काम प्रभावित बन्ने गरेको छ, अरू समयमा निरन्तर छ ।’ उक्त खण्डमा ६ किमि ओभर–ले गरिनेछ ।

ठाउँठाउँमा अहिले आवधिक सडक मर्मतको काम पनि जारी राखिएको महानिर्देशक शर्माले बताए । निर्माण सामग्री अभावले बेलाबेला समस्या हुने गरे पनि सबै ठाउँमा केही न केही काम भएकै छ । पहिलाभन्दा अहिले कामको गति बढेको छ । संखुवासभा, हेटौंडा सडक डिभिजनअन्तर्गतका सडक र पुलमा राम्रो प्रगति भइरहेको उनले जानकारी दिए । गल्छी–त्रिशूली सडकमा पनि धमाधम काम भइरहेको छ ।

‘५० वटा ठेक्का भएकामध्ये १०/११ वटाको काम प्राय: सबै डिभिजनमा भएकै छ,’ उनले भने, ‘आयोजनामा प्रगति पनि देखिन थालेको छ । देशभर ३३ डिभिजन सडक, पुललगायत अन्य आयोजनासहित करिब ८० वटा कार्यालय छन् ।’ ती कार्यालयमार्फत सञ्चालित आयोजना सबैमा काम भएको महानिर्देशक शर्माको दाबी छ । निर्माण सामग्री अभावले कतैकतै समग्र आयोजनामा १० प्रतिशत मात्र काम पनि भएको उनले बताए ।

‘पुल निर्माणमा पहिल्यै सामग्री मौज्दात राखिएकाले त्यति समस्या देखिएको छैन,’ उनले भने, ‘त्यसैले अहिले कतै पनि काम रोकिएको छैन ।’ हुलाकी राजमार्गअन्तर्गत कपिलवस्तु, जनकपुर र वीरगन्जमा काम भइरहेको छ । व्यापारिक मार्गमा पनि धमाधम काम भइरहेको छ । लुभु–इमाडोल, चापागाउँ–लेले सडक खण्डमा पनि काम अघि बढाइएको विभागले जनाएको छ । चाबहिल–जोरपाटी खण्डका केही भागमा कालोपत्रको काम भएको छ । जोरपाटी–सुन्दरीजल खण्डमा वाल लगाउने र सडक चौडा गर्ने काम जारी छ ।

मध्यपहाडी लोकमार्गअन्तर्गत बागलुङ, दैलेख र काभ्रेमा काम भएको छ । नागढुंगा–सिस्नेखोला सुरुङमार्गमा पनि कामदार ल्याएर काम सुरु गरिएको शर्माले बताए । ‘भनेजति कामदार ल्याउन सकिएको छैन,’ उनले भने, ‘कुल कामदारमध्ये एकतिहाइ ल्याइएको छ । सुरुङकै काम भने सुरु भएको छैन, त्यसलाई चाहिने सडक निर्माणको काम मात्र थालिएको छ ।’

निर्माण सामग्री अभावले रोकिएको गौशला–चाबहिल खण्डको काम सुरु गरिएको छ । अहिले सडक भत्काउने काम सुरु भएको छ । कालोपत्रको काम केही दिनभित्र सुरु गरिने डिभिजन सडक कार्यालय काठमाडौंका प्रमुख कुवेर नेपालीले जानकारी दिए । ‘मौसमले साथ दिइरहेको छैन,’ उनले भने, ‘सडक खाली भएका बेला काम गर्न सजिलो हुन्थ्यो भनेर थालेका हौं ।’ भनेकै समयमा निर्माण सामग्री ल्याउन सकिएको भए अहिलेसम्म कालोपत्रको काम सकिने उनको भनाइ छ । ‘निर्माण सामग्री जहाँ भेटिन्छ, त्यहींबाट ल्याएका छौं,’ उनले भने, ‘अहिले काभ्रेको रोशी र ललितपुरको टीकाभैरवबाट लुकाइलुकाई ल्याएर काम थालेका छौं ।’

प्रकाशित : जेष्ठ २३, २०७७ ०८:३५
प्रतिक्रिया
पठाउनुहोस्

७५ दिनदेखि पानीजहाजभित्रै छन् बोहरा

नविन पोखरेल

लन्डन — दुईमहिने बिदामा नेपाल गएर परिवारसँग रमाउने उनको योजना चकनाचुर हुन पुग्यो जब विमानस्थलका कर्मचारीले लकडाउनको कारण देखाउँदै त्यहीँबाट फर्काइदिए ।

सिल्भर सी क्रुजेजमा कार्यरत हर्क बोहोरा गत मार्च २० को साँझ सिड्नीबाट उड्ने तरखरमा थिए । तर, मलेसियन एयरलाइन्सका कर्मचारीले लगेज जाँचका क्रममा नेपालमा लकडाउन सुरु भइसकेकाले जहाज नजाने भन्दै फर्काइदिए ।

बोहरा फर्किएर एक साता सिड्नीस्थित होलिडे इनमा बसे । त्यति बेला सिड्नी पनि कोभिड–१९ कारण लकडाउनमा थियो । बाहिर घुमघाम, साथीभाइ भेटघाटको सम्भावना थिएन । ‘क्रुजका साथीहरूसँग बिदा भएर निस्किएको थिएँ, विमानस्थलबाटै फर्कनुपर्‍यो’, हाल बेलायतको साउथह्याम्पटनस्थित बन्दरगाहमा फसेका बोहराले सुनाए, ‘म त नेपाल जान नसक्ने भएँ भनेर कम्पनीमा फेरि सम्पर्क गरें । उनीहरूले पर्थ आउनू, २६ मार्चमा अर्को क्रुज जाँदैछ भनेपछि एजेन्टमार्फत पर्थ गएँ ।’

पर्थबाट पानीजहाज चढ्नेबित्तिकै उनी १४ दिन आइसोलेसनमा बस्नुपर्ने भयो । कोरोना संक्रमण भए फैलन सक्छ भनेर उनलाई एक चिकित्सकले नै छैटौं तलाको बन्द कोठामा लगेर छाडेका थिए । कतै छुन नमिल्ने, कतै निस्कन नमिल्ने । ‘एक जना डाक्टर र बटलर (खाना ख्वाउने) आउँथे, अरूलाई प्रवेश अनुमति थिएन’, बोहराले सुनाए, ‘बाहिरबाट ढोका लक गरिदिएका थिए तर आपत्कालीन अवस्थामा तोड्न मिल्ने खालको थियो ।’

पानीजहाजभित्र टीभी, वाइफाई र खानेबस्ने, सुत्ने सबै व्यवस्था थियो । तर ‘होम सिक’ र कोरोनाको त्रासले उनी तड्पिरहे । कहिले क्याप्टेन, कहिले एचआर त यदाकदा साथीभाइसँग सम्पर्क गर्दै दिन बित्थ्यो ।

जहाज पर्थबाट १७ दिनमा दक्षिण अफ्रिकी सहर केपटाउन पुग्यो । ‘त्यहाँ १८० जना क्रु मेम्बरका लागि खानेकुरा किन्यौं । सबै सामान स्यानिटाइज गरेर ४८ घण्टा फ्रिजरमा राख्थ्यौं’, बोहरा सम्झिन्छन् ।

केपटाउनबाट जहाज स्पेनको टेनेरिफ पुग्यो । एउटै कम्पनीका पाँचवटा जहाज त्यहीँ आए । तिनमा रहेका सबैलाई एउटै जहाजमा राखेर स्पेनबाट बेलायतको साउथह्याम्पटनको यात्रा सुरु भयो ।

मे १० मा साउथह्याम्पटन आइपुगेका बोहरा र उनका साथी सुजन सुवेदी नेपाल सरकारले कहिले विमान चार्टर गर्ला भनेर बाटो हेरिरहेका छन् । नेपाल जान पाउने भए कम्पनीले विमानस्थलसम्म छाडिदिने नत्र भित्रै बस्नुपर्ने बाध्यता छ । आफ्नै कम्पनीको जहाजमा ट्रान्स्फर हुन पनि नमिल्ने उनी बताउँछन् । उनीहरूको दिनदिनै तापक्रम जाँचिने गरेको छ ।

‘मार्च २० देखि बिनातलब बस्नुपरेको छ । अझै कति लामो बस्नुपर्ने हो, मानसिक तनाब भइसक्यो,’ बोहराले कान्तिपुरसँग भने, ‘७४ दिन भइसक्यो जहाजभित्र थुनिएको । सरकारले उद्धार गरे बरु लागेको पैसा खर्च र नियम पालना गर्न राजी छौं ।’ उनले लन्डनस्थित नेपाली दूतावासमा उद्धारका लागि नाम टिपाइसकेको बताए ।

बोहरा नेपाल छँदा धनगढी प्रिमियर लिग (डीपीएल) मा ‘हस्पिटालिटी’ हेर्थे । उनी हस्पिटालिटी क्षेत्रमा लागेको ६ वर्ष बितिसकेको छ । दोहाको कतारमा ग्रान्ड हायात, चीनको ग्लोरी सी डायमन्ड क्रुजमा काम गरेपछि उनले सेप्टेम्बर २२ देखि फ्रान्सको बुर्डोबाट सिल्भर सी क्रुजेजमा जागिर थालेका हुन् । करिब ९ महिनामा विश्वका ६० वटाजति देश पानीजहाजमै यात्रा गरेको अनुभव उनीसँग छ ।


प्रकाशित : जेष्ठ २३, २०७७ ०८:३२
पूरा पढ्नुहोस्
प्रतिक्रिया
पठाउनुहोस्
×