कोरोना नियन्त्रण र पुराना कार्यक्रममा गण्डकीको जोड

आगामी आव ०७७/०७८ को बजेट तथा कार्यक्रमका सिद्धान्त र प्राथमिकता बुधबारको प्रदेशसभा बैठकमा पेस गर्दै आर्थिक मामिला तथा योजनामन्त्री किरण गुरुङले प्रदेशमा छुट्टै संक्रमण तथा सरुवा रोग अस्पताल स्थापना गर्ने जनाए । लकडाउनका कारण राष्ट्रिय अर्थतन्त्रमा परेको प्रभाव र असरलाई विश्लेषण गरी प्रदेश सरकारका सिद्धान्त तथा प्राथमिकतालाई फरक ढंगले तोकिएको उनले जनाए ।

‘सार्वजनिक खर्च कटौती गरी कोरोना महामारीबाट शिथिल अर्थतन्त्रलाई गतिशील बनाउन स्रोतसाधनलाई केन्द्रित गर्नुपर्ने अवस्था छ,’ उनले भने । क्वारेन्टाइनहरूको गुणस्तर र क्षमता अभिवृद्धि तथा व्यवस्थापन, संक्रमितहरूको प्रभावकारी उपचारका लागि विशेष अस्पताल स्थापना, व्यवस्थापन तथा सञ्चालन र पर्याप्त पीसीआर परीक्षणको व्यवस्थाका लागि बजेट विनियोजन गर्ने प्राथमिकतामा छ ।

प्रदेशभित्र मुटु, मिर्गौला, क्यान्सर, मातृ तथा बालरोगसम्बन्धी विशिष्टीकृत अस्पताल निर्माण गर्ने कार्यक्रमलाई निरन्तरता दिइने उनले जानकारी दिए । यसैगरी प्रदेशका जिल्ला अस्पतालमा सघन उपचार कक्ष (आईसीयू) स्थापना र थप सेवा विस्तार गरिनेछ । प्रयोगशालाको अभिवृद्धि, पूर्ण खोपयुक्त प्रदेश, बहुपक्षीय पोषण सुधार, स्वास्थ्य साक्षरता, एयर लिफ्टिङ कार्यक्रमलाई निरन्तरता दिइनेछ ।

एक निर्वाचन क्षेत्र एक सडक, स्थानीय तहको केन्द्रलाई जिल्ला र प्रदेश केन्द्र जोड्ने तथा रणनीतिक महत्त्वका सडक पूर्वाधार निर्माणका कार्यक्रमलाई निरन्तरता दिइएको छ । बृहत् पोखरा चक्रपथ, प्रदेश बसपार्क, मेट्रो बसपार्कको सम्भाव्यता अध्ययन तथा निर्माण, एक घर एक धारा, उज्यालो प्रदेश, नवीकरणीय ऊर्जा, जनता आवास कार्यक्रमलाई निरन्तरता दिइनेछ । लक्षित समुदायको सामाजिक सुरक्षामा जोड, कृषिमा आत्मनिर्भर, खेलकुद क्षेत्रको विकास, लक्षित नागरिकको अधिकार संरक्षणलगायत कार्यक्रम पनि समेटिनेछन् ।

लोकाहा खोला, नवलपुर र पुँडीटार कास्कीमा प्रदेशस्तरीय औद्योगिक क्षेत्र बनाउने काम प्राथमिकतामा छन् । पर्यटन क्षेत्रको पुनरुत्थान गर्न ऋणमा पुनर्तालिकीकरण, ब्याजमा अनुदान तथा थप कर्जा प्रवाह गर्न, गराउन बैंकिङ तथा वित्तीय संस्थालाई समन्वय एवं सहजीकरण गर्ने र प्रदेशको स्रोतसाधनका आधारमा विशेष कार्यक्रम सञ्चालन गरिने मन्त्री गुरुङले बताए ।