प्रदेश १ मा बजेट निर्माण प्रक्रिया सुरु

रोजगारी सिर्जना गर्ने क्षेत्रलाई प्राथमिकतामा राखेर बजेट, नीति तथा कार्यक्रम ल्याउने प्रदेश सरकारको तयारी छ । तर बजेटका लागि स्रोत व्यवस्थापनमा समस्या भएकाले चालु आवभन्दा आउँदो आवको बजेटको आकार खुम्चिने बताइएको छ । वैदेशिक रोजगारीबाट फर्किने र औद्योगिक क्षेत्रले मजदुर कटौती गर्न थालेको अवस्थामा प्रदेशमै रोजगारी सिर्जना गर्ने गरी बजेट ल्याउनैपर्ने प्रदेश सरकारको चुनौती छ ।

‘साना तथा मझौला कृषि व्यवसायी, पर्यटन र औद्योगिक क्षेत्रलाई प्राथमिकतामा राखेर बजेट ल्याउँछौं,’ मन्त्री आङ्बोले भने, ‘विकास निर्माणतर्फ चालु आर्थिक वर्षको स्वीकृत तथा सञ्चालित बहुवर्षीय योजना, ठेक्का प्रक्रियामा रहेका योजनालाई मात्रै प्राथमिकतामा राख्छौं ।’ ग्रामीण अर्थतन्त्रलाई मजबुत बनाउने गरी बजेट ल्याउने तयारी थालिएको उनको भनाइ थियो ।

समग्र स्वास्थ्य र शैक्षिक क्षेत्रको क्षमता बढाउनु आवश्यक छ । जिल्ला, प्रादेशिक अस्पताल, प्राथमिक स्वास्थ्य केन्द्र, अनुसन्धान केन्द्र र शिक्षा क्षेत्रलाई समेत बजेटले प्राथमिकता दिने उनले बताए । रेमिट्यान्स र सर्वसाधारणको खरिद क्षमता घट्दै गएको र राजस्व असुली प्रभावित भएकाले पनि बजेटको आकार घट्न सक्ने अनुमान गरिएको छ ।

संघीय सरकारले राजस्व बाँडफाँटमा मात्रै गत वर्षभन्दा १ अर्ब बजेट सिलिङ घटाएर पठाएको र त्यहीअनुसार समानीकरण र ससर्त अनुदान पनि आउने भएकाले बजेटको आकार खुम्चिनु स्वाभाविक भएको मन्त्री आङ्बोले बताए । प्रदेश १ सरकारले चालु आवका लागि राजस्व बाँडफाँट शीर्षकमा १० अर्ब ५२ करोड बजेट सिलिङ पाएको थियो । तर यस वर्ष १० प्रतिशत घटाएर सिलिङ आएको छ ।

चालु आवको बजेटको ६० प्रतिशतभन्दा बढी खर्च हुने उनले बताए । ‘हालसम्ममा भएको खर्च, काम भएर दायित्व सिर्जना भएको र अहिले अघि बढेको विकास निर्माणको काम हेर्दा ६० प्रतिशत बजेट खर्च हुने अनुमान छ,’ उनले भने, ‘बजेट खर्चको हिस्सा विकास निर्माणको क्षेत्रमा अधिक छ ।’