वैशाख ३ सम्म सेयर बजार पनि बन्द

‘बुधबारदेखि थप ६ कारोबार दिनका लागि सेयर कारोबार बन्द गर्ने निर्णय गरेका छौं,’ उनले भने, ‘अर्थ मन्त्रालय र धितोपत्र बोर्डको आग्रहमा बजार बन्द गर्ने निर्णय गरिएको हो ।’ लकडाउनको अवधिमा घरबाट निस्किन नमिल्ने भएकाले सरकारको आग्रहलाई समर्थन गर्न कारोबार बन्द गरिएको उनको भनाइ छ । ‘लकडाउन नहटेसम्म सेयर कारोबार सम्भव देखिएन,’ उनले भने ।

कोरोना संक्रमणको असर भन्दै सेयर कारोबार बन्द छ । सुरुमा धितोपत्र बोर्डले कारोबार बन्द गरेको हो । धितोपत्र ऐनमा बोर्डले बढीमा ६ कारोबार दिनका लागि मात्र कारोबार रोक्न पाउने व्यवस्था छ । त्यसकै आधारमा पहिलो पटक चैत ११ देखि बोर्डले कारोबार रोक्ने निर्णय गरेको थियो । दोस्रो पटक सूचीकरण तथा कारोबार नियमावली–०७५ को नियम २१ बमोजिम नेप्सेले थप एक साता कारोबार बन्द गर्‍यो । त्यसको समयावधि चैत २५ मा सकिएको थियो । नियमावलीको नियम २१ मा मुलुकमा राष्ट्रिय संकट वा काबुबाहिरको परिस्थिति आए नेप्सेले कारोबार रोक्न सक्ने व्यवस्था छ । नेप्सेले सोही व्यवस्थाका आधारमा पुन: थप एक साता बजार बन्द गर्ने निर्णय गरेको हो ।

गत माघसम्म नेप्सेमा सूचीकृत कम्पनीको संख्या २ सय ११ छ । त्यसमध्ये १ सय ४८ बैंक तथा वित्तीय संस्था र बिमा कम्पनी छन् । ३२ जलविद्युत् कम्पनी, १९ उत्पादन र प्रशोधन उद्योग, ४/४ होटल तथा व्यापारिक संस्था र ४ अन्य समूहका छन् । ०७६ असारमा सूचीकृत कम्पनी २ सय १५ थिए ।

सूचीकृत कम्पनीमध्ये बैंक तथा वित्तीय संस्था र बिमा कम्पनीको धितोपत्र बजार पुँजीकरणको हिस्सा ८०.३ प्रतिशत छ । जलविद्युत् कम्पनीको हिस्सा ५.८, उत्पादन र प्रशोधन उद्योगको हिस्सा ३.७, होटलको हिस्सा १.५, व्यापारिक संस्थाको हिस्सा ०.३ तथा अन्य समूहका कम्पनीको हिस्सा ८.५ प्रतिशत छ । ०७६ माघसम्म सूचीकृत संस्थाको सेयर ४ अर्ब ६६ करोड कित्ता रहेको नेप्सेले जनाएको छ ।