२ सय ५० यात्रुसहित वाइडबडी अस्ट्रेलिया उड्यो
काठमाडौँ — लकडाउनका कारण नेपालमा अलपत्र परेका अस्ट्रेलियाली र न्यूजील्यान्डका पर्यटक तथा पिआरबाहक नेपालीलाई लिएर नेपाल वायुसेवा निगमको वाइडबडी विमान बधुबार साँझ ६ बजे अस्ट्रेलियाको ब्रिसबेनतर्फ उडेको छ । टिकट बिक्री गर्ने जिम्मा पाएको बोन ट्राभलका सञ्चालक रमेश पौडेलका अनुसार जहाजमा २ सय ५० यात्रु छन् ।
वाइडबडीमा न्युजिल्यान्डका २३ जना छन् भने बाँकी सबै अस्ट्रेलिया जाने यात्रु छन् । ‘झापादेखि भैरहवासम्मका नेपाली पिआरवाल र लकडाउनका कारण अलपत्र परेका अस्ट्रेलियालीसहित २ सय ५० जना यात्रु उडेका छन्’ पौडेलले भने । यो उडान कूटनैतिक पहलबाट गरिएको भए पनि अस्ट्रेलियाली दूतावासले १० वर्षदेखि उसँग काम गर्दै आएको बोनलाई यसमा सामेल गराएको छ ।
सरकारले लकडाउनमा व्यावसायिक उडानलाई रोकेको छ । तर, कूटनैतिक नियोगलगायतका उद्धार उडान र मानवीय सहायताका उडानलाई भने खुला गरेको छ ।
आज उडेको वाइडबडी काठमाडौंबाट मलेसियाको क्वालालम्पुर पुग्ने छ । त्यहाँ इन्धन भरेर स्थानीय समयअनुसार राति ब्रिसबेनतर्फ उड्ने छ । ब्रिसबेनमा दिउँसो पुगेर त्यहाँबाट भोलि मलेसियाको क्लालालम्पुर हुँदै राति काठमाडौं आइपुग्ने छ ।
यो पनि
प्रकाशित : चैत्र १९, २०७६ १८:३६