आपूर्तिमा सघाउन स्थानीय र प्रहरी प्रशासनलाई महासंघको अनुरोध

कान्तिपुर संवाददाता

काठमाडौँ — उद्योगीहरूले उत्पादन गरेका वस्तु आपूर्तिमा सहयोग गरिदिन नेपाल उद्योग वाणिज्य महासंघले स्थानीय तथा प्रहरी प्रशासनलाई अनुरोध गरेको छ ।

कोभिड–१९ को संक्रमणबाट बच्न सरकारले देशभर लकडाउन घोषणा गरेको अवस्थामा पनि जोखिम मोलेर उद्योगीहरूले उद्योग चलाइरहेका छन् । ती उद्योगीले उत्पादन गरेका वस्तु एकबाट अर्काे जिल्लामा लैजाँदा अनेक समस्या भोग्नुपरेकाले आपूर्तिमा संलग्न उद्योगीलाई सघाइदिन स्थानीय तथा प्रहरी प्रशासनलाई अनुरोध गरिएको महासंघले बताएको छ ।


अत्यावश्यक वस्तु तथा सेवासँग सम्बन्धित उद्योगको उत्पादन बढाई उत्पादित वस्तु निर्बाध रूपमा मुलुकभर पुर्‍याउन सहयोग गरिदिन महासंघले सोमबार जारी गरेको विज्ञप्तिमा जनाइएको छ । सुरक्षका सबै उपाय अवलम्बन गर्दै उत्पादन प्रक्रिया र आपूर्ति व्यवस्थापनमा सहभागी भई अहिलेको कठिन अवस्थामा मुलुकलाई सहयोग गर्न महासंघले सबैलाई अनुरोध गरेको हो ।


प्रकाशित : चैत्र १७, २०७६ २०:०७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

लकडाउनका तीन दिनमा ग्राहकले बैंकबाट साढे ३ अर्ब झिके

यज्ञ बञ्जाडे

काठमाडौँ — सरकारले पहिलो पटक ‘लकडाउन’ घोषणा गरेपछिका तीन दिन (गत मंगलबार, बुधबार र बिहीबार) सर्वसाधारणले करिब साढे ३ अर्ब रुपैयाँ बैंकबाट झिकेका छन् ।

कोभिड–१९ संक्रमणको जोखिमबाट बच्न सरकारले नागरिकलाई घरमै बस्न निर्देशन दिएपछि एटीएम र बैंकको काउन्टरबाट निकालिएको रकम हो यो । उक्त रकम वाणिज्य बैंकहरूबाट मात्र झिकिएको हो ।

लकडाउनको समयमा आवश्यक सामग्री खरिद गर्न, आपत्कालीन अवस्थालगायत कामका लागि ग्राहकले पैसा निकालेका हुन् । सो अवधिमा ग्राहकले विकास बैंक, फाइनान्स कम्पनी र लघुवित्त वित्तीय संस्थाबाट पनि रकम निकालेका छन् । उक्त तथ्यांक यहाँ समावेश छैन । उक्त रकम पनि जोड्दा ग्राहकले बैंक तथा वित्तीय संस्थाबाट निकालेको रकम धेरै हुन आउँछ ।

सरकारले पहिलो चरणमा गत मंगलबार (चैत ११ देखि १६ सम्म) लकडाउन घोषणा गरेको थियो । लकडाउन सुरु भएपछिका तीन दिनमा एटीएमबाट १ अर्ब १७ करोड २६ लाख र चेकमार्फत २ अर्ब ३८ करोड ७५ लाख रुपैयाँ नगद निकालिएको राष्ट्र बैंकको तथ्यांक छ । बैंकबाट झिकिएको रकम काठमाडौं उपत्यकाभन्दा मोफसलमा धेरै छ । एटीएमबाट झिकिएको रकममध्ये काठमाडौं उपत्यकाभित्र ५५ करोड ७४ लाख रुपैयाँ छ । बाँकी ६१ करोड ५१ लाख रुपैयाँ मोफसलका ग्राहकले निकालेका छन् ।

यसैगरी चेकबाट पनि काठमाडौं उपत्यकाभन्दा मोफसलमा धेरै रकम निकालिएको छ । तीन दिनमा काठमाडौं उपत्यकाभित्रका बैंकका काउन्टरबाट ७३ करोड ६ लाख रुपैयाँ र उपत्यकाबाहिरबाट १ अर्ब ६५ करोड ६८ लाख रुपैयाँ नगद झिकेको देखिन्छ ।
यो अवधिमा ग्राहकले मोबाइल बैंकिङ, इन्टरनेट बैंकिङ, पोओएसलगायत विद्युतीय माध्यमबाट पनि ठूलो कारोबार गरेका छन् । ती माध्यमबाट ठूलो परिमाणमा कारोबार भएको राष्ट्र बैंकको तथ्यांक छ ।

प्रकाशित : चैत्र १७, २०७६ १९:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×