एटीएममा पर्याप्त पैसा राख्न राष्ट्र बैंकको निर्देशन

यज्ञ बञ्जाडे

काठमाडौँ — लकडाउनको समयमा एटीएममा पर्याप्त पैसा राख्न र नियमित निगरानी गर्न बैंक तथा वित्तीय संस्थालाई राष्ट्र बैंकले निर्देशन दिएको छ । अप्ठ्यारो परिस्थितिमा सकेसम्म ग्राहकलाई आधारभूत सेवा प्रदान गर्न पनि बैंक तथा वित्तीय संस्थालाई राष्ट्र बैंकले भनेको छ ।



बैंक तथा वित्तीय संस्थालाई स्थानीय सरकारसँग समन्वय गरेर सकेसम्म सर्वसाधारणले बैंकमा राखेको रकम झिक्न पाउने व्यवस्था मिलाउन निर्देशन दिइएको राष्ट्र बैंक नियमन विभाग प्रमुख देवकुमार ढकालले बताए। लकडाउनको अवधिमा सर्वसाधारणलाई नगद आवश्यक पर्ने र त्यसका लागि न्यूनतम बैंकिङ सेवा प्रदान गर्नु वाञ्छनीय भएको भन्दै राष्ट्र बैंकले निर्देशन जारी गरेको हो।


बैंक तथा वित्तीय संस्थाले विद्युतीय माध्यमबाट हुने कारोबारको सुनिश्चितता प्रदान गरी आफ्ना ग्राहकलाई सकेसम्म विद्युतीय माध्यमबाट कारोबार गर्न सूचित गर्न पनि भनिएको छ। हरेक स्थानीय तहमा सम्भव भएसम्म कम्तीमा एउटा शाखा सञ्चालन गर्न पनि राष्ट्र बैंकको निर्देशन छ।


लकडाउन अवधिमा खुला रहने शाखाको विवरण तथा सम्पर्क व्यक्तिको फोन नम्बर आफ्नो वेबसाइटमा अद्यावधिक गर्न र बन्द रहने शाखाको मूलढोकामा सर्वसाधारणले देख्ने गरी बन्द शाखाको विवरण सूचना टाँस्न पनि राष्ट्र बैंकले भनेको छ।


भन्सारबाट प्राप्त हुने चेक क्लियरिङको उचित व्यवस्था मिलाउने, अत्यावश्यक वस्तुको आपूर्ति सुनिश्चितता प्रदान गर्न ड्राफ्ट, टिटी, प्रतीतपत्र, ग्यारेन्टी जस्ता कारोबार सञ्चालन हुने व्यवस्था मिलाउन पनि राष्ट्र बैंकले निर्देश गरेको छ। ‘घ’ वर्गका वित्तीय संस्थाले समेत स्थानीय प्रशासनसँग समन्वय गरी काउन्टरमार्फत सम्भव भएसम्म कारोबार सञ्चालन गर्न भनिएको छ।


बैंक तथा वित्तीय संस्थाले नियमित रूपमा राष्ट्र बैंकमा बुझाउनुपर्ने रिपोर्ट पछि बुझाए पनि हुने सुविधा पाएका छन्। ‘बैक तथा वित्तीय संस्थाले राष्ट्र बैंकमा गर्नुपर्ने रिपोर्टिङ परिस्थिति सामान्य भई कार्यालय नियमित रूपमा खुलेको ७ कार्य दिनभित्र गर्ने व्यवस्था मिलाउनुपर्नेछ,’ निर्देशनमा भनिएको छ।


बैंक तथा वित्तीय संस्थाले निश्चित स्थानमा शाखा खुला गरे पनि ग्राहक खासै आएका भने छैनन्। प्रकाशित : चैत्र १२, २०७६ २०:४१

ADVERTISEMENT
प्रतिक्रिया
पठाउनुहोस्
ADVERTISEMENT

कोरोना प्रभावित व्यवसायीलाई चैत मसान्तसम्म ऋणको सावा ब्याज बुझाउन छुट

नोटलाई संक्रमण रहित बनाउन अर्थ मन्त्रालयको निर्देशन
यज्ञ बञ्जाडे

काठमाडौँ — कोरोना प्रभावित व्यवसायीहरुले चैत मसान्तसम्म कर्जाको सावा तथा ब्याज भुक्तानी गर्नु नपर्ने भएको छ । अर्थ मन्त्रालयले बुधबार बैंक तथा वित्तीय संस्था र गैरबैंकिङ वित्तीय संस्थालाई चैत मसान्तसम्म कर्जा असुली स्थगन गर्न निर्देशन दिएको हो ।


‘संक्रमणको अवधि तत्काल यकिन गर्न व्यवहारिक नभएकाले कोरोना प्रभावित व्यवसायहरुको सावा ब्याज असुली सम्बन्धी कार्य चैत्र मसान्तसम्मका लागि स्थगन गर्ने,’ निर्देशनमा भनिएको छ। कुन कुन व्यवाय तथा क्षेत्र कोरोना प्रभावित भन्ने खुलाइएको छैन।

सो अवधिमा प्रवाह भएको कर्जाको बर्गीकरण तथा नउठेको खराब कर्जा बापत गर्नुपर्ने व्यवस्था पनि स्थगनको व्यवस्था मिलाउन अर्थमन्त्रालयले राष्ट्र बैंकलाई निर्देशन दिएको छ।
बैंकको काउन्टरमा आउने ग्राहकलाई वितरण गर्ने नोटलाई संक्रमण रहित बनाएर मात्र वितरण गर्न पनि आग्रह गरिएको छ।

कोरोना संक्रमणका लागि विदेशबाट आयात गरिने औषधिको भुक्तानी सहज बनाउन टीटीको माध्यमबाट आयात गर्दा विदेशी विनिमयको सीमा लागू नहुने व्यवस्था गर्न पनि राष्ट्र बैंकलाई निर्देशन गरिएको छ।

यसैगरी, वित्तीय प्रणालीमा तरलता अभाव हुन नदिन अर्थमन्त्रालयले भुक्तानी गर्न बाकी रकम भुक्तानी गर्न, बैंक तथा वित्तीय संस्थाले ऋण प्रवाह कार्यलाई सहज बनाउन, पुनर्कर्जा कोषको उपयोग गर्न पनि अर्थमन्त्रालयले आग्रह गरेको छ।

यस्तै, सहुलियतपूर्ण ऋण प्रवाहलाई सहज बनाउन, कर्जा पहुाच बढाउन पनि निर्देशन दिइएको छ। बैंक तथा वित्तीय संस्थाले नगद रहित कारोबारलाई प्रोत्साहित गर्न विद्युतीय उपकरण प्रयोग गर्दा भुक्तानी गर्नु पर्ने शुल्कमा छुट दिन तथा न्यूनतम शुल्क लिन पनि अर्थले निर्देशन दिएको छ।

प्रकाशित : चैत्र १२, २०७६ २०:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×