कान्तिपुर वेबसाईट
AdvertisementAdvertisement
२०.१२°C काठमाडौं
काठमाडौंमा वायुको गुणस्तर: १५७

खस्किँदै घरेलु गलैंचाको बजार

कान्तिपुर संवाददाता

दार्चुला — नेपालमै प्रसिद्ध मानिएको दार्चुलामा उत्पादित गलैंचाको माग पछिल्लो समय खस्किएको छ । परम्परादेखि यहाँका स्थानीयले तानबाट बुनेर गलैंचा उत्पादन गर्दै आएका छन् । 

खस्किँदै घरेलु गलैंचाको बजार

‘हातले ऊन कातेर तानमा बुनेको गलैंचाको उत्पादन र बिक्री घट्न थालेको छ,’ महाकाली नगरपालिका–४ बंगाबगडका सहदेव बोहराले भने, ‘बजारमा पाइने रेडिमेड गलैंचाले स्थानीय उत्पादनलाई विस्थापित गर्न थालेको हो ।’ कम लागत र राम्रो सजावटका गलैंचा बजार र ग्रामीण क्षेत्रमा पुग्न थालेपछि स्थानीय गलैंचाले मूल्य नपाएको हो ।


गलैंचा तयार गर्न बाहिरबाट कच्चापदार्थ ल्याउनुपर्ने र मिहिनेत पनि उत्तिकै पर्ने भएपछि स्थानीय प्रविधिबाट बुनेका गलैंचाको लागत बढी हुन्छ । एक महिनामा दुईभन्दा बढी बुन्न नसकिने स्थानीय बताउँछन् । करिब ४ हजार रुपैयाँ बराबरको कच्चापदार्थ र धेरै समय अनि श्रम बढी लाग्ने भएकाले अहिले बजारमा आउने गलैंचाभन्दा मूल्य बढी हुनु स्वाभाविक रहेको पारभती बुढाथोकीको भनाइ छ ।


दार्चुलामा मात्र बसोवास रहेको सौका समुदायका प्रत्येक घरमा गलैंचा बुन्ने मेसिन भेटिन्छन् । तान भएका घर भने बिरलै छन् । ७७ वर्षीया पारभती भने तानबाटै गलैंचा बुन्छिन् । रेडिमेड गलैंचा बजारमा नआउँदासम्म दार्चुलाको गलैंचा देशमै प्रख्यात रहेको उनले सम्झिइन् । त्यस बेला गलैंचा खोज्दै ग्राहक घरघरमै पुग्ने गरेको उनले बताइन् । अहिले त आफैंलाई चाहियो भने पनि भारतीय बजारमा खोज्नुपर्ने अवस्था आएको उनको भनाइ छ ।


घरमा खाली बस्नुपर्ने हुँदा समयको सदुपयोग हुने र आफ्नो पेसाको पनि जगेर्ना हुने हुँदा तान बुन्ने गरेको उनले बताइन् । तानलाई स्थानीय भाषामा ‘राज’ भन्ने गरिएको व्यासी सौका समाजकी अध्यक्ष यशोदा तिंकरीले बताइन् । तानमा गलैंचा, राडी पाखी, स्विटर, टोपीलगायत न्याना लुगा बुन्ने गरिन्छ । दार्चुलामा सौका समुदायको बसोवास उत्तरी व्यास, राप्ला र सितोला गाउँमा छ ।


जिल्लामा अन्य जिल्लाबाट घुम्न आउनेहरूले प्रायः कोसेलीका रूपमा दार्चुलाको गलैंचा लैजाने चलन रहेको स्थानीय गंगोत्री बुढाथोकीले बताइन् । यहाँ उत्पादित सानो आकारको गलैंचाको मूल्य ७ हजार र ठूलोको मूल्य १५/२० हजार रुपैयाँसम्म पर्ने उनको भनाइ छ ।

प्रकाशित : फाल्गुन ९, २०७६ ०८:१९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?