लुम्बिनीमा वानकी मुन बोलाइने

सुरज कुँवर

काठमाडौँ — सरकारले हरेक दुई वर्षमा आयोजना गर्दै आएको तेस्रो अन्तर्राष्ट्रिय बौद्ध सम्मेलनमा तथा बुद्ध जयन्तीमा यस वर्ष संयुक्तराष्ट्र संघका पूर्व महासचिव वानकी मुनसहित २१ वटा राष्ट्रका प्रतिनिधिलाई बोलाउने भएको छ । 


संस्कृति,पर्यटन तथा नागरिक उड्डयन मन्त्रालयका अनुसार वैशाख शुक्ल पूर्णिमाका दिन हुने लुम्बिनीमा हुने दुई दिने कार्यक्रममा वानकी मुनसहित श्रीलंकाका राष्ट्रपति गोतबाया राजपाक्षे, थाइल्याण्डका प्रधानमन्त्री प्रयुत चान ओचा, म्यानमारका स्टेट काउन्सिलरलाई निमन्त्रणा गर्ने निर्णय भएको मूल आयोजक समितिका अध्यक्ष एवं पर्यटनमन्त्री योगेश भट्टराइले बताए। उनका अनुसार, बुद्ध जयन्ती र तेस्रो अन्तर्राष्ट्रिय बौद्ध सम्मेलन भव्यताका साथ मनाउने नेपाल सरकारको (मन्त्रिपरिषद्) को माघ २० गतेको निर्णय अनुसार यो कार्यक्रममा विदेशी पाहुनाहरुलाई बोलाउन लागिएको हो।


‘मेरो (मन्त्री) तह वा प्रधानमन्त्री तथा राष्ट्रपति तह हस्ताक्षर गरेर निम्तो पठाउनुपर्ने हुन्छ विदेशी पाहुनाबारे चाँडै निर्णय गर्नुहोला,’सोमबार मन्त्रालयमा आयोजित मूल आयोजक समितिको पहिलो बैठकमा मन्त्री भट्टराईले उपसमितिका संयोजक तथा सदस्यहरुलाई भने, ‘कार्यक्रम हुन अढाइ महिना बाँकी छ यो समय हामी नेपालीका लागि धेरै हो तर विदेशीहरुका लागि कमै हो ढिलाइ नगर्नुहोला।’


आयोजकले १८ वटा मुलुकका संस्कृति तथा धार्मिक मामिला मन्त्रीलाई निम्त्याउँदै छ। मन्त्रीले बजेट सरकारसँग माग गरिएको तर विनियोजन भइनसकेको बताउँदै यो कार्यक्रमका लागि नेपाल भम्रण वर्ष सचिवालय, नेपाल पर्यटन बोर्ड र लुम्बिनी विकास कोषबाट रकम विनियोजन हुने बताए। यो कार्यक्रमा लुम्बिनीमा हालै राष्ट्रपति विद्यादेवी भण्डारीद्वारा शिलान्यास गरिएको ५ हजार व्यक्ति क्षमताको सभा हलमा हुनेछ।


कार्यक्रमको उद्देश्य बृहत्तर लुम्बिनी विकास क्षेत्रलाई अन्तर्राष्ट्रिय बुद्धिष्ट हबका रुपमा विकास गर्ने, लुम्बिनीलाई विश्वकै आध्यात्मिक केन्द्रका रुपमा स्थापना गर्ने लगायतका ८ वटा रहेका छन्।


वैशाख २० गते हुने कार्यक्रमको उद्घाटनमा राष्ट्रपति विद्यादेवी भण्डारी र प्रधानमन्त्री केपी शर्मा ओली दुवै रहने आयोजकले जनाएको छ। यो कार्यक्रमले नेपालले घोषणा गरेको पर्यटन वर्षलाई पनि टेवा पुग्‍ने मन्त्री भट्टराईले बताए। प्रकाशित : फाल्गुन ५, २०७६ १८:५४

ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

हिमालय एयरलाइन्सले बेच्यो ६५ प्रतिशत सेयर

सुरज कुँवर

काठमाडौँ — नेपाली साझेदार कम्पनी यति वर्ल्ड इन्भेष्टमेन्टसँगको संयुक्त लगानीमा स्थापना भएको हिमालय एयरलाइन्सबाट ल्हासाको तिब्बत एयरलाइन्सले आफ्नो शेयर झिकेको छ ।

हिमालय एयरलाइन्सका अध्यक्ष झो एन्योङले आइतबार राजधानीमा आयोजित पत्रकार सम्मेलनमा यसबारे जानकारी गराएका हुन् ।

उनका अनुसार, तिब्बत एयरलाइन्सले बिक्री गरेको शेयर तिब्बत सिभिएल एभिएसन डेभलभमेन्ट एण्ड इन्भेष्टमेन्ट कम्पनी लिमिटेडले खरिद गरेको हो । कम्पनीमा नेपाली साझेदारतर्फका उपाध्यक्ष विजय श्रेष्ठका अनुसार, शेयर खरिद गर्ने तिब्बत सिभिएल एभिएसन डेभलभमेन्ट एण्ड इन्भेस्टमेन्ट कम्पनी लिमिटेड पूर्ण सरकारी स्वामित्वको कम्पनी हो । यसअघिको तिब्बत एयरलाइन्स भने अर्धसरकारी लगानीकर्ता कम्पनी थियो ।

‘शेयर किनबेचको सबै काम सकिसकेको छ,’ हिमालयसँग आबद्ध एक वरिष्ठ अधिकारीले भने, ‘केही थोरै कागजात मिलाउन र घोषणा गर्न मात्रै बाँकी छ ।’ उनका अनुसार, शेयर किनबेचको सबै काम नेपालको कानुन अनुसार, काठमाडौंमै भएको हो । ३ अर्ब रुपैयाँमा स्थापना भएको हिमालय एयरलाइन्समा भएको लगानीकर्ताको हेरफेरसँगै अब चिनियाँ लगानीकर्ता हाबी भएको छ ।

यसअघि भने नेपाली वायुसेवा कम्पनी यति एयर कम्पनी अर्न्तगतको यति वर्ल्ड इन्भेष्टमेन्टको शेयर बाहुल्यता थियो । यतिको हिमालयमा ५१ दशमलव ०१ प्रतिशत र तिब्बत एयरलाइन्सको ४८ दशमलव ९९ प्रतिशत शेयर हिस्सा थियो । ‘अबको शेयर किनबेचपछि यतिको ३५ प्रतिशत हाराहारी र बाँकी ६५ प्रतिशत हाराहारी शेयर तिब्बत सिभिएल एभिएसन डेभलभमेन्ट एण्ड इन्भेष्टमेन्ट कम्पनी लिमिटेडको हुनेछ । अर्थात् अब हिमालय एयरलायन्समा चिनियाँ लगानीकर्ता निर्णायक भूमिकामा रहने छ ।

हिमालयले ०७३ जेठदेखि काठमाडौंबाट दोहाकालागि (अन्तर्राष्ट्रिय) उडान थालेको थियो । तीन वर्षको अवधिमा यसले झन्डै ७ अर्ब हाराहारी घाटा ब्यहोरेको छ । ‘हिमालयको अघिल्लो आर्थिक वर्षसम्मको नोक्सान पौने ५ अर्ब हाराहारी पुगेको छ,’ हिमालय एयरलाइन्सका उपाध्यक्ष विजय श्रेष्ठले कान्तिपुरसँग भने, ‘भर्खर सकिएको आर्थिक वर्षको लेखा परीक्षण बाँकी छ । परीक्षणपछि ७ अर्ब हाराहारी घाटा पुग्ला ।’ हिमालयले हालसम्म २५ हजार उडान गरेर ६ लाख ५७ हजार यात्रुलाई सेवा दिइसकेको जनाएको छ ।

अध्यक्ष झो एन्योङका अनुसार, हिमालयले वार्षिक नेपाल सरकारलाई ३३ करोड हाराहारी कर तथा राजश्व बुझाउने गरेको छ ।

यसैबीच यस एयरलाइन्सले अक्टोबर महिनाको अत्यसम्म काठमाडौंदेखि चीनको राजधानी बेइजिङ सिधा उडान गर्ने प्रक्रिया अन्तिम चरणमा पुगेको जनाएको छ । ‘अनुमति प्रक्रिया करिब करिब टुंगिएको छ हाम्रो योजना काठमाडौं बेइजिङ सिधा उडान कार्त्तिक १० को लक्ष्य छ,’ हिमालयले सार्वजनिक गरेको नयाँ ब्रान्ड लोगो सार्वजनिक कार्यक्रममा एक वरिष्ठ कर्मचारीले भने ।

बेइजिङकालागि हिमालयले एयरबसको ए३१९ विमान ल्याउने तयारी गरेको छ । यो विमान उच्च हिमाली भेगबाट बनाइएको ट्रान्स हिमालयन रुटकालागि योग्य मानिन्छ । हाल यो कम्पनीसगँ तीनवटा एयरबसका ए ३२० विमान छन् ।
यी विमान ट्रान्स हिमालयन रुटबाट उडान गर्न पाउँदैनन् । काठमाडौं–बेइजिङ उडानको छोटो रुट सगरमाथा नाघेर तिब्बत हुँदै गर्नुपर्ने ट्रान्स हिमालय रुट नै हो । हाल उडानमा रहेका ए३२० जहाजले यो रुटबाट सिधा उडान गर्न नसकक्ने भएपछि घुमेर लामोबाटो समात्नुपर्छ । हाल सञ्चालनमा रहेका यी विमानबाट हिमालयले मध्यपूर्वी क्षेत्रको अबुदाबी, दमाम, दोहो तथा पूर्वी क्षेत्र अर्न्तगतको ढाका र क्वालालमपुरमा उडान गर्दै आएका छन् ।

हिमालयसँग भएका यी सबै विमान भाडाका हुन् । यी विमान चाइना डेभलपमेन्ट बैंकसँग १२ वर्षकालागि ड्राई लिजमा ल्याइएका हुन् । यो एयरलाइन्ससँग आफ्नै विमान भने छैनन् । हिमालयले ड्राई लिजमा ल्याएको अर्को विमान भियतनामको ब्याम्बो एयरलाई एक वर्षका लागि भाडामा दिएको छ ।

प्रकाशित : आश्विन १२, २०७६ २१:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×