नगरकोटका २५ होटललाई हरियो स्टिकर
काठमाडौँ — नगरकोट क्षेत्रका ४६ होटल, रेस्टुरामा गरेको अनुगमनमा खाद्य प्रविधि तथा गुण नियन्त्रण विभागले २५ वटालाई हरियो स्टिकर प्रदान गरेको छ । त्यसमा पनि क्लब हिमालय, मिस्टिक माउन्टेन र कन्ट्री भिल्ला उत्कृष्ट रहेको विभागले जनाएको छ ।
विभागले गरेको मूल्यांकनमा यी तीन होटलले ९० भन्दा माथि अंक प्राप्त गरेका छन् । शनिबार आयोजित कार्यक्रममा यी होटललाई विभागकी महानिर्देशक मतिना जोशी वैद्यले स्तरीकरण लोगो प्रदान गरिन् ।
पर्यटकीय स्थल नगरकोटका चाँगुनारायण र मन्डनदेउपुर नगरपालिकामा ‘खाद्य स्वच्छताका आधारमा होटल रेस्टुरेन्ट स्तरीकरण गर्नेसम्बन्धी निर्देशिका–०७४’ अनुसार ८० भन्दा माथि अंक प्राप्त गरी दुईतारेमा दुई होटल परेका छन् ।
६५ भन्दा माथि अंक प्राप्त गरी सन्तोषजनक अर्थात् एकतारेमा २० होटल र ५० भन्दा माथि अंक प्राप्त गरी सामान्यमा २१ वटा होटल रहेका विभागले जारी गरेको विज्ञप्तिमा उल्लेख छ । सामान्य होटलले सरसफाइ र खाद्य स्वस्थतामा सुधार गर्नुपर्ने विभागले सुझाएको छ ।
प्रकाशित : माघ ५, २०७६ २०:३१