दुप्चेश्वर मेलामा ५ करोडको कारोबार
नुवाकोट — जिल्लाको प्रसिद्ध दुप्चेश्वर मेलामा ५ करोड रुपैयाँको कारोबार भएको छ ।
धान्यपूर्णिमाको अवसरमा शनिबारदेखि बिहीबारसम्म लागेको मेलामा लत्ताकपडा, दैनिक उपभोग्य वस्तुहरु, खाद्यान्न, सांस्कृतिक भेषभुषा, पूजासामग्री लगायत खरिद बिक्रीबाट उक्त रकम बराबर कारोबार भएको दुप्चेश्वर क्षेत्र विकास कोषका अध्यक्ष किशोर आचार्यले बताए । मेलामा १ सय ३० स्टल थिए ।
दुप्चेश्वर महादेव मन्दिरमा डेढ लाख भक्तजनले मेला भरेको कोषले जनाएको छ । दुप्चेश्वर गाउँपालिका ६ मा रहेको उक्त महादेव मन्दिरमा वर्षेनि मेला लाग्छ । मेलामा सिन्धुपाल्चोक, रसुवा, धादिङ, चित्तवन, काठमाडौं, भक्तपुर, किर्तिपुर, काभ्रे, मकवानपुर, संखुवासभा, तनहुँ, गोरखा लगायत जिल्लाहरुबाट भक्तजनहरुको जम्मा हुन्छन् । मन्दिरमा चढाइएको भेटी १ लाख ५८ हजार र स्टलबाट २ लाख रुपैयाँ कोषलाई आम्दानी भएको छ ।
सबै धर्मका भक्तजनहरु भेला हुने उक्त मेलामा धामी–झाँक्रीहरुको नाच आकर्षण रहने गर्छ । दुप्चेश्वरमा भाकल गरे मनोकांक्षा पूरा हुने, सन्तान प्राप्ति हुने, बोल्न नसक्ने बालबालिका बोल्ने, वस्तुभाउ थारो नबस्ने जनविश्वास छ ।
प्रकाशित : मंसिर २८, २०७६ १३:३३