कान्तिपुर वेबसाईट
AdvertisementAdvertisement

१७ पालिकाहरुको ३ अर्ब अनुदान रोक्का

(मकवानपुर) — समयमै राजस्व बाँडफाँट नगर्ने स्थानीय तहलाई प्रदेश सरकारले दिने अनुदान रोक्का गरेको छ । आर्थिक वर्ष २०७५/०७६ मा आफ्नो तहमा संकलन भएको राजस्वको रकम प्रदेश सञ्चित कोषमा जम्मा नगर्ने पालिकाहरुविरुद्ध प्रदेश सरकार कठोर रूपमा प्रस्तुत भएको हो । 

प्रदेशले १७ वटा पालिकाको सबै किसिमको अनुदानको पहिलो किस्ताबापतको रकम हालसम्म निकासा दिएको छैन । उनीहरूले पालिकामा संकलन भएको दहत्तरबहत्तर, विज्ञापन, मनोरञ्जन करको विवरण र रकम अझै प्रदेश सञ्चित कोषमा जम्मा गरेका छैनन् ।

पटकपटक ताकेता गर्दा पनि पालिकाले राजस्व संकलनको विवरण एवं रकम प्रदेश सञ्चित कोषमा दाखिला गर्न अटेर गरेपछि आर्थिक मामिला तथा योजना मन्त्रालयले प्रदेश कोष तथा लेखा नियन्त्रण कार्यालयमार्फत ती पालिकामा चालु आर्थिक वर्षका लागि छुट्याइएको अनुदानको रकम पनि रोक्का गरेको हो ।

प्रदेशले पालिकालाई पहिलो किस्ताबापत कात्तिक मसान्तभित्रै निकासा गरिसक्नुपर्नेमा १७ वटा पालिकामा जानुपर्ने विभिन्न अनुदानबापतको २ अर्ब ९७ करोड ४४ लाख रुपैयाँ भुक्तानी रोकिएको प्रदेश लेखा नियन्त्रण कार्यालयका प्रमुख हरिप्रसाद उपाध्यायले जानकारी दिए । १७ वटामध्ये कतिपयले गत वर्ष प्रदेशबाट गएको ससर्त अनुदानबाट खर्च हुन नसकेको रकम पनि फिर्ता गरेका छैनन् ।

प्रदेश ३ मा रहेका ११९ पालिकामध्ये हालसम्म १०२ वटा पालिकामा १० अर्ब ७४ लाख ९७ हजार रुपैयाँ मात्र विभिन्न शीर्षकका अनुदान रकम निकासा गरिसकेको उपाध्यायले बताए । ‘हामीले धेरै ताकेता गर्दा पनि उनीहरूले विवरण बुझाएनन् । जसले गर्दा हामी पहिलो किस्ताको रकम रोक्न बाध्य भएका हौं । उक्त पालिकाहरूले राजस्वको विवरण पेस गरी प्रदेश सञ्चित कोषमा रकम जम्मा नगर्दासम्म र गत वर्षको ससर्त अनुदानबाट खर्च हुन नसकेको रकम फिर्ता नभएसम्म हामीले यो वर्षको कुनै पनि भुक्तानी दिँदैनौं,’ उनले ।

हालसम्म प्रदेश कोष तथा लेखा नियन्त्रण कार्यालयबाट कुल राजस्व संकलनको ५ दशमलव ८५ प्रतिशत रकम पालिकामा भुक्तानी गइसकेको छ । चालु आर्थिक २०७६/७७ मा प्रदेश ३ को सरकारले पालिकालाई समानीकरण अनुदानका लागि १ अर्ब २५ करोड रुपैयाँ, ससर्ततर्फको पहिचान भइसकेको आयोजनाका लागि ५८ करोड ८२ लाख ५६ हजार तथा पहिचान नभएका आयोजनाका लागि १ अर्ब २५ करोड रुपैयाँ अनुदान विनियोजन गरेको छ ।


त्यसैगरी समपूरक अनुदानका लागि प्रदेश सरकारले २ अर्ब ४० करोड रुपैयाँ छुट्याएको छ भने विशेष अनुदानका लागि ४० करोड रुपैयाँ छुट्याइएको आर्थिक मामिला तथा योजना मन्त्रालयले जनाएको छ ।

प्रकाशित : मंसिर २३, २०७६ १०:४१
प्रतिक्रिया
पठाउनुहोस्

महिला फुटबल फाइनल आज : ‘आइस ब्रेक’ को दाउमा नेपाल 

दीपक परियार

पोखरा — लिग चरणमा माल्दिभ्स विरुद्ध ह्याट्रिक गरेर अन्तर्राष्ट्रिय खेलमा सर्वाधिक गोलकर्ताको कीर्तिमान बनाएपछि स्ट्राइकर सावित्रा भण्डारीले दुई हत्केला पड्काउँदै हुंकार छाडेकी थिइन्, ‘अब भारतलाई देखाउने बेला आएको छ । उसलाई हाम्रै भूमिमा हराउँछौं ।’

माल्दिभ्सलाई ३–० ले हराउँदा नेपाली महिला फुटबलका प्रशिक्षक हरि खड्काले भनेका थिए, ‘सबै अवसर सदुपयोग गर्न सकेनौं । केही अवसर भारतसँगको खेललाई साँचेर राखेका छौं ।’ १३ औं सागको लिग चरणमै शनिबार भारतसँग नेपाल १–० ले पराजित भयो ।

पोखराको मैदानमा चार देश महिला फुटबलमा भिडे । श्रीलंका र माल्दिभ्सले एक खेल पनि जित्न नसकेपछि भारत र नेपाल लिग चरण सकिनुअगावै फाइनल पुगेका थिए । समूह विजेता र उपविजेता छुट्याउन शनिबार दुई देशबीच खेल भयो । खचाखच दर्शकबीच भएको खेललाई धेरै ‘प्रिभ्यू म्याच’ को रुपमा हेरे । आत्मविश्वासी देखिएको भारतले जित आफ्नो पक्षमा पार्‍यो । भारतसँग पराजित भएपछि कुनैबेलाका स्टार फुटबलर खड्काले भने, ‘अहिले पनि केही अवसर सदुपयोग गर्न सकिएन, अर्को खेलमा यस्तो गल्ती दोहोरिँदैन ।’

उनले टिम सम्हालेपछिको यो दोस्रो हार थियो । उनी आएपछि शनिबारको खेलसँगै नेपालले भारतसँग चारपल्ट खेल्यो । दुईमा नेपाल पराजित भयो । एकमा भारतलाई हरायो र एकमा बराबरी खेल्यो । भारतमा भएको हिरो महिला गोल्डकपमा भारतलाई २–१ ले हराउँदै नेपाल फाइनल पुगेर म्यान्मारसँग पराजित भएको थियो । त्यसअघि म्यानमारमा भएको ओलम्पिक छनोटमा नेपालले भारतसँग १–१ को बराबरी खेल्यो । गत साफ च्याम्पियनसिपमा घरेलु मैदानमै भारतसँग नेपालले पराजय ब्यहोर्‍यो । साफका ५ संस्करण भारतले जित्दा ४ पल्ट नेपाल फाइनल पुगेको छ । दक्षिण एसियाको महिला फुटबलमा भारत र नेपाल दुई ‘जायन्ट’ टिम हुन् ।

साग सुरुआतको ३२ वर्षे इतिहासमा नेपालले तेस्रोपल्ट महिला फुटबलमा सहभागिता जनाएको छ । बंगलादेशमा भएको ११ औं सागमा पहिलोपल्ट महिला फुटबल समावेश गरिएको थियो । १२ औं साग भारतको सिलोङ र गुहावटीमा भयो । दुवैपल्ट नेपाल र भारत फाइनलमा पुगे । दुवैपल्ट भारतले जित्यो । ढाकामा ३–१ ले भारतसँग पराजित भएको नेपालले सिलोङमा अन्तर कम गर्दै २–१ बनायो । फिफा बरियतामा भारत नेपालभन्दा झण्डै दोब्बरले अगाडि छ । भारत ५७ औं स्थानमा हुँदा नेपाल १ सयौं स्थानमा छ ।

शनिबारको खेलमा तुलनात्मक रुपमा भारतीय खेलाडी बढी आत्मविश्वासी देखिए । धेरै दबाबमा खेलेनन् । नेपालले खेल आफ्नो नियन्त्रणमा लिएपनि स्कोर गर्न सकेन । त्यसो त भारतको डिफेन्स, स्ट्राइकर, गोलकिपर सबै उत्तिकै बलिया छन् । नेपालको स्ट्राइकर केही फितलो भएको महसुस हुन्छ । सावित्रा दक्षिण एसियाकै स्टार स्ट्राइकर हुन् । तर उनको ‘सर्पोटिङ’ मा अर्को स्ट्राइकर नभएको देखिन्छ ।

फुटबल विश्लेषक आनन्द रञ्जित शनिबार नेपालले भारतसँग ६०/४० मा खेलेको बताउँछन् । खेल आफ्नो नियन्त्रणमा हुँदाहुँदै पनि गोल गर्न नसक्नु नेपालको कमजोरी रहेको उनले बताए । ‘भारतीय खेलाडी धेरै बचेर खेले, नेपाल केही आत्तिएको देखिन्थ्यो,’ उनले भने, ‘भारतले फाइनलका लागि साँचेको हुनसक्छ ।’

नेपालको खेल राम्रो रहेको र त्यहीं स्तरमा खेले फाइनलको नतिजा उल्टन सक्नेमा उनी ढुक्क छन् । ‘अघिल्लो खेलकै हिसावले खेल्ने र स्कोरमा ध्यान दिने हो भने नेपाल हाबी हुन सक्छ,’ उनी भन्छन्, ‘जितको सम्भावना ५०/५० कै छ ।’

नेपाली टिम भदौको तेस्रो साता कीर्गिस्तानमा भएको नादेझ्दा कपमा सहभागी भए । त्यसले प्रशिक्षणकै काम गर्‍यो । घरेलु मैदानलाई बुझ्ने अवसर नेपाली टिमले पाएनन् । निर्माण नसकिँदा खेल हुनुभन्दा २ दिन अघि मात्रै नेपाली खेलाडीले पोखराको मैदान टेके । सावित्रा र अनिता बस्नेत पछिल्लो भारतीय आईलिग विजेता सेथु क्लबमा खेलेका थिए । त्यतिबेला भारतीय खेलाडीलाई नजिकबाट नियाले । यसैको फाइदा उनीहरुले फाइनलमा लिन सक्नेछन् । बालादेवी लगायत बलिया स्ट्राइकर बोकेर भारत जितको शृंखला लम्ब्याउँने ध्याउन्नमा छ । निरु थापाको कप्तानीमा नेपाली टिमले भोरतो जितको शृंखलामा ‘आइस ब्रेक’ गरेर इतिहास रच्ने दाउँमा छ ।

भारतकी मुख्य प्रशिक्षक मेमोल रक्की फाइनलमा आफ्नो टिमले आक्रामक नै खेल्ने रणनीति अपनाउने बताउँछिन् । टिमका खेलाडी एकढिक्का हुनुलाई उनी भारतको बलियो पक्ष मान्छिन् । नेपालका प्रशिक्षण हरि खड्का भारतको कमजोरी पत्ता लगाएर त्यसैले खेल्ने तरखरमा छन् । सम्भवतः उनले सोमबारको खेलमा खेलाडी हेरफेर गर्नेछन् । उनी भन्छन्, ‘यसपल्ट अवसर खेर जान दिन्नौं ।’

प्रकाशित : मंसिर २३, २०७६ १०:३६
पूरा पढ्नुहोस्
प्रतिक्रिया
पठाउनुहोस्
×