उडान गन्तव्य थप्दै वायुसेवा निगम

निगमले मंसिरदेखि ग्वोञ्जाओ उडान गर्ने
रासस

काठमाडौँ — राष्ट्रिय ध्वजावाहक नेपाल वायु सेवा निगम (नेपाल एयरलाइन्स)ले मंसिरको अन्तिमदेखि चीनको ग्वोञ्जाओ उडान गर्ने तयारी गरेको छ । लामो समयको प्रयासपछि निगमले ग्वोञ्जाओ उडान अनुमति पाउने सुनिश्चित भएको संस्कृति, पर्यटन तथा नागरिक उड्डयन मन्त्रालयले जनाएको छ ।

मन्त्रालयको हवाई उद्योग व्यवस्थापन महाशाखाका अनुसार हालै चीन र नेपालबीच भएको हवाई सम्झौताको दौरानमा भएको दुई पक्षीय समझदारीअनुरुप निगमको ग्वोञ्जाओ उडान सुनिश्चित भएको हो ।

'निगमको जहाज ग्वोञ्जाओ उड्ने लगभग निश्चित भएको छ, सम्भवतः मंसिर महीनादेखि उडान शुरु हुनेछ,' मन्त्रालयका एक अधिकारीले भने । निगमको सेफ्टी अडिटपछि मात्रै उडान अनुमति दिने चिनियाँ पक्षको सर्त थियो । त्यसका लागि एक प्राविधिक टोली कात्तिक महिनाभित्रै आउने भनिएको थियो । तर चीनमा भएको हवाई सम्झौताका बेला चीनको नागरिक उड्डयन प्रशासन र नेपालका अधिकारीबीच छलफल भई आवश्यक कागजात आदान–प्रदान गरी उडान सञ्चालन गर्ने समझदारी बनेको थियो ।

सोही बमोजिम निगमले आन्तरिकरूपमा कागजात चिनियाँ सिभिल एभिएसनलाई पठाएको र सोही आधारमा ग्वोञ्जाओ उडानका लागि ‘स्लट’ पाउने बताइएको छ ।
यसैबीच निगमले चीनको राजधानी बेइजिङ र साङ्घाई उडानका लागि चिनियाँ नियामक निकायसँग पहल थालेको छ । निगमका प्रवक्ता गणेशबहादुर चन्दले बेइजिङ र सांङ्घाई उडानका लागि पहल भइरहेको जानकारी दिए । उनका अनुसार उक्त दुई गन्तव्यमा उडान सञ्चालन गर्ने प्रयोजनका लागि चिनियाँ प्राविधिक टोली डिसेम्बर महिनामा नेपाल आएर निगमको सेफ्टी अडिट गर्नेछ । तत्पश्चात् निगमले उडान अनुमति पाउने विश्वास लिइएको छ ।

नेपाल र चीनको संयुक्त लगानी रहेको हिमालय एयरलाइन्सले यही कात्तिक १० देखि चीनको राजधानी बेइजिङमा सिधा उडान शुरु गरिसकेको छ । हिमालयले चीनका अन्य थप पाँच गन्तव्यमा पनि उडान विस्तार गर्ने तयारी गरेको छ ।
पुसको दोस्रो सातादेखि जापानको नारिता उडान हुने

निगमले आगामी जनवरी महीना अर्थात पुसको दोस्रो सातादेखि जापानको राजधानी टोकियो नजीकको नारिता अन्तर्राष्ट्रिय विमानस्थलमा सिधा उडानको तयारी गरेको छ । उक्त गन्तव्यमा उडान सञ्चालनका लागि निगमले आन्तरिक तयारी पूरा गरेको जनाइएको छ ।

निगमले जापान सिभिल एभिएशनले मागेको आवश्यक कागजात बुझाइसकेको छ, तत्पश्चात् उडान अनुमति पाउनेछ । नेपाली समुदायको बाक्लो उपस्थिति तथा अन्य मुलुकबाट समेत पर्यटकलाई सहज हुने भएकाले नारिता उडानलाई निगमले विशेष प्राथमिकता दिएको छ । यो गन्तव्यमा निगमले वाइड बडी ए३३०–२०० जहाजमार्फत चार्टर्ड उडान गरिसकेको छ । नारितामा साताको तीन दिन उडान गर्ने गरी प्रक्रिया अगाडि बढाइएको निगमले उल्लेख गरेको छ ।

गत भदौ १२ देखि जापानकै ओसाका कन्साई अन्तर्राष्ट्रिय विमानस्थलमा सिधा उडान शुरु गरेको थियो तर यात्रुको ‘अकुपेन्सी’ बढ्न नसकेपछि निगमले पनि नारिता उडानका लागि पहल गर्दै आएको थियो । निगमले ओसाका गन्तव्यमा सातामा दुई दिन उडान भर्दै आएको छ ।

प्रकाशित : कार्तिक १८, २०७६ १३:०५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मन्त्रीको आस सडक खन्दा खेत लिलाम

मन्त्रीले बजेटको व्यवस्था गर्ने आश्वास दिएपछि खेत धितोमा राखेर बाटो खन्न जेसीभी लगाए, बाटोको उद्घाटन तिनै मन्त्रीले गरे, तर तमसुक बनाई धितो राखेर लिएको ऋण तिर्न सकेनन् । 
प्रताप रानामगर

(दमौली) — नजिकैको छिमेकी गाउँमा मोटर बाटो पुगेपछि तनहुँ भिमाद नगरपालिका–५ च्यानभन्ज्याङका ६८ वर्षीय लोकबहादुर थापाले पनि आफ्नो गाउँमा मोटर बाटो पुर्‍याउने अठोट लिए । तत्कालीन भूमिसुधार तथा व्यवस्थामन्त्री भीमप्रसाद गौतमसँग सडक खन्न बजेटको माग पनि गरे ।

पूर्ववडाध्यक्षसमेत रहेका थापाले मन्त्रीसँग टेलिफोनमा मोटर बाटोका विषयमा कुराकानी गरे । ‘मन्त्रीज्यू गाउँमा मोटर बाटो पुर्‍याउनुपर्‍यो,’ उनले भनेका थिए, ‘गाउँलेले चन्दा संकलन गरेको रकम सकियो ।’ ऋषिङपाटन माझचौतारादेखि बेसारे पहरोसम्म ट्र्याक खनेको तर बजेट नहुँदा च्यानभन्ज्याङ धारुङभन्ज्याङसम्म ट्र्याक खोल्न नसकिएको भन्दै मन्त्रीसँग बजेट मागिएको थियो । मन्त्री गौतमले टेलिफोनमै बजेट व्यवस्था गरिदिने आश्वासन दिए । सोहीअनुसार सडक खनियो । ‘बाटो खन्नुहोस्, बजेट व्यवस्था गर्ने जिम्मा मेरो भयो । भोलिबाटै काम गर्नुस् भन्नुभयो,’ थापाले सम्झिए, ‘आफ्नै जिल्लाका मन्त्रीले आश्वासन दिएपछि विश्वास लाग्यो ।’

मन्त्रीको आश्वासनपछि उनी भिमादका साहु देवबहादुर ज्वारचनकहाँ जेसीभी माग्न गएर भने, ‘साहुजी गाउँमा मोटर बाटो खन्न जेसीभी चाहियो । बाटो खनेको खर्च मन्त्रीज्यूले व्यवस्था गर्छु भन्नुभएको छ ।’ विश्वास नलागे बुधुवाफाँटको खेत धितो राख्ने थापाले ज्वारचनलाई वचन दिए । लोकबहादुरलाई साथ दिँदै स्थानीय नारद गैरेले पनि वान्टेङखोलाको ४ रोपनी खेत धितो राख्न तयार भए । लालपुर्जा धितो राखी तमसुक बनाएर मोटर बाटो खन्न जेसीभी लिएर दुवै जना गाउँमा पुगे । ऋषिङपाटनको माझचौतरादेखि बूढाकोट, च्यानभन्ज्याङ हुँदै धारुङभन्ज्याङसम्म साढे ६ किमि मोटर बाटोको ट्र्याक खुल्यो ।

उक्त मोटर बाटोको ०६८ चैत १६ मा तिनै मन्त्री गौतमले रिबन काटेर उद्घाटन गरे । त्यसक्रममा उनले भनेका थिए, ‘गाउँलेलाई साक्षी राखेर मोटर बाटो खन्दा लागेको १८ लाख रुपैयाँ मन्त्रिपरिषद् बैठकबाट पारित गरी बजेटको व्यवस्था गर्ने प्रतिबद्धता जनाउँछु ।’ तर उक्त प्रतिबद्धता जनाएको ७ वर्ष बितिसक्दा पनि एक रुपैयाँ बजेट आएन । ‘पटकपटक सिंहदरबार, मन्त्री निवास र पार्टी कार्यालयमा धाइयो,’ लोकबहादुरले भने, ‘तर जनताका अगाडि बोलेका कुरा पनि मन्त्रीज्यूले बिर्सेर हामीलाई धोका दिनुभयो ।’

मन्त्रीले हामीलाई धोका दिए पनि आफूले भने साहुलाई धोका नदिएको थापाले बताए । त्यसैले बुदुवाफाँटको ४ रोपनी नम्बरी खेत साहुलाई दिए । सडक खन्दा लागेको खर्चमध्ये साहुलाई ७ लाख ७० हजार रुपैयाँ तिर्न बाँकी भएपछि उनले उक्त खेत दिएका थिए । अहिलेसम्म खेत फिर्ता भएको छैन । बरु साहुले उक्त खेत अर्कैलाई लाखौं रुपैयाँमा बेचिदिएका छन् । लोकबहादुरसँगै नारद गैरेको अर्को ४ रोपनी खेत पनि धितो राखिएको थियो ।

ऋण तिर्न नसक्दा थापा र नारद गैरेको नाम किटान गरी ज्वारचनले जिल्ला अदालतमा मुद्दा दर्ता गरे । तमसुकको आधारमा दुवैको ८ रोपनी खेत ज्वारचनका नाममा हुने अदालतले फैसला गरिदियो । ‘गाउँको विकास गर्न जग्गा धितो राखेको हौं,’ थापाले भने, ‘मन्त्रीको आश्वासनका पछि लाग्दा जोगी बन्ने अवस्था आयो ।’ जग्गा फिर्ताका लागि सबैसँग हारगुहार मागे पनि कसैले नसुनेको उनले गुनासो गरे । सडकले गाउँवासी खुसी भए पनि अहिलेसम्म पुर्जा फिर्ता हुन नसक्दा भने दुःखी छन् ।

‘लोकबहादुर र नारदले गाउँलेका सुविधाका लागि यत्रो सहयोग गर्नुभएको हो तर अहिले समस्यामा पर्नुभयो,’ ऋषिङपाटन, बूढाकोट धारुङभन्ज्याङ मोटर बाटो उपभोक्ता समितिका अध्यक्ष रणबहादुर थापाले भने, ‘खेत धितो नराखेको भए गाउँमा गाडी गुड्ने थिएन । मोटर बाटोका कारण गर्भवती महिला तथा बिरामीले समयमा उपचार गर्न पाएका छन् । तर जग्गै लिलाम हुँदा भने दुःख लागेको छ ।’ सडक खन्दा करिब १८ लाख ऋण भएको थियो ।

तत्कालीन जिविसबाट २ लाख, गाविसबाट १ लाख र स्थानीयबाट चन्दा संकलन गरी ७ लाख ७५ हजार रुपैयाँमात्र संकलन भएको थियो । जेसीभीले सडक खन्दा ३ सय १८ घण्टा लागेको थियो । प्रतिघण्टा ५५ हजार रुपैयाँका दरले सडक खनिएको थियो ।

ज्वारचनलाई ऋण तिर्न एक वर्षअघि गाउँलेले करिब ८ लाख रुपैयाँ चन्दा संकलन गरेर राखेको भिमाद–५ का वडा सदस्य गणेश गैरेले बताए । ‘बाटो खनेको ऋण तिर्न गाउँलेले पैसा उठाएका छन्,’ उनले भने, ‘बाँकी ऋण तिरेर लालपुर्जा फिर्ता गर्न गाउँले चाहन्छन् ।’

तर थापा र गैरेले धितो राखेको खेत ज्वारचनले स्थानीय ध्रुव सुवेदीकी श्रीमती कल्पनालाई बेचेका छन् । पहिला ऋण तिरे जग्गा फिर्ता गर्छु भन्ने ज्वारचनले पछिल्लो समय ऋण तिर्न खोज्दा भेट्न नदिने र फोन गर्दा नउठाएको स्थानीयले बताए । कहिलेकाहीँ सम्पर्क गर्दा ध्रुव सुवेदीसँग कुरा गर्न पठाएर ज्वारचन पन्छिँदै आएको गैरेले बताए । सुवेदीले उक्त खेत आफूले ८० लाख रुपैयाँमा किनेको बताए । ज्वारचनलाई पटकपटक घरमा गएर भेट्न खोज्दा भेट हुन सकेन भने टेलिफोन सम्पर्क गर्दा पनि आउन चाहेनन् ।

प्रकाशित : कार्तिक १८, २०७६ १२:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT