एनआरएनएको चुनावमा किन भोटिङ मेसिनबाट मतदान हुन सकेन ?

'नामावली नदिँदा मेसिनबाट मतदान भएन’
विमल खतिवडा

काठमाडौँ — समयमै मतदाता नामावली उपलब्ध नगराउँदा गैरआवासीय नेपाली संघ (एनआरएनए) को चुनावमा भोटिङ मेसिनमार्फत मतदान गराउन नसकेको सञ्चालकहरूले बताएका छन् ।

मेसिनमा कुनै प्राविधिक खराबी नरहेको भोटिङ मेसिनका सञ्चालकहरू रामप्रसाद रिमाल र लक्ष्मण रिमालले विज्ञप्ति जारी गरी बताएका हुन् । मेसिनको त्रुटिभन्दा पनि गैरआवासीय नेपाली संघ (एनआरएनए) को अव्यस्थाका कारण मतदान गराउन नसकिएको उल्लेख छ । अन्तिम नामावलीको प्रमाणित प्रतिन्यूनतम ८ घण्टाअघि नै दिने भनिए पनि ३ घण्टा पनि समय नपाएको बताएका छन् ।
‘निर्वाचन समितिबाट आधिकारिक नाम पाउन सकेनौं, काम गर्ने समय पनि पर्याप्त भएन,’ विज्ञप्तिमा भनिएको छ, ‘उम्मेदवारको नाम तस्बिर राखी नसक्दै बाहिरको भीड थामी नसक्नु भयो, परीक्षणबिनै मतदान सुरु गर्नुपर्ने बाध्यताले मेसिनको बट्टामा नट कस्नसम्म भ्याएनौं ।’

मतदान सुरु गर्दा फोटो र नाममा समस्या देखिएको र उक्त समस्यालाई तुरुन्तै समाधान गरी सोही ठाउँमा देखाइसकिएको विज्ञप्तिमा उल्लेख गरिएको छ । ‘हामीले विकास गरी पचासौं निर्वाचन सम्पन्न गरेको भोटिङ मेसिनमा आजसम्म कुनै प्राविधिक खराबी नरहेको सबैमा जानकारी गराउन चाहन्छौं,’ विज्ञप्तिमा भनिएको छ, ‘यस घटनाले हामीलाई अझ अनुभवी बनाएको छ ।’

एनआरएनएको निर्वाचनमा विद्युतीय मेसिनबाट भोटिङ हुने भनिए पनि पहिलो भोटिङमै मेसिन बिग्रँदा मत पत्रका आधारमा मतदान गराइएको थियो ।

गैरआवासीयनेपाली संघमा पन्त

गैरआवासीय नेपाली संघ (एनआरएनए) को अध्यक्षमा कुमार पन्त निर्वाचित भएका छन् । प्रतिद्वन्द्वी कुल आचार्यलाई १४७ मतअन्तरले पराजित गर्दै पन्त विजयी भएका हुन् । उनले १२१७ मत ल्याए । आचार्यले १०७० मत प्राप्त गरेका थिए । चाबहिलस्थित होटल हयातमा सम्पन्न मतदानअनुसार चार उपाध्यक्षमा बद्री केसी, अर्जुनकुमार श्रेष्ठ, मन केसी र सोनाम लामा विजयी भएका छन् । त्यस्तै महिला उपाध्यक्षमा रविना थापा, महासचिवमा हेमराज शर्मा निर्वाचित भएका छन् ।

निर्वाचन समितिका सदस्य कुलप्रसाद पाण्डेका अनुसार सचिवमा गौरीराज जोशी, आरके शर्मा र कोषाध्यक्षमा महेशकुमार श्रेष्ठ निर्वाचित भएका छन् । सह-कोषाध्यक्षमा लोकप्रसाद दाहाल, महिला संयोजकमा भोमादेवी लिम्बु, युवा संयोजकमा हिमाल गुरुङ निर्वाचित भएका छन् । ४१ पदका लागि निर्वाचन भएको थियो । केही पदमा भने उम्मेदवारी नपरेको र केहीमा भने निर्विरोध निर्वाचित भए पनि अधिकांश पदमा निर्वाचन भएको थियो ।

बिहीबार भएको मतदानमा कुल २५७० मतदातामध्ये २३४४ मत खसेको थियो । जसमा सबैभन्दा बढी युरोपबाट ९२० मत खसेको थियो । अमेरिकाबाट २७१, अस्ट्रेलिया र न्युजिल्यान्डबाट २१५, एसियाबाट ४६२, मध्यपूर्वबाट ४६० र अफ्रिकाबाट १६ मत खसेको छ । राति अबेर मतगणना भएकाले समयमै परिणाम आउन ढिलाइ भएको थियो । मत पत्रको आधारमा मतदान गरिएकाले मतदान र मत गणनामा ढिलाइ भएको थियो ।

मंगलबार सुरु संघको नवौं विश्व सम्मेलन तथा अन्तर्राष्ट्रिय महाधिवेशन बिहीबार सकिने जनाइएको थियो । विद्युतीय भोटिङ मेसिनले काम नगर्दा समयमै मतदान हुन नसकेको संघले जनाएको छ ।

शुक्रबार मध्याह्न मत परिणाम सार्वजनिक हुनासाथ विजयी उम्मेदवारका आफन्त अविर, माला र खादा बोकेर होटलमा जम्मा भएका थिए । होटल परिसर बिहानैबाट पञ्चेबाजाले गुञ्जयमान बनेको थियो । विजयी भएकालाई मतदाता र आफन्तले अविर जात्रा गरेर काँधमा राखी विजयी नारा लगाएका थिए । अप्रिय घटना हुन नदिन होटल परिसरमा ठूलो संख्यामा नेपाल प्रहरी र ससशस्त्र प्रहरी परिचालन गरिएको थियो । एनआरएनए सम्मेलनको व्यवस्थापन पक्ष भने एकदम कमजोर देखिन्थ्यो । बिहान १० बजे गणना सकिए पनि १ बजे मात्र मत परिणाम सार्वजनिक गरिएको थियो ।

१२ बुँदे घोषणा जारी
गैरआवासीय नेपाली संघ (एनआरएनए) ले १२ बुँदे घोषणापत्र जारी गर्दै सम्मेलन सकिएको जनाएको छ । नेपालमा उपयुक्त वातावरण सिर्जना भएकाले जलविद्युत्, पर्यटन, बैंकिङ, स्वास्थ्य, शिक्षा, आधुनिक कृषि र सूचना तथा सञ्चार प्रविधिलगायत क्षेत्रहरूमा लगानी गर्न आह्वान गरेको छ ।

नेपालको संविधानमा व्यवस्था भएको गैरआवासीय नेपाली नागरिकता कार्यान्वयनको लागि ऐन निर्माणमा तदारूकताका साथ लागि पर्न सरकारलाई अनुरोध गरेको छ । ‘बाह्य लगानी आकर्षणमा प्रमुख बाधक रूपमा औंल्याइएको दोहोरो करको समस्यालाई सम्बोधन गरी लगानी आकर्षणको वातावरण बनाउन नेपालको कूटनीतिक नियोग रहेका र धेरै नेपालीको बसोवास रहेका मुलुकहरूसँग अविलम्ब दोहोरो कर उन्मुक्तिको सम्झौता, लगानी प्रवर्द्धन तथा संरक्षण सम्झौतालगायतका सम्झौता’ गर्न पनि अनुरोध गरेको छ ।

गैरआवासीय नेपाली संघ र अभियान एक गैरराजनीतिक चरित्रको भएको बताउँदै दलगत राजनीतिबाट टाढा राख्न राजनीतिक दल र विदेश स्थित भ्रातृ संगठनहरूलाई आह्वान पनि गरेको छ ।


प्रकाशित : कार्तिक २, २०७६ ०९:४७
प्रतिक्रिया
पठाउनुहोस्

विकृति रोक्न निःशुल्क सदस्यता र ई-भोटिङ : एनआरएनए नवनिर्वाचित अध्यक्ष  पन्त

कान्तिपुर संवाददाता

काठमाडौँ — गैरआवासीय नेपाली संघ (एनआरएनए) को अध्यक्षमा कुमार पन्त निर्वाचित भएका छन् । प्रतिद्वन्द्वी कुल आचार्यलाई १४७ मतअन्तरले पराजित गर्दै पन्त विजयी भएका हुन् ।

जितपछि उनले सबैलाई एकतावद्ध भएर लाग्न अनुरोध गरे ।

जित पछि के भने ? उनकै भनाइमा -
गैरआवासीय नेपाली अभियानमा कसैको पनि हारजित हुँदैन । सबैले जित्छौं । कोही पनि संस्था बाहिर रहने छैन । सबैलाई एकताबद्ध बनाएर लग्ने प्रण गर्दछु ।

नेपालले हामीबाट ठूलो अपेक्षा र आशा राखेको राम्रोसँग महसुस गरेको छु । हामीले भर्खरै मात्र नेपाल सरकारसँग कम्तीमा पनि १० अर्ब बराबरको लगानी ल्याउँछौं भनेका छौं । यसको निम्ति म प्रतिबद्ध छु । भोलिबाटै यो रकम ल्याउने काममा लाग्नेछु । मैले ८० लाख गैरआवासीय नेपालीको साझा संस्थाका रूपमा विकसित गर्न चाहेको छु ।

हाम्रो संस्थाभित्र केही विकृतिहरू भित्रिएका छन् । संस्थालाई जबर्जस्ती राजनीतिकरण गर्न खोजिएको छ । जुन होटलमा बसेर हामी सम्मेलन गर्दै थियौं, त्यहाँ कोठामा कोठामा राजनीतिक दलका नेताहरूले चाहार्ने र भोट माग्ने काम गरे । यो संस्था कुनै राजनीतिक दलको भ्रातृ संस्था पो हुने हो कि भन्ने डर छ । अर्को संस्थामा व्यापक आर्थिक विकृतिहरू भित्रिएका छन् ।

चुनावमा आर्थिक चलखेल गर्ने, आर्थिक प्रलोभन देखाएर भोट प्रभावित पार्ने कुरा आइरहेका छन् । यस्ता कुराहरूको निराकरण र अन्त्यका लागि निःशुल्क सदस्यताको व्यवस्था गरिनेछ । यसो गर्नसाथ पैसाको लगानी कसैले पनि गर्नुपर्ने छैन । जो चर्चित र योग्य छ, उसैलाई संसारभरका गैरआवासीय नेपालीले निर्वाचित गराउनेछन् ।

अहिले प्रविधिको जमानामा पनि काठमाडौंमा भेला भएर, लाइन लागेर भोट गर्नुपर्ने अवस्था छ । हजारौं रुपैयाँ खर्च हुन्छ । अब घरघरमै बसेर ई-भोटिङ गर्ने व्यवस्थाको विकास गर्नेछु । नयाँ नेतृत्व छान्न काठमाडौंमा आइरहनुपर्ने छैन ।

प्रकाशित : कार्तिक २, २०७६ ०९:४२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×