एनआरएनए निर्वाचन : भव्य भन्दाभन्दै भद्रगोल 

मतगणनास्थल असाध्यै अव्यस्थित देखिन्थ्यो । उम्मेदवारहरू आफू निकट दलका कार्यकर्ताहरूको आडमा चुनावी प्रचारप्रसार गर्न बढी सक्रिय देखिन्थे । सञ्चारकर्मीलाई मतदानस्थलमा जान दिइएको थिएन । सूचना दिने छुट्टै सञ्चार डेस्क पनि राखिएको थिएन । मतदाता आफैं मतदान हुने/नहुनेबारे समेत सुरुमा अन्योल देखिन्थे । होटलमा विभिन्न पार्टीका नेता कार्यकर्ताको बाक्लो उपस्थिति थियो । कतिपय उमेदवारहरूले मोडलहरू ल्याएर आफ्नो प्रचारप्रसार गराएका थिए ।

पार्टी कार्यकर्ता आफू निकट उम्मेदवारको फोटोसहितको प्लेकार्ड झुन्डाएर हिँड्दा एनआरएन नै भनेर झुक्किने धेरै थिए । सम्मेलनमा आएकाहरूले बुधबार राति निर्वाचन नगराएको भन्दै होटलका केही फर्निचर तोडफोड गरेका थिए । अप्रिय घटना र हूल दंगा हुन नदिन बाक्लो संख्यामा सुरक्षाकर्मी परिचालन गरिएको थियो । निर्धारित समयमै निर्वाचन नहुँदा केही मतदाता भने मतदान नै नगरी फर्किएका छन् । करिब तीन सय जना प्रतिनिधिले मतदानमा सहभागिता नै जनाएनन् ।

मतदानस्थलमा जम्मा भएका एनआरएनएहरू सम्मेलनमा सहभागी हुनभन्दा फोटो खिच्नमै तल्लीन देखिन्थे । उनीहरू मत माग्नुभन्दा फोटो खिच्नमै व्यस्त देखिन्थे । केही मतदाताले चुनावको बारेमा समेत थाहा नभएको सुनाउँदै थिए ।

केहीले स्याउमा आफ्नो नाम र फोटोसहितको स्टिर टाँसेर बाँडिरहेका थिए । केहीले पानीको बोतलमा फोटो राखेर चुनावको प्रचार गरेका थिए । कोही भने पञ्चेबाजा र मादल बजाउँदै भोट माग्न व्यस्त देखिन्थे ।

आयोजक एनआरएनएका महासचिव बद्री केसीले विद्युतीय भोटिङ मेसिनले गर्दा सम्मेलन भद्रगोल भएको बताए । ‘केही भद्रगोल भएको छ तर सम्हाल्नै नसक्ने भएको होइन,’ उनले भने, ‘भोटिङ मेसिन नचल्दा तालिकाअनुसार अगाडि बढ्न सकिएन, कार्यक्रम पछि धकेलिएको हो, यसअघिको चुनावमा प्रयोग गरिएको राम लक्ष्मण भोटिङ मेसिन नचल्दा समस्या भएको हो ।’