कर्णालीवासीलाई दसैंमा जहाजको चिन्ता

मधु शाही

बाँके — दसैंमा घर जाने आशमा रहेका डोल्पाका प्रेम बुढा दिनहुँ यहाँस्थित विभिन्न विमानस्थलका कार्यालय धाउँछन्  । टिकट नपाएपछि यसपालिको दसैं परिवारसँग मनाउन पाउने हो/होइन भन्ने कुराले उनलाई पिरोलेको छ  ।

गत आइतबार आफूसहित चारजनाको टिकट बोकेर यहाँस्थित वायु सेवा निगमको कार्यालयमा पुगेका थिए । १० दिनअघि काटेको टिकट देखाउँदै उनले भने, ‘निगमको जहाज औंशीपूर्णे पारेर आउँछ । त्यो पनि उड्ने हो कि होइन, भगवान् भरोसा बस्नुपर्छ ।’

डोल्पा र सिमिकोटसम्म सडक नपुगेकाले दुर्गमका बासिन्दा महँगो टिकट काटेर जहाज चढ्न बाध्य छन् । कहिले खराब मौसमका कारण रद्द हुनु, समयमै नउड्नु, टिकट नपाउनु र व्यवस्थित उडान नहुँदा यात्रुले कष्ट भोग्नु परेको छ ।

दुर्गम क्षेत्रका जनताका लागि आशाको केन्द्र रहेको नेपाल वायु सेवा निगमले समेत आफ्नो नियमित उडान गर्न नसक्दा दसैंको मुखमा यात्रुले दुःख पाएका हुन् । निगमका स्टेसन म्यानेजर शंकरबहादुर केसीले विद्यार्थी र जागिरेहरू गन्तव्यमा पुग्न नसक्दा झगडा नै गर्ने गरेको सुनाए । उनीहरूलाई फ्लाइट रद्द हुनाको कारण सम्झाउन हम्मेहम्मे परेको पनि उनले बताए ।

निगमको जहाजले सातामा दुईपटक उडान भर्ने भए पनि प्रायः उडान रद्द हुने गरेको छ । काठमाडौंको एयर ट्राफिक, मौसम र रुकुम, नेपालगन्ज र दुर्गम क्षेत्रको मौसम हेर्दा हेर्दै जहाज रद्द हुने गरेको छ ।

कार्यालयको अभिलेखअनुसार ०७६ साउन महिनाभरि दुवैतर्फ गरी ६४ उडानको कार्यक्रम रहे पनि जम्मा ३२ पटक मात्रै उडान सफल भएको छ । इन्जिनियरिङ बेस बनाउने र थप जनशक्ति व्यवस्थापन गरी निगमको एउटा जहाजलाई नेपालगन्जमा राख्ने हो भने समस्या समाधान हुन सक्ने निगमका क्षेत्रीय कार्यालय प्रमुख प्रशान्तकुमार विकले बताए ।

उनका अनुसार काठमाडौं–नेपालगन्ज–काठमाडौं सेक्टरमा हप्तामा बुधबार र शनिबार गरी दुईपटक एमए–६० जहाज आउने जाने गर्छ । दसैं र तिहारमा यात्रुको चाप बढेकाले यो पर्याप्त छैन । हप्तामा तीनपटक उडान भएमा यात्रुलाई राहत हुने उनले बताए । एमए–६० (एकेक्यू) ग्राउन्डेड भएको र मर्मतसम्भार भइरहेकाले निजी विमान सेवा कम्पनीले मनपरी भाडा असुल्ने गरेको पाइएको छ, जसबाट यात्रुलाई सास्ती खेप्नुपरेको छ । एमए–६० (एकेक्यू) लाई दसैं लक्षित गरी उडाउन सकियो भने सहज हुनेछ ।

अनुकूल मौसमका कारण अहिले पूर्वतर्फ (लुक्ला) आन्तरिक तथा बाह्य पर्यटकको घुइँचो छ । निजी वायुसेवाहरू बढी नाफामुखी हुने भएकाले त्यतातर्फ आकर्षित भएकाले सडक नपुगेका डोल्पा र सिमीकोटका जनताले भने सास्ती खेप्नुपरेको छ । यहाँबाट तारा, सीता र समिट एयरलाइन्सले आफ्ना अधिकांश उडान पूर्वतर्फ केन्द्रित गरेको नागरिक उड्डयन प्राधिकरण नेपालगन्जका निमित्त प्रमुख योगेन्द्रनाथ कुँवरले बताए । यात्रुहरू जसरी भए पनि काठमाडौंबाट नेपालगन्ज आउने तर यहाँबाट आफ्नो थातथलोमा जान भने धौ–धौ परेको छ ।

काठमाडौंबाट नेपालगन्ज आउने यात्रुको चाप बढेसँगै निजी विमान सेवा कम्पनीले उडान थप गर्नुको सट्टा निगमको भन्दा दुई गुणा बढी भाडा लिने गरेका छन् । बुद्ध एयरले दैनिक तीन उडान गर्दै आएको छ । ‘दसैंमा वन वे प्रेसर हुन्छ,’ स्टेसन म्यानेजर विनित शाहले भने, ‘त्यसैले बाध्यताले भाडादरमा वृद्धि गर्नुपरेको छ ।’

प्रकाशित : आश्विन १८, २०७६ ०९:२३
प्रतिक्रिया
पठाउनुहोस्

सेक्युरिटी मजदुरलाई दिइएन चाडपर्व खर्च

कान्तिपुर संवाददाता

मोरङ — विराटनगरस्थित लायन्स सेक्युरिटी सर्भिस कम्पनीमा कार्यरत ३२ जना सुरक्षा मजदुर चाडपर्व खर्चबाट वञ्चित भएका छन्  । उक्त कम्पनीले श्रम ऐनले तोकेअनुसारको सेवा सुविधासमेत नदिएको मजदुरहरूले गुनासो गरेका छन्  ।

कम्पनीअन्तर्गत कार्यरत मजदुरहरूलाई सरकारले तोकेको न्यूनतम पारिश्रमिक १३ हजार ४ सय ५० रुपैयाँसमेत नदिने गरेको उनीहरूको भनाइ छ ।

कम्पनीमा कार्यरत सुरक्षा मजदुर प्रमोद निरौलाले आफूहरूलाई मासिक ११ हजार मात्रै पारिश्रमिक दिँदै आएको गुनासो पोखे । ‘कम्पनीलाई पटकपटक लिखित र मौखिक रूपमा श्रम ऐनले तोकेको न्यूनतम पारिश्रमिक उपलब्ध गराइदिन आग्रहगर्दा समेत बेवास्ता गरिएको छ,’ उनले भने, ‘श्रम ऐनअनुसार पाइने ८ हजार ४ सय ५५ रुपैयाँ चाडपर्व खर्चसमेत दिन मानेको छैन ।’

चाडपर्व खर्चका लागि आवाज उठाउनेहरूलाई बोलाएर कम्पनीले १ हजारदेखि २ हजारसम्म दिएर फकाउन खोजेको निरौलाले गुनासो पोखे । उक्त कम्पनीअन्तर्गत आन्तरिक राजस्व कार्यालय विराटनगरमा ४, मल्टिफ्युल पावर हाउस रानीमा ३, स्वस्तिक प्याकेजिङ हात्तीमुढामा ८, दुगड हेड अफिस विराटनगरमा ५, दुगड जुट प्रेस रानीमा ४, वाग्मती प्लास्टिक रानीमा ८ जना कार्यरत छन् ।

लायन्सका सञ्चालक निर्भय पाण्डेले आफूले श्रेम ऐनले तोकेअनुसारको सेवा सुविधा उपलब्ध गराइरहेको दाबी गरे । उनले चाडपर्व खर्च अब १/२ दिनमा उपलब्ध गराउने बताए । यस्तै गोल्डेन सेक्युरिटी सर्भिस प्रालि इटहरीले पनि सुरक्षा मजदुरहरूलाई न्यूनतम पारिश्रमिक र चाडपर्व खर्च दिने गरेको छैन । उक्त कम्पनीमा कार्यरत शिवनारायण चौधरीले आफूहरूलाई भदौबाट ९ हजारमा ७ सय थपेर मात्रै पारिश्रमिक उपलब्ध गराउँदै आएको गुनासो पोखे । चाडपर्व खर्च दिन ठाडै अस्विकार गरेको उनले सुनाए ।

सुरक्षा मजदुरहरूले विज्ञप्ति जारी गरी श्रम ऐनले तोकेका सेवा सुविधा तत्काल उपलब्ध गराउन माग गरेका छन् । उनीहरूले ऐनअनुसारको सेवा सुविधा उपलब्ध नगराए कानुनी कारबाहीका लागि श्रम कार्यालय विराटनगरमा उजुरी दिने बताए ।

श्रम कार्यालय विराटनगरका प्रमुख प्रेमप्रसाद सञ्जेलले सेक्युरिटी कम्पनीलगायत जुनसुकै क्षेत्रमा कार्यरत मजदुरलाई श्रेम ऐनले तोकेको सेवा सुविधा उपलब्ध नगराएको उजुरी आए तत्काल कारबाहीको दायरामा ल्याउने बताए । उनले मजदुर श्रम मारेर खाने कम्पनी तथा संस्थाहरूको लाइसेन्स खारेज गरी बैंक खातालगायत सम्पूर्ण चलअचल सम्पत्ति रोक्का गरी असुलउपर गराउने प्रतिबद्धता जनाए ।

सञ्जेलले आरती स्ट्रिप्स प्रालि बूढीगंगा–१ ले तीनजना मजदुरलाई खाइपाई आएको सेवा सुविधामा घटाएर श्रम ऐनले तोकेअनुसारको सुविधा मात्रै दिएको उजुरी आएको बताए ।

प्रकाशित : आश्विन १८, २०७६ ०९:२३
पूरा पढ्नुहोस्
प्रतिक्रिया
पठाउनुहोस्