सञ्चालनमा आएन तरकारी बजार

जितेन्द्र साह

(मोरङ) — कटहरी गाउँपालिका–१ जमटोकी टोलस्थित फलफूल तथा तरकारी थोक बजार अझै सञ्चालनमा आएको छैन । गत चैतमा प्रधानमन्त्री केपी शर्मा ओलीले थोक बजार प्रदेश १ सरकारलाई हस्तान्तरण गरेका थिए । कृषि तथा पशुपन्छी विकास मन्त्रालयअन्तर्गतको तत्कालीन व्यावसायिक कृषि तथा व्यापार आयोजनाले जनप्रिय माध्यमिक विद्यालय कटहरीको ४ बिघा २ कट्ठा २ धुर र १८ कट्ठा ऐलानी जग्गालाई ५० वर्षका लागि भाडामा लिई करिब १६ करोड रुपैयाँमा बजार निर्माण गरेको हो ।

यसको आम्दानी बजार समिति, विराटनगर महानगरपालिका, कटहरी गाउँपालिका र विद्यालयले बाँडफाँट गर्ने सम्झौता उल्लेख छ । बजारबाट बर्षेनि ४४ हजार ९ सय ६६ दशमलव ३ टन तरकारी र ८ हजार ७ सय ३ दशमलव ३ टन फलफूल बिक्री हुने अनुमान प्रदेश १ सरकारले गरेको छ । पूर्वाधारबिनै निर्माण भएका आयोजनाको अवस्थाबारे सरोकारवालाले चिन्ता जनाएका छन् । ‘भारत र पहाडबाट टनका टन तरकारी लिएर आउने गाडीलाई बजार वरिपरिको पुल र सडकले थेग्दैन,’ स्थानीय कृषक पवन सहनीले भने, ‘पहिला मजबुत पूर्वाधार बनाउनुपर्थ्यो, त्यसपछि खोलाको किनारभन्दा माथि जग राखेर बजार बनाएको भए हुन्थ्यो ।’

एक वर्षभित्र काम सक्ने गरी विश्व बैंकको ऋण तथा अनुदानमा २०७३ को माघदेखि यो आयोजनामा काम सुरु भएको थियो । ७० प्रतिशत निर्माण सकेपछि बाढीले क्षति पुर्‍याउँदा पुनर्निर्माणमा थप समय लागेको थियो । प्रदेश १ सरकारले बजार सञ्चालन कार्यविधि बनाएर यो बजार सञ्चालनमा ल्याउने भन्दै आए पनि तरकारीका थोक व्यवसायी यहाँ आउन मानेका छैनन् । विराटनगर महानगर–पालिका कार्यालयले सहरको मध्य भागमा रहेको सबैभन्दा पुरानो तरकारी मन्डी गुद्री हाटलाई यो नवनिर्मित भवनमा सार्ने बताएको छ । ‘७ टन तरकारी बोकेर आउने १४/१८ चक्के गाडीलाई पुलले धान्न सक्दैन,’ गुद्रीका थोक तरकारी बिक्रेता पशुपति भगतले भने । उनी गुद्री बजार व्यवस्थापन समितिका सल्लाहकार पनि हुन् ।

बाढीमा सिंघिया खोला किनारको पानी सोझै उक्त तरकारी बजारमा प्रवेश गर्ने हुनाले जोखिम मोलेर व्यापार गर्न नसकिने उनले बताए । समितिका अनुसार गुद्रीमा भारत र नेपालको विभिन्न थलोबाट दैनिक १५० टन तरकारी आउँछ । यहाँ तरकारीको २० वटा थोक मन्डी छन् । नियमित लाग्ने गुद्री हाटसमेत आइतबारदेखि शनिबारसम्म लाग्ने साप्ताहिक हाटबजारहरूमा झन्डै ३५० ख्द्रुा तरकारी व्यवसायी आउँछन् ।

प्रदेश १ भूमि व्यवस्था, कृषि तथा सहकारी मन्त्रालयका प्रवक्ता राजेन्द्र उप्रेतीले तरकारी बजार सञ्चालनको विधि पारित भइसकेको र सञ्चालनका लागि छुट्टै समितिसमेत गठन भएकाले एक–डेढ महिनामा सञ्चालनमा आउने दाबी गरे । कटहरी फलफूल तथा तरकारी थोक बजार समितिका कार्यकारी निर्देशकसमेत रहेका पशुपति पोखरेलले वरिपरिको बाटो र कमजोर पुल बाधाका रूपमा रहेको स्विकारे । उनी उक्त मन्त्रालयकै योजना तथा अनुगमन महाशाखाका प्रमुख पनि हुन् । ‘अहिलेलाई तरकारी बोकेर आउने ठूला गाडी ओहोरदोहोर गर्ने खालको पुल र बाटो छैन, सरकारले बनाउनैपर्छ,’ पोखरेलले भने, ‘यो सब नभई अघि बढ्न व्यावहारिक कठिनाइ छ ।’

संघीय एवं प्रदेश सरकारले गुद्री हाटका तरकारी व्यवसायीलाई सार्न खोजे पनि नसकेपछि महानगरपालिका कार्यालयलाई सहयोगका लागि गुहारेको स्रोतले जनाएको छ । महानगरपालिका कार्यालयका प्रवक्ता राजेन्द्र प्रधानले सबैभन्दा प्रत्यक्ष सरोकारवाला थोक तरकारी व्यवसायी एवं कृषकसँग परामर्श गरेर अघि बढ्ने निर्णय भएको बताए ।

प्रकाशित : आश्विन ४, २०७६ ०९:४८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

साँघुरा पुल विस्थापन गर्न टेन्डर

विमल खतिवडा

काठमाडौँ — स्तरोन्नति गरेर सञ्चालनमा आएको लामो समयपछि नारायणगढ–मुग्लिन सडक खण्डमा पुल निर्माणका लागि टेन्डर आह्वान गरिएको छ । सडक सञ्चालनमा आएको १६ महिनापछि साँघुरा पुल विस्थापन गरेर नयाँ बनाउन लागिएको हो । दुई लेनको सडक बने पनि साँघुरा पुलले दैनिक समस्या हुँदै आएको थियो । 

सडक विभागअन्तर्गत पुल महाशाखाका अनुसार पुल डबल लेनमा निर्माण गर्ने गरी टेन्डर आह्वान गरिएको हो । ‘पुल निर्माणका लागि टेन्डर आह्वान गरेका छौं,’ पुल महाशाखाका प्रमुख दीपक भट्टराईले भने, ‘नयाँ बन्ने पुलको स्ट्यान्डर डबल लेनको हुनेछ ।’ उनका अनुसार नयाँ बन्ने पुल फुटपाथसहित ११ मिटर चौडा हुनेछन् । अप्ठेरो भीरमा रहेका पुल भने ९ मिटरका हुनेछन । ‘१४ पुल प्रतिस्थापन र एउटा नयाँ थप्नेछौं,’ उनले भने, ‘सेतीदोभानमा घुम्ती भएकाले सडकलाई सिधा बनाउने गरी नयाँ पुल थप्नेछौं ।’ टेन्डरको समय ३५ दिनसम्म हुनेछ ।

सबैको एउटै ठेक्का भए पनि दुईवटा प्याकेजमा काम हुनेछ । ‘अहिले भइरहेका साँघुरा पुल ६ मिटर चौडा छन्,’ उनले भने, ‘ठेक्का सम्झौता भएपछि डिजाइन र निर्माण सक्ने गरी ३३ महिनाको समय दिनेछौं ।’ दुइवटा प्याकेजमध्ये एउटामा ७ र अर्कोमा ८ वटा पुलको ठेक्का हुनेछ । सरकारले गत साउनमा उक्त सडक खण्डमा पुल निर्माणका लागि बाटो खुला गरिदिएको थियो । डबल लेनमा पुल बनाउन अत्यावश्यक देखिएको भन्दै डिजाइन र निर्माणसम्बन्धी काम ठेक्काबाट गर्ने गरी बोलपत्र आह्वान गर्न मन्त्रिपरिषद् निर्णयबाट स्वीकृति दिएसँगै निर्माणका लागि बाटो खुलेको थियो ।

कानुनमा डिजाइन एन्ड बिल्डको सम्बन्धमा स्पष्ट उल्लेख नभएको भन्दै सडक विभागअन्तर्गत पुल महाशाखाले मन्त्रिपरिषद्मा निर्णय गरिदिन माग गर्दै पत्र पठाएको थियो । यो खण्डमा १८ वटा पुल छन् । जसमध्ये ३ वटा पुलको निर्माण सकिइसकेको छ । एउटा निर्माणको क्रममा छ । सडक खण्डको मौरी, खानी र दासढुंगाको पुल निर्माण सकेर सञ्चालनमा आइसकेका छन् । जलवीरे खण्डमा निर्माणकै क्रममा छ । ‘अन्य तीनवटा पुलको निर्माण सकिएर सञ्चालनमा आइसकेका छन्,’ नारायणगढ–मुग्लिन सडक आयोजनाका इन्जिनियर शिव खनालले भने, ‘जलवीरे पुलमा वर्षात् लागेपछि काम हुन सकेको छैन तर निर्माणको काम यही आर्थिक वर्षभित्र सकिनेछ ।’

यो खण्ड भएर दैनिक करिब १० हजार सवारी साधन ओहोरदोहोर गर्छन् । भौगोलिक विकटताले गर्दा पुलको सर्भे गर्न समस्या हुँदा चाइनिज विज्ञ टोली आएर पुल निर्माण गर्ने ठाउँको स्थलगत अवलोकन गरेको थियो । विज्ञ टोलीले पुल निर्माण गर्ने ठाउँ हेरेर त्यहीअनुसार डकुमेन्ट तयार पारेको थियो । यो सडक काठमाडौं जोड्ने लाइफ लाइनका रूपमा परिचित छ ।

प्रकाशित : आश्विन ४, २०७६ ०९:४७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×