खुदी जलविद्युत्‌मा फेरि बाढी पस्यो

आश गुरुङ

(लमजुङ) — मर्स्याङ्दी गाउँपालिका–९ सिम्पानीस्थित ४ मेगावाटको खुदी जलविद्युत् केन्द्रमा फेरि बाढी पसेको छ । यसअघि भदौ २४ गते विद्युत्गृहमा बाढी पसेको थियो ।


राम्रोसँग छेकबार नगर्दा लेते खोल्सीमा आएको बाढी विद्युत् गृहभित्र पुन: पसेको हो । बाढी पसेपछि सरसफाइ थालेकामा पुन: बाढी पसेको जलविद्युत् केन्द्रले जनाएको छ ।


जलविद्युत् केन्द्रमा कार्यरत १५ जनाभन्दा बढीले सरसफाइ गरिरहेका थिए । ‘सरसफाइ गरिरहेका थियौं । अब बाढी आउँदैन होला जस्तो लाग्यो । पर्खाल पनि लगाएका थियौं,’ केन्द्रका इन्चार्ज रमेश घिमिरेले भने । उनका अनुसार फेरि बाढी पसेपछि फेरि सरसफाइ थालिएको छ । विद्युत्गृहभित्र आइतबार साँझ बाढी पसेको र त्यसपछि निरन्तर सरसफाइ गरिरहेको उनले बताए । ‘हामी सरसफाइ मात्रै गर्न सक्छौं । मेसिनभित्र के भएको हो भन्ने थाहा पाउन र यसको मर्मतका लागि इन्जिनियरहरू नै आउनुपर्छ । बुटवल पावर कम्पनीबाट इन्जिनियरहरूलाई बोलाएका छौं,’ उनले भने । उनका अनुसार विद्युत्गृहमा रहेको जेनेरेटर, टर्बाइनलगायत विद्युत् उत्पादन गर्ने मेसिनरी सामग्रीको भित्र पानी पसेको छ । मर्मत नगरी उक्त मेसिनरी सामान सञ्चालन गर्न मिल्दैन ।


यसअघि पनि पटकपटक बाढीको चपेटामा पर्दै आएको खुदी जलविद्युत् केन्द्र यस वर्ष एक साताको अवधिमै दुईपटक बाढीको चपेटामा परेको हो । केन्द्रका सुपरभाइजर दीपक भण्डारीका अनुसार यसपटक लेते खोल्सीको पानी ब्लक हुँदा विद्युत्गृहतर्फ बाढी मोडिएको र भित्र पसेको हो । जलविद्युत्मा बाढी पस्दा कति क्षति भयो भन्ने यकिन विवरण अझै भन्न नसकिने उनले बताए ।


जलविद्युत् केन्द्रले बर्खायाममा दैनिक (२४ घण्टा) १ लाख युनिट विद्युत् उत्पादन गर्दै आएको छ । बर्खायाममा प्रतियुनिट ४ रुपैयाँमा पीपीए (विद्युत् खरिद–बिक्री सम्झौता) गरिएको उक्त आयोजना १ दिन बन्द हुँदा मात्रै ४ लाख घाटा पर्छ । यसअघि २०६५ मा खुदीखोलाको बाढी विद्युत्गृहमा पस्दा ५ महिना विद्युत् उत्पादन बन्द भएको थियो । ठेकेदार कम्पनीका एकजनालाई समेत बगाएको थियो ।


झन्डै ६० करोड रुपौयाको लागतमा निर्माण भएको खुदी जलविद्युत आयोजना २०६३ पुस १५ गते देखि सञ्चालनमा आएको हो । आयोजनामा बुटवल पावर कम्पनी (बीपीसी) को ६०, एचसीटीएचआई क्यानडाको २५ र लमजुङ विद्युत् विकास कम्पनी (लेडको) को १५ प्रतिशत लगानी छ ।


प्रकाशित : आश्विन २, २०७६ ०९:१४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

जोखिमपूर्ण बेंसीसहर-चामे सडक

आश गुरुङ

चामे — हिमाली जिल्ला मनाङ पुग्न पछिल्लो समय म्यार्दीभीरको पहिरो बाधक बनेको छ । बेंसीसहर-चामे सडक खण्डको लमजुङ-मनाङ सीमा नजिकै मनाङतर्फको म्यार्दीभीरमा दिनहुँ पहिरोले यात्रुलाई असहज बनाएको छ ।

गएको असार ८ गते म्यार्दी खोलामाथिको बेलिब्रिज बाढीले बगाएपछि लमजुङका सवारी लमजुङतर्फ र मनाङका सवारी मनाङतर्फ नै छ । पुल जडान कार्य सकिएपनि म्यार्दीभीरको पहिरोले पुल सक्नमा कठिनाई परेको छ । बेंसीसहर-चामे ६५ किलोमिटर सडकमध्ये ३५ किलोमिटर लमजुङमै पर्छ ।

लमजुङको अर्खलेबेंसी क्षेत्र, स्याँगेक्षेत्र र च्याम्चेक्षेत्रको पहिरोले पनि आवतजावतमा समस्या छ । मनाङतर्फ म्यार्दीभीर र सिरानतालको पहिरोले आवतजावतमा समस्या बनाएको छ । पर्यटकीय मौसम सुरु हुनै लाग्दा पनि वर्षा नरोकिएका कारण चक्रीय अन्नपूर्ण पदमार्गको उक्त सडकहरुमा दिनहुँ पहिरो जाने गरेको छ ।

सडक विभागले आर्थिक वर्ष २०५१/०५२ मा बेंसीसहर-चामे सडक निर्माण थालेको थियो । द्वन्दका कारण सडक निर्माणमा कठिनाइ भएपछि २०५७ मा तत्कालीन शाही नेपाली सेनालाई जिम्मा लगाएको थियो ।

निर्माण सुरु भएको १९ वर्षपछि ६ वर्ष अघि मात्र सडकको ट्रयाक खोल्ने कार्य पूरा भएको हो । नेपाली सेनाले ट्रयाक खोलेको बेंसीसहर–चामे सडकको ठाउँठाउँमा पहिरो जाँदा बर्सेनि बर्खायाममा उक्त बाटोका उपभोक्ताले सास्ती खेप्नु परेको छ । २०६९ मा सरकारलाई हस्तान्तरण गरिएको उक्त सडकमा पछिल्लो समय नियमित मर्मतसम्भार हुन सकेको छैन । पहिरो पन्छाउने काममात्रै गरिँदा उक्त सडकको जोखिमयुक्त ठाउँमा स्तरोन्नति हुन सकेको छैन ।

प्रकाशित : आश्विन १, २०७६ १७:०५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×