फर्निचर एक्स्पो सुरु 

कान्तिपुर संवाददाता

काठमाडौँ — फर्निचर तथा फर्निसिङ एक्स्पो–२०१९ सुरु भएको छ । उपराष्ट्रपति नन्दकिशोर पुनले बुधबार एक्स्पोको उद्‌घाटन गरे । नेपाल फर्निचर तथा फर्निसिङ संघको आयोजनामा भृकुटी मण्डपमा सुरु भएको एक्स्पो आइतबारसम्म चल्नेछ । 

मेलामा स्वदेशी तथा विदेशी गरी १ सय २० भन्दा बढी प्रदर्शकहरूको सहभागिता रहको छ । किचन, बेडरुमका साथै आउटडोर फर्निचर, इन्टेरियर डिजाइनर, कार्पेट, मार्बल लगायत सामग्री, होम तथा अफिस डेकोरसनका फर्निचर मेसिनरी औजारका साथै वास्तुसँग सम्बन्धित उत्पादन एक्स्पोको मुख्य आकर्षण रहेको छ।

स्वदेशी तथा विदेशी फर्निचर क्षेत्रको बजारको स्थिति बुझ्न सर्वसाधरणलाई एकै स्थानमा सबै सेवाको जानकारी मेलामा उपलब्ध हुने नेपाल फर्निचर तथा फर्निसिङ संघका अध्यक्ष रूपेश श्रेष्ठले बताए।

मुलुकमा वार्षिक १८ अर्बदेखि २० अर्ब रूपैयाँको काठ आयात हुने गरेपनि नेपाली काठको हस्तकलाको सामग्री बाहेक अन्य निर्यात न्यून रहेको बताउँदै अध्यक्ष श्रेष्ठले यस विषयमा सरकारले विचार गर्नुपर्ने बताए।

प्रकाशित : भाद्र २५, २०७६ १८:५७
प्रतिक्रिया
पठाउनुहोस्

कम्युनिष्ट सरकार विरुद्ध लड्न देउवाको आह्वान

प्रदीप मेन्याङ्बो

सुनसरी — कांग्रेस सभापति शेरबहादुर देउवाले कम्युनिष्ट सरकारविरुद्ध लड्नु पर्ने बेला आएको बताएका छन् । उनले विगतमा एकदलीय शासनसँग लडेर प्रजातन्त्र ल्याएको तर फेरि कम्युनिष्टको सरकारले एकदलीय सर्वसत्तावादी शासन ल्याउन लागेकाले त्यसकालागि फेरि कम्युनिष्ट सरकारविरुद्ध लड्ने बेला आएको बताएका हुन् ।

मंसिर १४ गते हुने उपनिर्वाचनलाई लक्षित गरेर कांग्रेस धरान उपमहानगर समितिद्वारा बुधबार आयोजित नगरसभालाई सम्बोधन गर्दै सभापति देउवाले भने, ‘प्रजातन्त्रको लागि राणा शासन हटायौं, पञ्चायती व्यवस्था हटायौं । अहिले कम्युनिष्ट सरकारले जनताको बोल्न पाउने अधिकार, लेख्न पाउने अधिकार, स्वतन्त्रतामाथि कुण्ठित पारिरहेको छ । यस्ता मानव अधिकार विरोधी काम गरिरहेको सरकार विरुद्ध फेरि लड्ने बेला आएको छ ।’

देउवाले प्रजातन्त्रको लागि लड्ने नेपाली कांग्रेसले आउँदो उपनिर्वाचनमा धरानबाटै विजयको दियो बाल्ने दाबी गरे । उनले विगतमा राम्रो काम गरेको कांग्रेसको सरकारले गरेको काम र योजनालाई उल्टाउदै विकासको बाधकको रुपमा कम्युनिष्ट सरकार उभिएको आरोप लगाए ।

उनले नेकपाको सरकारले न्यायपालिका, कार्यपालिका र व्यवस्थापिका, सञ्चार लगायतका क्षेत्रमा हस्तक्षेप गरिरहेको बताए । भने, ‘अहिलेको अवस्था जनताको भावना अनुसारको लोकतन्त्रलाई मजबुत पार्ने र संघीयतालाई पूर्ण कार्यान्वयन गर्नुपर्ने समय हो । तर कम्युनिष्ट सरकार भने त्यसको विपरीत भाषणमा एउटा र काम व्यवहारमा अर्कै गर्ने गरेकाले नेपाली जनता निराश बनेका छन् ।’

प्रकाशित : भाद्र २५, २०७६ १८:४४
पूरा पढ्नुहोस्
प्रतिक्रिया
पठाउनुहोस्