तीन दिनमा २४ अंक घट्यो नेप्से

कान्तिपुर संवाददाता

काठमाडौँ — पछिल्ला तीन दिनमा सेयर कारोबार मापक नेप्से परिसूचक करिब साढे २४ अंकले घटेको छ । आइतबार नेप्से १२.६१, सोमबार ९.५४ र मंगलबार २.२४ अंकले घटेको हो । मंगलबारको गिरावटसँगै नेप्से परिसूचक १ हजार १ सय ६६.६७ विन्दुमा बन्द भएको छ ।

अघिल्लो दिनको तुलनामा यो करिब ०.१९ प्रतिशतले कम हो ।

सो दिन १ हजार १ सय ६८.९२ विन्दुबाट कारोबार सुरु भएको थियो । बजार खुलेदेखि नै नेप्से बढ्न सकेन । करिब १ बजेतिर नेप्से १ हजार १ सय ६१ नजिक ओर्लेको थियो । त्यसपछि भने बजार बढ्यो । यो वृद्धिले नेप्सेलाई करिब १ हजार १ सय ७२ विन्दुमा पुर्‍यायो । कारोबारको अन्तिम समयमा नेप्से फेरि ओरालो लाग्यो र अन्त्यमा १ हजार १ सय ६६ विन्दुमा झरेर बन्द भयो ।
मंगलबार कारोबारमा आएकामध्ये होटल, विकास बैंक, निर्जीवन बिमा र सामूहिक लगानीकोषबाहेक सबै समूहको परिसूचक घटे । यी चार समूहको परिसूचक बढे पनि घटेको परिसूचकभन्दा कम नै रह्यो । यसकारण उक्त दिन समग्र नेप्से करिब सवा २ अंकले ऋणात्मक रहेको हो ।

पछिल्लोपटक १३ दिनअघि (भदौ ११ मा) नेप्से परिसूचक १२ सयभन्दा तल ओर्लेको थियो । त्यसपछि मंगलबारसम्म नेप्से १२ सयभन्दा तल नै छ । बरु घटिरहेको छ । यही क्रममा मंगलबार १ हजार १ सय ६६ विन्दुमा ओर्लेको हो ।

मंगलबार होटल समूहको परिसूचक सबैभन्दा बढी १.५२, निर्जीवन बिमा ०.५१, विकास बैंक ०.१५, सामूहिक लगानीकोष ०.५ प्रतिशतले बढे ।

सो दिन करिब ६ हजार ६ सय कारोबारबाट १ सय ७२ कम्पनीका ९ लाख ९२ हजार १ सय २२ कित्ता सेयर किनबेच भए । ती किनबेचबाट २३ करोड ७९ लाख रुपैयाँ बराबरको सेयर कारोबार भएको छ । यो अघिल्लो कारोबार दिनको तुलनामा कारोबार रकम करिब साढे २० प्रतिशतले बढी हो । सोमवार २९ करोड ९२ लाख रकम बराबरको कारोबार भएको थियो ।

नेप्से घटे पनि ‘क’ वर्गका कम्पनीको सेयर कारोबार मापक सेन्सेटिभ परिसूचक ०.२१ अंकले सकारात्मक रह्यो । व्यापारमा रहेका कम्पनीहरूको सेयर कारोबार मापक फ्लोट परिसूचक भने मंगलबार ०.२ प्रतिशतले ऋणात्मक छ ।

प्रकाशित : भाद्र २५, २०७६ १०:४६
प्रतिक्रिया
पठाउनुहोस्

चिनियाँ लगानीको दोस्रो प्राथमिकतामा पर्यटन

कान्तिपुर संवाददाता

काठमाडौँ — नेपालको पर्यटन क्षेत्रमा चिनियाँ लगानीकर्ताले १७ अर्ब ११ करोड रुपैयाँ बराबर लगानी गरेका छन् । चिनियाँले ५४५ परियोजनामा लगानी गरेको उद्योग विभागले जनाएको छ । 

विभागका अनुसार चिनियाँ लगानीकर्ताले यी परियोजनामा १७ अर्ब ९३ करोड रुपैयाँ बराबरको लागत आवश्यक पर्ने जनाएका छन् । लगानीकर्ताले विभागमा चालुअन्तर्गत १ अर्ब ९ करोड र स्थिर पुँजीमा १६ अर्ब लगानी हुने भनेका छन् । यी परियोजनामा १६ हजार ५१ जनाले रोजगारी प्राप्त गरेको देखिन्छ ।

विभागका अनुसार पर्यटन क्षेत्र चिनियाँ लगानीकर्ताको रोजाइमा
दोस्रो स्थानमा रहेको छ । पहिलो स्थानमा ऊर्जा क्षेत्र पर्छ । चिनियाँ लगानीमा १८ वटा ऊर्जासँग सम्बन्धित परियोजना सञ्चालित छन् । ६५ अर्ब ६३ करोड लागत अनुमान गरिएका ऊर्जा क्षेत्रका परियोजनामा ४१ अर्ब लगानी भइसकेको तथ्यांकमा देखिन्छ ।

पर्यटनपछि चिनियाँहरूले सेवामूलक क्षेत्र, उत्पादन, कृषिलगायतका क्षेत्रमा लगानी गरेका छन् । पर्यटनअन्तर्गत चिनियाँहरूले सबैभन्दा धेरै लगानी गरेका परियोजना काठमाडौंमा ४३०, कास्कीमा ४८, ललितपुरमा ४४ छन् । चिनियाँ लगानीमा चितवन, धादिङ, कपिलवस्तु, काभ्रे, मकवानपुर, मोरङ, नवलपरासी, रुपन्देही, संखुवासभा, सिन्धुपाल्चोक र सुनसरीमा पनि पर्यटनसँग सम्बन्धित परियोजना सञ्चालित छन् । यो साउनसम्मको तथ्यांक हो ।

होटल संघ नेपाल (हान) का एक पदाधिकारीका अनुसार चिनियाँ लगानीले पर्यटकीयस्तरका होटल स्थापना भएका देखिन्छन् । यिनले नेपालको होटल क्षेत्रलाई थप चलायमान बनाएका छन् । सरकारको निगरानी भने नपुगेको होटल व्यवसायीहरूको गुनासो छ । ‘सरकारले चिनियाँ लगानीमा नेपालको कानुन पालना भए नभएको हेर्नुपर्ने चुकिरहेको छ,’ एक होटल व्यवसायीले नाम नखुलाउने सर्तमा भने, ‘जस्तो चिनियाँ लगानीमा सञ्चालित हुने होटलको पेमेन्ट सिस्टम विच्याट लगायतबाट हुने गरेको छ, यसमा निगरानी हुनुपर्छ ।’

हान तारेस्तरका ३ सयभन्दा बढी होटलको छाता संगठन हो । यसमा कुनै पनि चिनियाँ लगानीका होटल सदस्य छैनन् । ‘उनीहरूको लगानीमा तारे होटल नभएकाले पनि होला हाम्रो सदस्यमा कुनै पनि चिनियाँ चेन तथा होटल आइसकेका छैनन्,’ हानका एक वरिष्ठ पदाधिकारीकाले भने ।

प्रकाशित : भाद्र २५, २०७६ १०:४२
पूरा पढ्नुहोस्
प्रतिक्रिया
पठाउनुहोस्