धरानमा महिला उद्यमी मेला

कान्तिपुर संवाददाता

सुनसरी — महिला सञ्जाल धरानले तीजलाई महिलाहरूको आर्थिक उन्नति र सशक्तिकरणसँग जोडेर सिर्जनात्मक र फरक शैलीमा मनाउन बिहीबारदेखि धरान–१२ स्थित छाताचोक नजिक ‘महिला उद्यमी बजार प्रवर्द्धन तथा प्रर्दशनी मेला’ सुरु गरेको छ ।

तीजलाई खर्चिलो र भडकिलो बनाउनुभन्दा सन्देशमूलक र उपलब्धिमूलक बनाउन महिला उद्यमी मेला सञ्चालन गरिएको हो । तीज विशेषको अवसरमा भदौ ७ गतेसम्म सञ्चालन हुने महिला उद्यमी मेलामा स्थानीय महिला उद्यमीहरूले उत्पादन गरेका विभिन्न सामग्री बिक्री वितरण र प्रदर्शनीमा राखिएको अध्यक्ष सविता राईले बताइन् ।

सञ्जालले गत वर्षदेखि महिला उद्यमीहरूलाई प्रोत्साहन गर्न र उनीहरूको उत्पादनलाई बजारीकरण गर्न उद्यमी मेलाको आयोजना गर्दै आएको छ । ३० वटा स्टल रहेको उद्यमी मेलामा हस्तकलाका सामानहरू, ढाकाका कपडा एवं तयारी पोसाक, अल्लोका कपडा, जुत्ता चप्पल, कासका सामग्री, हाते झोलाहरू, अर्गानिक तरकारी, अचार, नेपाली खाजाका परिकारहरू राखिएका छन् ।

मेलाका संयोजकसमेत रहेकी सञ्जालकी वरिष्ठ उपाध्यक्ष चेतना सेरेङले महिला उद्यमीहरूको उत्पादनलाई बजारीकरण गर्न मद्दत पुग्ने विश्वासले मेला सञ्चालन गरिएको बताइन् ।

‘पूर्वका स्थानीय उद्यमी महिलाहरू आफ्नो पैसा लगानी गरेर सानातिना उद्योग सञ्चालन गरी आर्थिक रूपले आत्मनिर्भर बन्ने प्रयासमा छन् । उनीहरूको उत्पादन राम्रो र स्तरीय हुँदाहुँदै पनि बजारीकरणको अभावले उपभोक्तासम्म पुगको छैन । हामीले तिनै महिला उद्यमीका उत्पादनलाई बजारीकरण गर्ने माध्यम मेलालाई बनाएका हौं,’ उनले भनिन् । मेला अवधिभर जातीय पहिरन फेसन सोलगायत कार्यक्रम हुनेछन ।

प्रकाशित : भाद्र ६, २०७६ ०८:१७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

एक महिनामै अर्ब राजस्व

कान्तिपुर संवाददाता

रसुवा — रसुवा भन्सार कार्यालयले चालु आर्थिक वर्षको पहिलो महिनामा १ अर्ब ३ करोड ५ लाख ४८ हजार रुपैयाँ राजस्व संकलन गरेको छ ।

कार्यालयले चालु आर्थिक वर्षको पहिलो महिनामा यति धेरै राजस्व संकलन गरेको जनाएको छ । भन्सार कार्यालयले चालु आर्थिक वर्षको पहिलो महिनामा ४६ करोड ७८ लाख ९१ हजार रुपैयाँ राजस्व संकलनको लक्ष्य राखेको थियो ।
साउन महिनामा मासिक लक्ष्यभन्दा १२०.२५ प्रतिशत बढी संकलन भएको छ । गत आर्थिक वर्षको सोही अवधिमा २६ करोड ४ लाख ७७ हजार रुपैयाँ राजस्व संकलन भएको थियो । यर्थाथपरक रूपमा आफूले सामान आयात गरेको बिलबिजक राखेर मूल्यांकन गरी त्यसअनुसारको भन्सार महसुल तिर्न व्यवसायीहरू राजी भएकाले राजस्व संकलनमा वृद्धि भएको रसुवागढी भन्सार कार्यालयका प्रमुख भन्सार अधिकृत पुण्यविक्रम खड्काले बताए ।

‘नाकामा दिन प्रतिदिन व्यावसायिक गतिविधि बढ्दै गएको छ,’ खड्काले भने, ‘यस वर्ष नाका जोड्ने सडक अवरुद्ध भएको छैन ।’ गत वर्ष पहिरोका कारण एक महिनाभन्दा बढी नाका जोड्ने सडक अवरुद्ध भएको थियो ।

भन्सार विभागले आर्थिक वर्ष ०७६/७७ का लागि रसुवा भन्सार कार्यालयलाई ९ अर्ब ३५ करोड ७८ लाख ३३ हजार रुपैयाँ राजस्व संकलन गर्ने वार्षिक लक्ष्य दिएको छ । पछिल्लो समय नाकाबाट अर्बौं मूल्य बराबरको सामान पैठारी भइरहेको छ । सामान पैठारीमा वृद्धि भएसँगै राजस्व संकलन पनि बढेको भन्सार कार्यालयले जनायो ।

यो नाकाबाट तयारी कपडा, स्याउ, लेडिज सेन्डल, रबर, प्लास्टिकका जुत्ता चप्पल, हातेझोला, छालाका जुत्ता, मोटरको ब्याट्री, यूपीएस, चस्मा/चस्माकोफ्रेम, प्लास्टिकका सामानलगायत वस्तुहरू पैठारी भइरहेका छन् ।

नेपालबाट चीनतर्फ धातुका मूर्ति, मेहन्दी, दन्तमञ्जन, शृंगारका सामान, चाउचाउ, पास्ता, जुस जाम, चकलेट, उनी गलैंचा कार्पेट, चुइङगम, हेयर आयल, हेयर क्रिमलगायत निकासी भइरहेका छन् । पैठारीको तुलनामा निकासी भने घटदो छ ।

भूकम्पका कारण तातोपानी नाका बन्द भएपछि चीनबाट हुने धेरैजसो आयात ०७२ मंसिरदेखि यही नाकाबाट भइरहेको छ । भन्सारले मासिक अर्बौं राजस्व संकलन गरे पनि नाकामा पर्याप्त मात्रामा भौतिक पूर्वाधारको भने अभाव छ ।

प्रकाशित : भाद्र ६, २०७६ ०८:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT