नाडा अटो प्रदर्शनीमा ९५ ब्रान्ड सहभागी हुने

कान्तिपुर संवाददाता

काठमाडौँ — भदौ १० देखि १५ गतेसम्म काठमाडौंमा हुने नाडा अटो प्रदर्शनीको १४ औं संस्करणमा ९५ वटा ब्राण्डले सहभागिता जनाउँने भएका छन् । प्रदर्शनी बारे जानकारी दिन आइतबार आयोजित पत्रकार सम्मेलनमा आयोजक नाडा अटोमोबाइल्स एसोसिएसन अफ नेपालले यो वर्ष बढी ब्रान्डको सहभागिता हुने जानकारी दिएको हो ।

काठमाडौंमा आइतबार नाडा अटो सोबारे जानकारी दिँदै पदाधिकारी । तस्बिर : कान्तिपुर

आयोजकका अनुसार प्रदर्शनीमा चारपांग्रे तर्फ २३ र दुई पांग्रेतर्फ १९ वटा ब्रान्डले सहभागिता जनाउँदै छन् । प्रदर्शनीमा १२ वटा लुब्रिकेन्ट्स, टायरका ९ वटा ब्रान्ड, ब्याट्रीका ५ ब्रान्ड र ग्यारेज उपकरणसम्बन्धी अन्य १४ वटा ब्रान्डले सहभागिता जनाउनेछन् ।

नाडा अटोमोबाइल्स एसोसिएसन अफ नेपालका अध्यक्ष शम्भु दाहालका अनुसार अघिल्लो वर्ष प्रदर्शनीमा ७१ वटा ब्रान्डको सहभागिता थियो । प्रदर्शनीको क्रममा अवलोकर्ताले सवारीका लागि बैंक तथा वित्तीय संस्थाबाट पाइने ऋण र यससम्बन्धी बिमाबारे पनि जानकारी हासिल गर्न सक्नेछन् । यस्ता जानकारी दिने गरी १३ वटा बैंक तथा वित्तीय संस्थाको स्टल रहने आयोजकले जनाएको छ ।

प्रदर्शनी संयोजक निराकार श्रेष्ठले यो वर्ष प्रदर्शनीस्थलको क्षेत्रफल बढाइएको जानकारी दिए । भृकुटीमण्डपमा हुने प्रदर्शनीमा साना ठूला गरी १६० स्टल रहने उनले बताए । प्रदर्शनीमा आयातकर्ता, डिलर, वितरक र उत्पादकहरूको सहभागिता रहनेछ । अवलोकनकर्ताले मेलाको क्रममा सवारीसम्बन्धी पूर्ण जानकारी र त्यसका मोडलहरू हेर्न पाउनेछन् ।

अवलोकनकर्ताको सुविधाका लागि यो वर्षको प्रदर्शनीमा दुई पांग्रे र चारपांग्रे सवारी, सवारीका पार्टपुर्जा, वित्तीय संस्थाका लागि छुट्टाछुट्टै क्षेत्र तोकिएको आयोजकले जनाएको छ । प्रदर्शनीस्थलमा अवलोकनकर्ताको सुविधाका लागि अस्थायी अकासेपुल निर्माण गरिनेछ । यसले अवलोकनकर्ताको आवतजावतलाई सहज बनाउने आयोजकको विश्वास छ ।

छ दिने प्रदर्शनी ७५ हजार बढीले अवलोकन गर्ने आयोजकको विश्वास छ । प्रदर्शनी हेर्न टिकट काट्नेहरूमध्येबाट लक्की ड्रमार्फत जीपीएक्स जेन्टलमेन्ट २ सय सीसीको मोटरसाइकल जित्न सक्ने आयोजकले जानकारी दिए ।

प्रकाशित : भाद्र २, २०७६ ०७:५४
प्रतिक्रिया
पठाउनुहोस्

दुर्घटनामा श्रीमान्‌को मृत्यु, श्रीमती घाइते

रासस

दमाैली — पृथ्वीराजमार्गअन्तर्गत तनहुँको व्यास नगरपालिका–१२ कमलाबारीमा आइतबार भएको सवारी दुर्घटनामा एक जनाको मृत्यु भएको छ भने एक जना घाइते भएका छन् । 

मृत्यु हुनेमा भानु नगरपालिका–५ बस्ने ३९ वर्षीय सुदीपराज पौडेल रहेको जिल्ला प्रहरी कार्यालय तनहुँले जनाएको छ । दुर्घटनामा सोही ठाउँ निवासी ३४ वर्षीय प्रेमा न्यौपाने पौडेल घाइते भएकी छन् ।

सुदीपको पोखरास्थित मणिपाल शिक्षण अस्पतालमा उपचारको क्रममा मृत्यु भएको जिल्ला प्रहरी कार्यालय तनहुँका प्रहरी नायब उपरीक्षक लीलाराज लामिछानेले जानकारी दिए । घाइते प्रेमाको सोही अस्पतालमा उपचार भइरहेको छ ।

दुर्घटनामा मृत्यु हुने श्रीमान् हुन् भने घाइते रहेकी निजकी श्रीमती रहेको प्रहरीले जनाएको छ । डुम्रेबाट दमौलीतर्फ आउँदै गरेको ना ६ ख ७५६० नंको ट्रकले राजमार्ग छेउमा रोकिराखेको प्रदेश ३–०१–००१–य नं को कारलाई ठक्कर दिएपछि सोही दिशाबाट आउँदै गरेको ना २० प ३१०९ नं को मोटरसाइकललाई कारले ठक्कर दिएको थियो ।

प्रकाशित : भाद्र २, २०७६ ०७:४९
पूरा पढ्नुहोस्
प्रतिक्रिया
पठाउनुहोस्