महँगियो सुन, खस्कियो बजार

तीजको सिजन सुरु भइसक्यो ।दसैं नजिकिँदै छ । राजधानीका सुन पसलहरूमा भने पहिला जस्तो न ग्राहकको चहलपहल छ, न व्यापारीमा उत्साह ।
नुमा थाम्सुहाङ

काठमाडौँ — सुन छोइनसक्ने गरी महँगिएको छ । गत साताबाट तोलाकै ७० हजार रुपैयाँ पुगेको छ । मूल्य बढेसँगै किनबेच भने ओरालो लागेको लाग्यै छ । तीजको सिजन सुरु भइसक्यो । दसैं नजिकिँदै छ तर राजधानीका सुन पसलमा पहिला जस्तो न ग्राहकको चहलपहल छ, न व्यापारीमा उत्साह । किनबेच झन्डै ८० प्रतिशतले घटेको छ ।

न्युरोडका सुन व्यवसायी रोमी शाक्यका अनुसार सुनको भाउ बढेदेखि दिनमा मुस्किलले २० प्रतिशत मात्र कारोबार हुने गरेको छ । ‘भाउ बढेपछि व्यापार खस्किएको छ,’ उनले भने, ‘तीजको सिजन सुरु भयो । दसैं पनि नजिकिँदै छ । सिजनकै सुरुवातमा व्यापारको अवस्था भने खस्कँदो छ ।’ यही भाउ केही समयसम्म स्थिररह्यो भने व्यापारमा केही सुधार हुने तर फेरि भाउ घटबढ भएमा भन्न नसकिने शाक्यले बताए ।

‘पहिला पाँच तोला लिने ग्राहक अहिले दुई तोला लिएर जान्छन्,’ उनले भने, ‘आवश्यक पर्नेहरू मात्र किनेर लान्छन् । गतवर्ष पनि यही बेला सुनको भाउ बढेर ६४ हजार रुपैयाँ तोला पुगेको थियो । अहिलेको जस्तो व्यापार शून्य नै भएको थिएन ।’ हेरिटेज गोल्ड प्यालेसका राजेश ताम्राकारले पनि अहिले व्यापार डामाडोल अवस्थामा पुगेको बताए । ‘भाउ बढेदेखि मान्छे आएका छैनन् । सुनको भाउ स्थिर रह्यो भने व्यापारमा सुधार हुन सक्ने आशा छ । घडबढ भएमा ग्राहक अन्योलमा पर्नेछन्,’ उनले भने ।

सुनको सिजन नभए पनि तीज सुरु हुन लागेकाले व्यापारमा केही सुधार हुनुपर्ने उनको बुझाइ छ । कुनै पनि वस्तुको मूल्य बढेपछि किन्ने ग्राहक अवश्यै कम हुन्छन् । ठुलै आवश्यक परेमा मात्र यस्तोमा सुन किन्न आउने गरेको ताम्राकारले बताए । धरान गहना गृहकी सुजिना महर्जन व्यापार पहिलेको भन्दा २५ प्रतिशतभन्दा घटेको बताउँछिन् ।

‘तीज पनि आउँदै छ । बिहेको पनि समय हो तर सुनको व्यापार भने छैन,’ उनले भनिन् । पास्नी वा कसैलाई उपहार दिनुपर्ने अवस्थामा मात्र सुन किन्ने ग्राहक आउने गरेको उनले बताइन् । सुन र चाँदीको व्यापारै खस्किएको छ । कतिपय ग्राहक सुनको भाउ घट्छ कि भनेर पर्खिरहेको उनले सुनाइन् ।

‘सुनको भाउ बढेपछि धेरै फरक पारेको छ । हामीले गरेको रिपोर्टमा २५ प्रतिशतभन्दा कम व्यापार भएको पाएका छौं,’ नेपाल सुन चाँदी व्यवसायी महासंघका पूर्वअध्यक्ष तेजरत्न शाक्यले भने, ‘अहिले सुन किन्नेभन्दा पनि बेच्ने बढेका छन् । तोलाकै ७० हजार रुपैयाँ पाउने भएकाले आफूसँग भएको गहना बेच्ने बढेका हुन् ।’

सुनको भाउ स्थिर नभएकाले यो अवस्थामा जे पनि हुन सक्ने शाक्यले बताए । ‘भाउ स्थिर भए व्यापार सुधार हुन सक्छ,’ उनले भने, ‘ग्राहकहरूपर्ख र हेर को सिद्धान्तमा छन् । सुनको भाउ घटेन भने किन्न त परिहाल्छ । त्यो अवस्थामा व्यापारले बजार लिन्छ ।’

प्रकाशित : श्रावण २८, २०७६ ०७:५८
प्रतिक्रिया
पठाउनुहोस्

सोमपालको टिम च्याम्पियन

कान्तिपुर संवाददाता

काठमाडौँ — नेपाली खेलाडी सोमपाल कामीसम्मिलित विन्नीपेग हक्सले ग्लोबल टान्टी–२० क्यानडा लिगको उपाधि जितेको छ । आइतबार राति ब्राम्पटनमा भएको फाइनलमा हक्सले भ्यानकुभर नाइट्सलाई इलिमिनेटरमा पराजित गरेको थियो । 

सोमपाललाई प्लेइङ ११ मा समावेश नगरेको हक्सले टस हारेर ब्याटिङ गर्दै निर्धारित २० ओभरमा ८ विकेट गुमाई १ सय ९२ रन बनायो । टोलीबाट यूएईका ब्याट्सम्यान साइमन अनवरले ४५ बलमा ८ चौका र ७ छक्का प्रहार गरी ९० रन बनाए । क्रिस लिनले ३७ र जेपी डुमिनीले ३३ रन बनाए ।

भ्यानकुभरका एन्ड्रयु रसेलले ४ तथा अली खान र रायन पठानले २–२ विकेट लिए । कप्तान सोएब मलिकले ६ चौका र ३ छक्का प्रहार गर्दै ३६ बलमा ६४, रसेलले २० बलमा ३ चौका र ६ छक्का प्रहार गर्दै अविजित ४६ रन बनाएपछि भ्यानकुभरले पनि ६ विकेट गुमाई १ सय ९२ रन नै बनाएपछि स्कोर बराबरी भएको थियो । इनिङ्सको अन्तिम बलमा ३ रन चाहिने हुँदा भ्यानकुभरका शाद विन जाफर रनआउट भएका थिए । त्यसअघि नै उनले रसेलसँग २ रन जोडिसकेका थिए ।

सुपर ओभरमा भ्यानकुभरले बनाएको ९ रनलाई हक्सले २ बलअगाडि नै पूरा गरेको थियो । हक्सको सफलताले अलराउन्डर सोमपाल ग्लोबल फ्रेन्चाइज जित्ने पहिलो नेपाली खेलाडी बने । हक्सले ड्राफ्टबाट न्यूनतम ३ हजार डलरमा लिएपछि सोमपाल पहिलोपल्ट विदेशी लिगमा खेल्ने अवसर पाएका थिए । तर उनले १ खेलमा अवसर पाउँदा राम्रो प्रदर्शन गर्न सकेका थिएनन् । उनले इडमोन्ड रोयल्ससँगको खेलमा अवसर पाउँदा ३ ओभरमा ३३ रन खर्चिए भने ५ बलमा १ रनमात्र बनाउन सकेका थिए ।

क्यानडा टेस्ट मान्यताप्राप्त नभएकाले प्रतियोगिताको खेललाई आधिकारिक टान्टी–२० मान्यता भने थिएन । हक्स राउन्ड रोबिन लिगमा पाँचौं भएको थियो र टोलीले प्लेअफबाट माथि पुग्दै उपाधि जितेको हो । नेपालका अर्का बलर सन्दीप लामिछानेले प्रतियोगितामा टोरन्टो नेसनल्सबाट खेलेका थिए ।

उनको टोली ६ फ्रेन्चाइज सहभागी प्रतियोगिताको राउन्ड रोबिनमा तेस्रो भयो । तर टोली प्लेअफमा चुक्न पुग्यो । नेसनल्सले सन्दीपलाई ६० हजार डलरमा लिएको थियो । सन्दीपले ४ खेलमा ५ विकेट लिए र उनको इकोनोमी प्रतिओभर झन्डै ९ रन रहेको थियो ।

गत वर्ष इन्डियन प्रिमियर लिगको अक्सनबाट दिल्ली क्यापिटलमा परेका सन्दीपले विभिन्न देशका ९ फ्रेन्चाइज लिग खेलिसकेका छन् । उनले कुनैमा उपाधि जित्न सकेका छैनन् । बिग–बासमा उनी समावेश टोली मेलबर्न स्टार्स फाइनलमा पराजित भएको थियो ।

प्रकाशित : श्रावण २८, २०७६ ०७:५३
पूरा पढ्नुहोस्
प्रतिक्रिया
पठाउनुहोस्