बिचौलिया रोक्न कृषि उपज केन्द्र

नवीन पौडेल

नवलपुर — पूर्वी नवलपरासीको देवचुलीमा कृषि उपज बिक्री केन्द्र सञ्चालन गरिएको छ । किसानले उत्पादन गरेको तरकारी तथा अन्य उत्पादनलाई बिचौलियामार्फत नभई सोझै उपभोक्तामाझ पुर्‍याउने उद्देश्यले केन्द्र सञ्चालनमा ल्याइएको हो । 

कृषि विकास निर्देशनालय गण्डकी प्रदेश देवप्रगति बहुउद्देश्यीय सहकारीको सहयोगमा २९ लाख १४ हजार रुपैयाँको लागतमा केन्द्र निर्माण गरेर बिक्री वितरण सुरु गरिएको सहकारीका अध्यक्ष हुकुमबहादुर सुवेदीले बताए । तराई भेगमा तरकारी खेती र जिल्लाको पहाडी भेगमा अदुवा खेतीको पकेट क्षेत्र भएकाले भण्डारण र बजारीकरणका लागि बिक्री केन्द्र स्थापना भएपछि किसान खुसी भएका छन् ।

केन्द्रमा कृषि चौतारी स्थापना गरिएको छ । निश्चित स्थानलाई चौतारीको नाम दिएर त्यहाँ किसानले आफ्ना उत्पादन निःशुल्क रूपमा भण्डारण गरेर बिक्री गर्न सक्छन् । लामो समयसम्म राख्नुपर्ने र भण्डारण गर्नुपर्ने भएमा सामान्य शुल्क तिरेर कारोबार गर्न सकिनेछ । पूर्व–पश्चिम राजमार्गको पहुँचमा रहेका बिक्री केन्द्र पहाडबाट सर्वसाधारण बजार आउने मुख्य स्थानमा पर्छ ।

पहाडी क्षेत्रमा उत्पादन हुने अदुवा, अम्रिसो, सुन्तलालगायत कृषि उपजको बजारीकरणका लागि उचित स्थान नहुँदा बिचौलियाले सस्तोमा खरिद गरेर बढी मूल्यमा बिक्री गरिरहेका थिए । सहकारीले कृषि उपज बिक्री केन्द्रसहित आगामी दिनमा शीतभण्डार र बीउ बैंकसमेत स्थापना गर्ने लक्ष्य लिएको सहकारीका उपाध्यक्ष गोमादेवी घिमिरेले बताइन् । स्थानीयलाई पनि टाढाटाढा पुगेर तरकारी किन्नुभन्दा एकै स्थानमा सबै प्रकारका उत्पादन पाएपछि सहज भएको छ ।

किसानको आफ्नै डेरी
बजारमा दूधको माग बढेसँगै व्यावसायिक पशुपालन पनि फस्टाउँदो छ । बिचौलियाकै कारण किसानले उचित मूल्य र उपभोक्ताले सहजै दूध पाएका छैनन् । किसानसँग सस्तोमा खरिद गरेर महँगोमा बेच्दा किसान र उपभोक्ता दुवै मारमा छन् ।

व्यावसायिक रूपमा सञ्चालित निजी डेरीलाई दूध बेच्दा समयमा भुक्तानी नपाउने समस्या पनि उस्तै छ । यस्तै समस्याबाट गुज्रिएका पूर्वी नवलपरासीका दूध उत्पादक किसानले सदरमुकाम कावासोतीमा डेरी सञ्चालन गरेका छन् ।

बिचौलियालाई सस्तोमा दूध दिनुपर्ने र समयमा भुक्तानी नपाएपछि व्यावसायिक रूपमा उत्पादन गर्ने किसान एकजुट भएर आफैंले संकलन गर्न थालेका हुन् । कावासोती नगरपालिकाभित्रका २५ पशुपालक किसानले डेरी सञ्चालन गरी आफूले उत्पादन गरेका दूध आफैंले बिक्री गर्न थालेका छन् ।

प्रकाशित : श्रावण २४, २०७६ ०८:५०
प्रतिक्रिया
पठाउनुहोस्

कोरिया पठाउने भन्दै ठगी

कान्तिपुर संवाददाता

बागलुङ — काठेखोला–४ का मनराज थापाले कोरिया जाने आसमा गाउँकै अमरबहादुर पुनलाई २ वर्षअघि ५ लाख ६० हजार रुपैयाँ बुझाए । उनले कोरियामा मासिक २ लाख रुपैयाँसम्म कमाइ हुने सुनेका थिए । रकम बुझेका अमरबहादुर र उनका भाइ खड्गबहादुरले ढुक्क भएर बस्न भन्दै विदेश उडाइदिने सपना देखाइरहे । 

भाषापरीक्षा पास गर्नु नपर्ने गरी कोरिया उड्न पाइने आसले मनराजसहितका युवाले पैसा बुझाएका थिए । थापालाई अवस्था हेरी १० लाख देखि १४ लाख रुपैयाँसम्म लाग्छ भनिएको थियो । उनले उक्त रकम पेस्की दिएका थिए ।

रकम बुझेपछि अमरबहादुर र खड्गबहादुर सम्पर्कमै रहन छाडे । उनीहरू अरू युवासँग पनि त्यस्तै रकम असुल गरिरहेका थिए । सुरुमा एक महिनाको आश्वासन दिएका उनीहरूले पछि ६ महिनाभित्र उडाइदिने आश्वासन दिएका थिए । दुवै दाजुभाइ तंग्राम गाउँका मात्र ३० जनालाई ठगेर भारत पसेको खुलेको छ ।

सबैबाट गरी एक करोड रुपैयाँभन्दा बढी ठगेको प्रहरीको प्रारम्भिक अनुमान छ । उनीहरूले गाउँका लालबहादुर, नवीन पुन, भीमापोखराका विष्णुबहादुर थापालगायतसँग पनि जनही ५ लाख ६० हजार रुपैयाँ असुलेको पाइएको छ । तंग्रामकै १२ युवाले ४ लाख रुपैयाँ बुझाएको बताए । ‘आफ्नै गाउँघरका दाजुभाइले पठाउने भनेपछि विश्वासमा परेर रकम तिरियो,’ अर्का पीडित विष्णु थापाले भने, ‘यति बेइमान हुन्छ भन्ने सोचेका थिएनौं ।’

विदेश पठाउनुको साटो उनीहरू भारतको दिल्ली पुगेर बस्न थालेपछि युवाले आफूहरू ठगिएको आशंका गरेका थिए । ‘सुरुमा तयारी गर्दै होलान् भनेर बस्यौं, तर ऋणको ब्याज तिर्नुपरेपछि समस्या भयो,’ लालबहादुरले भने, ‘श्रीमतीको गहना र लालपुर्जा बैंकमा राखेका धेरै युवा ठगिएका छन् ।’ उनका अनुसार म्याग्दीका लोकबहादुर छन्त्याल पनि ठगिएका छन् । ‘छन्त्याल पटकपटक श्रीमतीको गहना फिर्ता गर्न नसकेर तनाव खेपेको बताउने गर्थे,’ उनले भने, ‘अहिले भेटघाट भएको छैन ।’

ठगिएको महसुस भएपछि पीडितहरू एकत्रित भएका छन् । डेढ वर्षपछि गतसाता गाउँमा आएको थाहा पाएपछि युवाले अमरबहादुरलाई समातेर प्रहरीमा बुझाएका छन् । वडाध्यक्ष केशर थापाले सहजीकरण गरेर पीडितलाई रकम फिर्ता गराउन पहल गर्ने बताए । ‘प्रहरीले अमरबहादुरमार्फत खड्गबहादुरलाई झिकाउने तयारी थालेको छ । ठगिएकाहरूले उजुरी दिने क्रम बढेको प्रहरी नायब उपरीक्षक झविन्द्रप्रसाद भट्टराईले बताए । उनले भने, ‘प्रमाण खोजेर ठगी मुद्दा चलाउने योजना छ ।’

प्रकाशित : श्रावण २४, २०७६ ०८:४९
पूरा पढ्नुहोस्
प्रतिक्रिया
पठाउनुहोस्