खाना पकाउने ग्यासको मूल्य घट्यो, पेट्रोल बढ्यो

राजु चौधरी

काठमाडौँ — नेपाल आयल निगमले खाना पकाउने ग्यासको मूल्य प्रतिसिलिन्डर २५ रुपैयाँ घटाएको छ । निगमले मंगलबार राति १२ बजेदेखि लागू हुनेगरी ग्यासको मूल्य घटाउने निर्णय गरेको प्रवक्ता वीरेन्द्र गोइतले बताए । गोइतका अनुसार पेट्रोलमा प्रतिलिटर १ रुपैयाँ, डिजेल तथा मट्टितेलमा ५० पैसा बढेको छ । 

‘भारतीय आयल निगमले पठाएको नयाँ मूल्यसूची अनुसार समायोजन गर्दा ग्यासको मूल्य घटे पनि पेट्रोल, डिजेलमा बढेको छ,’ प्रवक्ता गोइतले भने। नयाँ मूल्यसूचीअनुसार प्रतिलिटर पेट्रोलको मूल्य १ सय ९ रुपैयाँ, डिजेल/मट्टितेल प्रतिलिटर ९७/९७ रुपैयाँ पर्ने निगमले जनाएको छ। खाना पकाउने ग्यासको मूल्य प्रतिसिलिन्डर १३ सय ७५ रुपैयाँ कायम भएको छ। निगमले हवाई इन्धनको मूल्य भने यथावत राखेको छ।

आइओसीले पनि प्रत्येक महिनाको १ र १५ तारिखमा नयाँ मूल्यसूची पठाउँछ। सरकारले ०७१ असोजदेखि पेट्रोल, डिजेल, मट्टितेल र हवाई इन्धनमा स्वचालित मूल्य लागू गरेपछि अन्तर्राष्ट्रिय बजारअनुसार इन्धनको मूल्य समायोजन गर्नुपर्छ। तर, पूर्ण रुपमा कार्यान्वयन भएको छैन।

प्रकाशित : श्रावण २१, २०७६ २१:०५
प्रतिक्रिया
पठाउनुहोस्

पत्रकार पुडासैनी मृत फेला

कान्तिपुर संवाददाता

चितवन — काठमाडौंमा कार्यरत पत्रकार शालिकराम पुडासैनी नारायणगढको एक होटलमा मृत फेला परेका छन् । पंखामा डोरीको पासो लगाएर झुन्डिएको अवस्थामा उनको शव फेला परेको चितवन प्रहरीले जनाएको छ । घटनास्थल हेर्दा आत्महत्या गरेको देखिए पनि थप अनुसन्धान जारी रहेको प्रहरी नायब उपरीक्षक एकनारायण कोइरालाले बताए ।

माउन्टेन टीभीमा कार्यरत पुडासैनी सोमबार दिउँसो चितवन आएर नारायणगढको पोखरा बसपार्कस्थित कंगारु होटलमा बसेका थिए । राति होटलका कर्मचारीले खाना खान बोलाउन जाँदा ढोका नखुलेपछि प्रहरीको रोहबरमा ढोका खोलेको होटल सञ्चालक यज्ञबहादुर कार्कीले बताए । ‘सादा खान बनाएर कोठामा नै ल्याउनुहोला भन्नुभएको थियो । खान पुर्‍याउन जाँदा ढोका खुलेन,’ उनले भने ।

शव पोस्टमार्टमपछि नै सत्यतथ्य प्रस्ट हुने डीएसपी कोइरालाले बताए । परिवारका सदस्यले मृत्युको सम्बन्धमा आशंका जनाएका छन् । उनीहरूले हत्या पनि भएको हुन सक्ने भन्दै विस्तृत अनुसन्धान हुनुपर्ने माग गरेका छन् ।

प्रकाशित : श्रावण २१, २०७६ २०:५५
पूरा पढ्नुहोस्
प्रतिक्रिया
पठाउनुहोस्