६ करोडमा फार्म

घनश्याम खड्का

म्याग्दी — हरियाली समूह प्रालिले ६ करोडभन्दा बढीको लगानीमा व्यावसायिक कृषि फार्म सुरु गरेको छ । बेनी नगरपालिका–४ सिँगामा १६० रोपनी जग्गा भाडामा लिएर समूहले तरकारी, कुखुरा, माछा र मौरीपालन व्यवसाय सुरु गरेको हो । उक्त समूहले पुष्पखेतीको तयारी पनि थालेको छ । 

उन्नत बोयर जातका बाख्रा र वन्यपन्छी कालिज पाल्नका लागि खोर निर्माणमा लागेको उक्त समूहले मृग पाल्न कानुनी प्रक्रियामा लागेको जनाएको छ ।


‘जिल्लामा कृषि क्षेत्रमा गरिएको यो ठूलो व्यावसायिक लगानी हो । पूर्वाधार थप्दै र विस्तार गर्दै लैजाने योजनामा छौं । अर्गानिक कृषि व्यवसायबाट रिसोर्टदेखि कृषिमै लगानी बढाउनेछौं,’ समूहका निर्देशक शेरबहादुर केसीले भने, ‘समूहमा आबद्ध नभएका कृषकलाई अर्गानिक तरकारी, मासुजन्य उत्पादन तथा फलफूल खेतीमा उत्प्रेरित गर्न अनुदान दिने र उत्पादित वस्तु खरिद गर्ने योजना पनि छ ।’ १९ जना मिलेर स्थापना गरेको हरियाली समूहमा अहिले १ लाखदेखि १० लाख रुपैयाँसम्म लगानी गर्ने ५० सेयर सदस्य छन् ।


हरियाली अर्गानिक कृषि फार्मले पछिल्लो एक महिनादेखि उत्पादन बजार पुर्‍याउन थालेको छ । एक महिनामा १० लाख मूल्यका टमाटर, घिरौंला, लौका, भिन्डी, खुर्सानी, करेला, काँक्रासमेतका तरकारी, २२ लाखको मासु, २ क्विन्टल माछा, २ लाख मूल्यको खर्बुजा निकासी गरेको छ ।


मासु फ्रिजजडित गाडीबाट मुस्ताङका होटलमा पठाइएको छ । फार्ममा ४० जनाले न्यूनतम १५ देखि ४० हजारसम्म पारिश्रमिक पाउने गरी प्रत्यक्ष रोजगारी पाएका छन् । ‘कृषि उत्पादनबाट उत्साही छौं । कार्यरत सबै ४० जना स्थानीय छौं,’ प्रबन्धक इन्चार्ज भगवान् खड्काले भने, ‘माछा थप्ने र आगामी तीन महिनापछि दैनिक १५ हजार अण्डा टिप्न छुट्टै घण्टा सिस्टममा कामदार थप्ने योजनामा छौं ।’


समूहले अहिले एउटा हाइटेकसहित १२ ठूला टनेलमा गोलभेंडा र तरकारी खेती गरेको छ । तीन सय क्विन्टल तरुलका बेर्ना रोपिएका छन् । १५ हजार लेयर्स, २५ हजार बोइलर कुखुरा छन् । थप १५ हजार कुखुराको चल्ला थप्ने तयारी छ । २७ हजार माछा छन् । डेढ लाख माछाका भुरा नर्सरी पोखरीमा हुर्कदैछन ।

प्रकाशित : श्रावण १२, २०७६ ०९:२६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

तरकारी बिक्री गर्न दुई घण्टा पैदल

सन्जु पौडेल

रुपन्देही — पाल्पाको तिनाउ गाउँपालिका–९ की पूर्णकुमारी गाहा बिहानै उठेर अघिल्लो रात ठिक्क पारेको तरकारी बोकेर २ घण्टा पैदल हिँड्छिन् ।

त्यसपछि भारीसहित ५० रुपैयाँ तिरेर बुटवल आउने उनलाई एक बोरा तरकारी र अन्य वस्तु बेच्दा थोरै मात्र नाफा हुन्छ । काम भने गर्न छोडेकी छैनन् । १३ वर्षदेखि उनको यसै गरी व्यापार चलिरहेको छ ।

हरेक साताको बुधबार र शनिबार उनी बुटवल आइपुग्छिन् । ‘श्रीमान्ले यस्तै व्यापार सिकाइदिएर बित्नुभयो,’ उनले भनिन्, ‘यसै गरी गुजारा चलेको छ ।’ कमाएर दिने कोही नभएपछि बुढ्यौलीमा सुख नपाएको उनको गुनासो छ । छोरा–बुहारी छुट्टै बस्छन् । २ छोरीको बिहे भइसकेको छ । गरिब भएपछि आफन्तले पनि नहेर्ने उनले बताइन् । पहिले माछा बेच्ने र बिस्तारै तरकारी व्यापार सिकेको बताइन् । यतिबेला हरियो पात र तामा बेच्दै छिन् ।

उर्मिला दर्लामी सत्यवती गाउँपालीका–४ मा बस्छिन् । १२ वर्षदेखि उनको तरकारी व्यवसाय जारी छ । तरकारी बेचेर भएको आम्दानीले बालबच्चालाई खानेकुरा र घरको खाद्यान्न किन्दा ठिक्क हुन्छ । ‘गरिरहेको काम भएकाले छोड्न मन लाग्दैन,’ उनले भनिन्, ‘दाल चामल र केटाकेटीलाई खानेकुरा पुग्छ, गरिरहन्छु ।’ उनी आफ्नै बारीमा साग रोप्छिन् र जंगलबाट न्युरो टिपेर बेच्न बुटवल झर्छिन् । उनको घरबाट गाडी चढ्ने ठाउँसम्म आउन पनि २ घण्टा नै पैदल हिँड्नुपर्छ । तैपनि काम नगरी बस्नभन्दा दुःख गरिरहेको उनले बताइन् ।

अन्यजस्तै लीला घर्ती मगरको नित्य काम पनि यही हो । साताको दुई दिन बुटवल बजारका लागि छुट्ट्याएकी उनको ११ वर्षदेखि यस्तै दैनिकी छ । सानै उमेरदेखि बुवाआमासँग बुटवल आउने उनलाई बुबा–आमाकै देखासिकीले यो व्यापार गर्न सघाएको हो ।

मौसम अनुसार अदुवा, धनियाँ, बेसार, सिमी, तामा, न्युरोलगायत लिएर उनी बजारमा बेच्न आउँछिन् । ‘नगरेरभन्दा गरेपछि केही हुन्छ,’ उनले भनिन्, ‘बाँचुन्जेल गरिरहने हो, घरखर्च पनि चल्छ, आफूलाई हातखर्च पनि हुन्छ ।’ बिहान साढे ४ बजे नै हिँड्नुपर्ने भएकाले राति नै ठीक्क पारेर राख्ने उनले बताइन् ।

उनीहरूजस्तै हरेक साता पाल्पाका विभिन्न गाउँबाट २/३ घण्टा पैदल र गाडीमार्फत बुटवल बजारमा पुगेर तरकारी तथा हरियो पात बेच्ने महिलाको संख्या ठूलो छ । बस्तीबस्तीमा जिप पुगे पनि बजार आउने हतारले अँध्यारोमै उठेर हिँड्न बाध्य छन् उनीहरू । बजारमा ल्याएर पनि ग्राहक र स्थानीय व्यापारीको बार्गेनिङले उनीहरूलाई समस्या पार्छ । नगरपालिकाले उस्तै दुःख दिन्छ । बोरा बोकेर तरकारी फिर्ता लिएर हिँड्नपर्ने बाध्यता पनि हुने उनीहरूले बताए ।

प्रकाशित : श्रावण १२, २०७६ ०९:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×