चिनियाँ प्राविधिक आएनन्, कुलेखानी तेस्रोको उत्पादन अनिश्चित

सुवास बिडारी

मकवानपुर — चिनियाँ प्राविधिक टोली तोकिएको समयमा नआउँदा कुलेखानी तेस्रोको परीक्षण उत्पादन अनिश्चित बनेको छ । असार मसान्तबाट कुलेखानी तेस्रोको परीक्षण उत्पादन सुरु हुने भने पनि निर्माणको ठेक्का पाएको चीनको जेजियाङ जियालिङ कम्पनीले समयमै प्राविधिक नल्याउँदा परीक्षण उत्पादन अनिश्चित बनेको हो । 

असार दोस्रो साता नै विद्युत् गृहमा जडान गरिएका उपकरणहरूको पहिलो चरणको परीक्षण सफल भइसकेको छ । अन्तिम परीक्षणका लागि आवश्यक प्राविधिक समयमा नआउँदा उत्पादन परीक्षण सुरु गर्न नसकिएको आयोजना प्रमुख सुवास मिश्रले जानकारी दिए । ‘हामीले काम लगाउने हो । चीनबाट ल्याउनुपर्ने प्राविधिकहरूलाई ठेक्का पाएको कम्पनीले नल्याउँदा फेरि पनि तोकिएको समयमा परीक्षण उत्पादन गर्न सकिएन,’ उनले भने ।

मिश्रका अनुसार आयोजना कार्यालय असार मसान्तसम्ममा परीक्षण उत्पादन सुरु गर्ने तयारीमा थियो । ‘धेरैपटकको प्रयासपछि असार अन्तिम साताको म्याद तोकिए पनि ठेक्का पाएको कम्पनीले गम्भीरतापूर्वक काम नगर्दा समस्या भयो,’ उनले भने । चिनियाँ प्राविधिकहरूले टेस्टिङ गरेपछि परीक्षण कार्य सकिनेछ ।

मिश्रका अनुसार उत्पादनसँगै राष्ट्रिय प्रसारणमा जोड्नका लागि एउटा टावर निर्माण गर्ने र तार तान्ने काम बाँकी छ । ‘प्राविधिक परीक्षण सकिँदासम्म टावर निर्माण सम्पन्न हुन्छ । अब मिति नै तोकेर हामी कहिलेबाट राष्ट्रिय प्रसारणमा जोडिन्छ भनेर भन्न सक्दैनौं । हाम्रो हातको कुरा नै रहेन,’ आयोजना प्रमुख मिश्रले भने ।

उनका अनुसार एउटा टावरको २० प्रतिशत काम मात्रै सकिन बाँकी छ । यस आयोजनाको सिभिल र मेकानिकलतर्फको काम अन्तिम चरणमा पुगेको छ । ‘सिभिल र इञ्जिनियरिङको काम परीक्षण उत्पादन भएसँगै पूरा हुनेछ । त्यसैले ठेकेदार कम्पनीले परीक्षण उत्पादन सुरु नगरेसम्म बाँकी काम गर्न मिल्दैन,’ मिश्रले भने ।

वार्षिक सरदर ४० दशमलव ६५ गिगावाट आवर विद्युत् उत्पादन गर्ने क्षमता रहेको यस आयोजनाको काम सन् २०१२ मा सम्पन्न गर्ने लक्ष्यका साथ सन् २००८ अप्रिल २७ देखि सुरु भएको थियो । आयोजना ठेकदार कम्पनी, प्राधिकरणको ढिलासुस्ती र स्थानीयवासीको अवरोधका कारण तोकिएको समयमा काम सम्पन्न नहुँदा पटकपटक म्याद थप्न नेपाल विद्युत् प्राधिकरण बाध्य हुँदै आएको छ । करिब २ अर्ब ४३ करोडमा निर्माण सम्पन्न गर्ने लक्ष्य थियो । परियोजनाको लागत वृद्धि भएर ४ अर्ब ६३ करोड पुगे पनि अझै उत्पादन मिति भने सुनिश्चित भइनसकेको हो ।

पहिलो र दोस्रो पूर्ण क्षमतामा
कुलेखानी जलविद्युत् आयोजनाको पहिलो र दोस्रो युनिट भने पूर्ण क्षमतामा सञ्चालनमा ल्याइएको छ । नेपाल विद्युत् प्राधिकरणको पावर ब्याकअपका रूपमा रहेको यो आयोजना गत सोमबारदेखि पूर्ण क्षमतामा सञ्चालनमा ल्याइएको हो ।

पूर्ण क्षमतामा सञ्चालनमा आउँदा पहिलोबाट ६० र दोस्रोबाट ३२ गरी ९२ मेगावाट विद्युत् उत्पादन भइरहेको नेपाल विद्युत् प्राधिकरण कुलेखानी प्रथम आयोजका प्रमुख रामकुमार यादवले जानकारी दिए ।

उनका अनुसार सामान्य अवस्थामा कुलेखानी जलविद्युत् आयोजना केन्द्र प्रसारणमा भार व्यवस्थापनका लागि अत्यावश्यक बेलामा मात्रै सञ्चालनमा ल्याइन्छ । जलाशयमा पानीकोसतह बढ्न थालेपछि पानीको सतह घटाउनका लागि पनि यसको सदुपयोग गरेको आयोजनाका कर्मचारीहरूको भनाइ छ ।

प्रकाशित : श्रावण ६, २०७६ ०८:४४
ADVERTISEMENT
प्रतिक्रिया
पठाउनुहोस्
ADVERTISEMENT

छिटो कार्य सम्पादन गर्न अध्ययन

माधव ढुंगाना

भैरहवा — विश्व भन्सार संगठनको मापदण्डका आधारमा भन्सार प्रक्रियालाई सरल र छिटो बनाउन विभागले अध्ययन थालेको छ । विभागले यहाँस्थित भैरहवा र वीरगन्ज भन्सारमा आइतबारदेखि ट्रेस सर्भे तथा अध्ययन सुरु गरेको हो ।

सर्भेबाट मालवाहक गाडी भन्सार प्रवेश गरेदेखि सबै प्रक्रिया पूरा गरेर बाहिरिँदासम्म धेरै समय लाग्नुको कारण पत्ता लगाएर सुधार गरिनेछ ।

यस अवधिमा प्रश्नावलीको माध्यमबाट विभिन्न निकायमा सर्भेक्षण गरिनुका साथै भन्सार प्रक्रियासँग सरोकार राख्ने विभिन्न निकायमा लाग्ने समय अध्ययन गरिनेछ । भैरहवा भन्सार अध्ययनमा खटिएका विभागका निर्देशक मुक्ति आचार्यले अध्ययनले विश्व भन्सार संगठनको मापदण्डअनुसार कार्य सम्पादन गरी सेवाग्राहीलाई सुविधा दिलाउन सुधारमा सघाउने विश्वास गरिएको बताए ।

‘एउटा गाडी भन्सारमा प्रवेश भएपछि प्रक्रिया पूरा गरेर बाहिरिँदा कहाँ कति समय लाग्ने रहेछ, त्यसबारे अध्ययन गरिनेछ,’ उनले भने, ‘समय पत्ता लागेपछि कुन ठाउँमा कस्तो सुधार जरुरी रहेछ, त्यसको खोजी गरिनेछ ।’ अध्ययनका लागि विभागबाट छजनाको टोली खटिएको उनले जनाए ।

सन् २०१७ मा विभागले मेची र विराटनगर भन्सारमा यस्तो अध्ययन गरिसकेको छ । ती दुई भन्सारमा अध्ययन गर्दा एउटा गाडी प्रवेश भएपछि सबै प्रक्रिया पूरा भई बाहिर निस्किन सरदर १८ घण्टा लाग्ने अध्ययनले देखाएको थियो ।

भन्सारमा मात्रै साढे २ घण्टा समय लाग्ने र बाँकी आयातकर्ता तथा भन्सार एजेन्टले सामानको घोषणा गर्दा, बैंकिङ प्रक्रिया, प्लान्ट तथा पशु क्वारेन्टाइन, खाद्य परीक्षण, यार्डमा लाग्ने अपरेटरको समयलगायतमा लाग्ने गरेको देखिएको थियो । यस वर्ष वीरगन्ज र भैरहवा भन्सारमा अध्ययन गरिएपछि भन्सारमार्फत हुने नेपालको करिब ९० प्रतिशत व्यापारलाई समेटिने भन्सार निर्देशक आचार्यले बताए ।

‘कुन ठाउँमा धेरै समय लाग्ने रहेछ, त्यसको खोजी गरिनेछ,’ उनले भने,‘आवश्यक परेमा भन्सार ऐन, भन्सारमा लागू गरिएको कम्प्युटर प्रणालीमा समेत संशोधन गरिनेछ ।’ भन्सार प्रशासनभित्रको आन्तरिक सुधार गर्नुपरेमा पनि समस्या पत्ता लगाई समाधानको उपाय खोजिने उनले बताए । नेपालको भन्सारमा सरदर ८५ प्रतिशत काम एकै दिनमा सम्पन्न हुने गरेको अध्ययनले देखाएको छ ।

प्रकाशित : श्रावण ६, २०७६ ०८:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×