सवारी जाम हटाउन राजमार्ग स्तरोन्नति

धादिङको धुनीबेंसी नगरपालिकाले राजधानी प्रवेशद्वार मानिने राजमार्गको सवारी जाम हटाउन स्तरोन्नति र वैकल्पिक सडक अवधारणा ल्याएको छ
हरिहरसिंह राठौर

(धादिङ) — राजधानीको मुख्य प्रवेशद्वार मानिने राजमार्गमा नियमितजसो भैरहने सवारी जाम हटाउन धुनीबेंसी नगरपालिकाले आगामी आर्थिक वर्षका लागि उल्लेख्य बजेट विनियोजन गरेको छ । धार्के खानीखोलादेखि नागढुंगासम्मको करिब ३० किमि सडकमा एउटै सवारी साधन बिग्रेमा घण्टौं सडक जाम हुन्छ । नगरपालिकाले राजमार्ग स्तरोन्नति र वैकल्पिक सडक अवधारणाअनुसार बजेट विनियोजन गरेको हो ।

सीसीटीभीमा सडक जाम नियाल्दै प्रमुख बालकृष्ण आचार्य । तस्बिर : हरिहरसिंह/कान्तिपुर

सीतापाइला–धार्के सडकलाई केन्द्र वा प्रदेश कुन सरकार मातहत राख्ने अलमलले काममा ढिलाइ भएको नगरप्रमुख बालकृष्ण आचार्यले बताए । त्रिभुवन राजपथको विकल्प तत्काल खोजी गर्नुपर्ने उनको भनाइ छ ।

नियमित भइरहने सवारी जामको विकल्प धार्के–भीमढुंगा–सीतापाइला २६ किमि कच्ची सडकलाई स्तरोन्नति गरी कालोपत्रे गरिने योजना नगरपालिकाले अगाडि सारेको छ ।


सडकतर्फ धुनीबेंसी नगरपालिकाको ७ करोड २४ लाख २० हजार रकमबाट ५५ वटा सडक र संघ एवं प्रदेशमार्फत ७ करोड ५० लाख रकमबाट ७ सडक गरी ६२ वटा सडकमा १४ करोड ७४ लाख २० हजार रुपैयाँ बराबरको बजेट विनियोजन गरेको छ ।


संघीय राजधानी काठमाडौंलाई देशका अन्य भागसँग जोड्ने मुख्य राजमार्ग यही नगरपालिका हुँदै जाने र प्राथमिकता प्राप्त काठमाडौं–नौबिसे सुरुङमार्गको मुख्य प्रवेशविन्दुसमेत यही नगरपालिकामा रहेकाले यस नगरलाई गेटवे सिटी–धुनीबेंसीको रूपमा विकास गर्ने लक्ष्यका साथ सडक पूर्वाधार विस्तारलाई उच्च प्राथमिकता दिइएको छ ।


नगरप्रमुख आचार्यले भूकम्पपछि राजधानीका अधिकांश इँटा, ग्यास, औषधि र सिमेन्ट उद्योगहरू धुनिबेंसीमा थपिँदै गएर खेतीयोग्य जमिन मासिँदै गएको बताए । ‘खेतीयोग्य जमिनमा उद्योग स्थापना गर्न कडाइ गरिनेछ,’ नगरप्रमुख आचार्यले भने ।


नगरपालिका उपप्रमुख निरु खरेलले आगामी आर्थिक वर्षका नीति, कार्यक्रम र योजना कार्यान्वयन गर्न ७१ करोड ८७ लाख रुपैयाँ विनियोजन गरिएको बताइन् । कुल विनियोजनमध्ये चालु खर्चतर्फ ३३ करोड ३३ लाख ६१ हजार रुपैयाँ र पुँजीगततर्फ ३८ करोड ५३ लाख ३९ हजार रुपैयाँ विनियोजन गरिएको छ ।

प्रकाशित : असार २२, २०७६ ०९:५३
प्रतिक्रिया
पठाउनुहोस्

सामुदायिक वनमा तेजपात

कान्तिपुर संवाददाता

तनहुँ — जिल्लाको म्याग्दे गाउँपालिका–५ स्थित तीनवटा सामुदायिक वनलाई तेजपातको पकेट क्षेत्र बनाउन लागिएको छ । डिभिजन वन कार्यालय तनहुँले मल्याङ, कवादी र सालडाँडा सामुदायिक वन क्षेत्रलाई समेटेर पकेट क्षेत्र बनाउन लागेको हो । 

थोरै मिहिनेत र छोटो अवधिमा राम्रो आम्दानी हुने भएकाले सामुदायिक वनलाई सबल र आत्मनिर्भर बनाउने उद्देश्यले यस क्षेत्रमा खाली रहेको जग्गामा तेजपात रोपेर पकेट क्षेत्र बनाउन लागिएको डिभिजन वन कार्यालय तनहुँका सहायक अधिकृत बाबुराम उप्रेतीले बताए ।

गत वर्ष ११ हेक्टर क्षेत्रफलमा १७ हजार ५ सय तेजपातको बिरुवा रोपिसकिएको उप्रेतीले जानकारी दिए । ‘तेजपातको पकेट क्षेत्र बनाउने उद्देश्यअनुरूप यसवर्ष १० हेक्टर क्षेत्रफलमा १६ हजार बिरुवा लगाउने योजना रहेको छ,’ उनले भने । तेजपातबाट हुने आम्दानी तीनवटै सामुदायिक वनले उपभोग गर्दै शतप्रतिशत आयआर्जन गर्न पाउने व्यवस्था मिलाइएको छ ।

वन कार्यालयले आफ्नै नर्सरीमा उत्पादित तेजपातका बिरुवा सामुदायिक वनलाई प्रदान गरेको छ । साथै त्यसको उचित संरक्षण र संवर्द्धन गर्ने अधिकार पनि सामुदायिक वनलाई नै प्रदान गरिएको छ ।

एउटा तेजपातको बिरुवाको बजार मूल्य १० रुपैयाँ पर्ने भए पनि डिभिजनले नि:शुल्क उपलब्ध गराएको छ । उत्पादन भएका तेजपातको कच्चा पदार्थलाई प्रशोधन गर्न शुक्लागण्डकी नगरपालिकामा २० लाखको लागतमा ‘प्रोसेसिङ युनिट मेसिन’ ल्याएर जडान गर्ने काम सुरु भइरहेको डिभिजन वन कार्यालयका प्रमुख केदार बरालले जानकारी दिए ।

तीनदेखि चार वर्षको अवधिमा तेजपातको उत्पादन हुने भएकाले यसको कच्चा पदार्थ प्रशोधनका लागि नगरपालिकास्थित कृषि सहकारी संस्थाले चासो देखाएको वन कार्यालयले जनाएको छ ।

उक्त सहकारीले समेत व्यावसायिक रुपमा तेजपात लगाएको छ । डिभिजन प्रमुख बरालका अनुसार सहकारी र सामुदायिक वनमा उत्पादन भएको तेजपात किनेर ‘प्लान्ट’ निर्माण गर्ने योजना बनाइएको छ । प्रशोधित तेजपात जर्मन, इटली र स्वदेशकै विभिन्न जडीबुटी कम्पनीमा माग रहेकाले बिक्रीको चिन्ता नरहेको बताइएको छ ।

प्रकाशित : असार २२, २०७६ ०९:५०
पूरा पढ्नुहोस्
प्रतिक्रिया
पठाउनुहोस्
×