विषादी परीक्षणपछि भित्रियो भारतीय तरकारी

कान्तिपुर संवाददाता

पर्सा — आयातकर्ताले विषादी अवशेष परीक्षण रिपोर्ट ल्याएपछि वीरगन्ज भन्सार कार्यालयले भारतबाट आयातित फलफूल र तरकारीको जाँचपास थालेको छ । कार्यालयका सूचना अधिकृत मनीष महतोका अनुसार आयातकर्ताले सर्लाहीको नवलपुरस्थित विषादी अवशेष द्रुत विश्लेषण प्रयोगशाला इकाईमा परीक्षण गराएर त्यसको प्रतिवेदन ल्याउन थालेपछि आयात खोलिएको हो ।

‘सोमबार राति करिब साढे ८ बजे नौवटा गाडी र आठवटा ट्रकमा तरकारी र फलफूल भित्रिएका छन्,’ उनले भने, ‘आयातकर्तालाई प्रयोगशालामा जान हामीले पत्रका साथ पठाइरहेका छौं, आलु–प्याजको हकमा पनि आयातकर्ताले यो परीक्षण गर्ने प्रयास गरी रहेका छन् ।’ प्लान्ट क्वारेन्टाइन परीक्षण वीरगन्जमै हुने भएकाले त्यसको हकमा समस्या छैन ।

यसअघि वाणिज्य विभागको परिपत्रअनुसार शुक्रबारदेखि भारतबाट हरियो तरकारी तथा फलफूलको आयात गर्दा प्लान्ट क्वारेन्टाइन र विषादी अवशेष परीक्षण गर्ने अनिवार्य व्यवस्थाले हरियो तरकारी र फलफूलको आयात ठप्प भएको थियो ।

वीरगन्ज नाका मुलुककै सर्वाधिक तरकारी तथा फलफूल आयात हुने नाका हो । भारतको बिहार, उत्तरप्रदेश, पश्चिम बंगाल, गुजरात राज्यबाट यो नाका हुँदै मौसमी तथा बेमौसमी हरियो तरकारी आयात हुन्छ ।
रतकै जम्मुकस्मिर तथा अन्य राज्यमा उत्पादित स्याउलगायत विभिन्न फलफूलसमेत यसै नाका भएर भित्रिने गरेको छ । यो नाका हुँदै सामान्यतया दैनिक ७ देखि १० गाडीसम्म हरियो तरकारी र फलफूल आयात हुँदै आएको छ ।

प्रकाशित : असार १०, २०७६ १९:३२
ADVERTISEMENT
प्रतिक्रिया
पठाउनुहोस्
ADVERTISEMENT

नक्कली मायामा साढे ४ लाख स्वाहा !

जनकराज सापकोटा

काठमाडौँ — दोलखा शैलुङका २४ वर्षीय हरिबहादुर कार्कीलाई सुन्दर तस्बिर भएकी अपरिचित केटीले साथी बनाउन अनुरोध पठाइन् । नेपाली सेनाका जवान कार्की राम्री केटीको फोटो देखेर मख्खै परे । उनलाई गाउँकै कल्पना बस्नेत भुजेलले फेसबुक म्यासेन्जरबाट उकासिन, केटी राम्री छे । अघि बढ्दा हुन्छ ।

केटीले औधी मन पराउने कुरा कल्पनाले बताएपछि अविवाहित हरि मख्ख परे । उनीहरुबीच केही महिनासम्म लगातार सामाजिक सञ्जाल र फोनमा कुरा भयो ।

मायाप्रिती चलिरहेकै बेला एक दिन कल्पनाले सुनको लकेट ल्याएर हरिलाई दिँदै भनिन्, ‘तिम्री मायालुले पठाइदिएको ।’ मायालुबाट उपहार पाएपछि हरि त्यसै खुसी भए । माया झागिँदै गएका बेला एकदिन कल्पनाले भनिन्, ‘तिमीलाई माया गर्ने केटी दुर्घटनामा परी घाइते भएर अस्पतालमा उपचार गराइरहेकी छे । उपचार खर्च पठाइदिनुस् ।’ हरिले केही नसोची पटक–पटक गरेर मनी ट्रान्सफरमार्फत् ४ लाख ५५ हजार रुपैयाँ उपचार खर्च पठाइदिए । खर्च पठाइरहे पनि उनले माया गरेकी केटीसँग कुरा गर्न पाएनन् । हरिले एकदिन कल्पनालाई भने, ‘माया गर्ने केटीलाई भेट्नुपर्‍यो ।’ त्यसपछि कल्पना तर्किन थालिन् । कल्पनाले एकदिन सुनाइन्, ‘तिमीलाई माया गर्ने केटीको त उपचारको क्रममा भारतमा मृत्यु भयो ।’

त्यसपछि हरिलाई लाग्यो, कतै मायाको खेल नक्कली त थिएन । हरिले महानगरीय प्रहरी अपराध महाशाखामा घटनाको विवरण टिपाए । प्रहरी अनुसन्धानबाट खुल्यो, २३ वर्षीय कल्पनाले नै नक्कली फेसबुक आइडी खोलेर हरिसँग मायाको नाटक पनि गर्ने दोहोरो भूमिका खेलेकी रहिछन् । महाशाखाका एसपी सुशीलसिंह राठौरले यो ठगीको अनौठो घटना भएको सुनाए ।

राठौरका अनुसार कल्पनाले ठग्नकै निम्ती सुनजस्तै देखिने नक्कली सिक्री किनेर मायालुले पठाइदिएको भनेर हरिलाई दिएको तथ्य खुलेको बताए । प्रहरीले कल्पनालाई भक्तपुरको बालकोटबाट पक्राउ गरी ठगी मुद्दामा कारबाही अगाडि बढाएको छ ।

गत शनिबारमात्रै प्रहरीले फेसबुकमार्फत् नक्कली मायको नाटक रची भारतीय नागरिक जैन श्रीपालसँग २३ लाख ठगेको आरोपमा महोत्तरी औरी नगपालिका १ घर भई काठमाडौंको नरेफाँटमा बस्ने २१ वर्षीय युवती डायन सेकेन्डलाई पक्राउ गरेको थियो । यी दुवै घटनामा देखिने समानता भनेको, सामाजिक सञ्जालको प्रयोग र मायाको नाटक गरी पैसा धुत्ने खेल देखिन्छ ।

डायनले आफू सिंगापुरे नागरिक भएको बताउँदै भारत महाराष्ट्रका ३८ वर्षीय जैनसँग प्रेमको नाटक गरी काठमाडौं बोलाएर त्यतिका धेरै रकम ठगी गरेकी थिइन् । महाशाखाका एसएसपी सहकुल थापाले पछिल्ला घटनाहरुले ठगीको नयाँ प्रवृत्ति बढिरहेकोतर्फ संकेत गरेको बताए । उनले भने, ‘सामाजिक सञ्जाललाई हतियार बनाएर छिटो धनी बन्न खोज्ने प्रवृत्तिले अपराध जन्माइरहेको छ ।’

प्रकाशित : असार १०, २०७६ १९:३१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT