एउटै वडामा ६३ उद्योग

रूपा गहतराज

नेपालगन्ज — बाँकेको जानकी गाउँपालिका–६ गनापुरमा ६३ उद्योग स्थापना भएका छन् । ४४ वटा सञ्चालनमा र १९ सञ्चालनको तयारीमा छन् ।

नेपालगन्ज औद्योगिक क्षेत्रमा ३० वटा मात्रै सञ्चालनमा भने गनापुरमा स्वस्फूर्त रूपमा सिमेन्ट, आइरन, खाद्य, इँटा, जडीबुटी, रोजिन, औषधिजस्ता आन्तरिक खपत र निर्यातमा महत्त्व राख्ने ठूला उद्योग स्थापना भएका हुन् । नेपालगन्ज–कोहलपुर सडक खण्डसँगै जोडिएको गनापुरमा लहरै उद्योग स्थापना भएका छन् ।

जानकी गाउँपालिका–६ का वडाध्यक्ष सुरेश अहिरले राजमार्गसँग जोडिएको र नेपालगन्ज उपमहानगरपालिकाबाट नजिक भएकाले गनापुरमा उद्योग थपिने क्रम बढेको बताए । यहाँ स्थापित ६३ मध्ये ६ उद्योग अहिले बन्द अवस्थामा र पाँच नयाँ उद्योग खुल्ने क्रममा छन् ।

बाँकेको जानकी गाउँपालिकामा पछिल्लो समय नयाँ नयाँ उद्योग थपिँदै गएको गाउँपालिका अध्यक्ष रामनिवास यादवले बताए । गाउँपालिकाले उद्योगमैत्री नीति अपनाउँदै गनापुर क्षेत्रलाई औद्योगिक क्षेत्रका रूपमा विकास गरिने उनले बताए ।

नेपालगन्ज उपमहानगरपालिका भित्र ठूलो उद्योग खोल्नका लागि आवश्यक पर्ने जग्गाको अभाव छ । पाइहाले पनि महँगो पर्छ । ‘त्यसको विकल्पमा उपमहानगरपालिकासँगै जोडिएको र राजमार्गको छेउमै रहेको जानकी गाउँपालिकामा पर्याप्त जग्गा सुलभ मूल्यमा पाउन सहज छ,’ गाउँपालिका अध्यक्ष यादवले भने, ‘त्यसैले उद्योग खोल्दा सबैको रोजाइ यो गाउँपालिका हुने गरेको छ ।’

प्रकाशित : जेष्ठ २५, २०७६ ०८:२४
प्रतिक्रिया
पठाउनुहोस्

घरबासमा डेढ लाख पर्यटक

आश गुरुङ

लमजुङ — ‘स्मार्ट भिलेज’ का रूपमा अघि सारिएको घलेगाउँमा १९ बर्षमा डेढलाख पर्यटक भित्रिएका छन् । पर्यटकीय आकर्षण थपिदैं गएपछि आन्तरिक तथा बाह्य पर्यटकको आगमन बढेको हो । 

लमजुङको क्व्होलासोंथर गाउँपालिकाको घलेगाउँ । तस्बिर : आश/कान्तिपुर 

गाउँमा बास बस्न आउनेको तथ्यांक होमस्टेले मासिक रूपमा अन्नपूर्ण संरक्षण क्षेत्र आयोजना (एक्याप) द्वारा सञ्चालित चेकपोस्टमा बुझाउँछ । चेकपोस्टले होमस्टे सञ्चालन वर्ष सन् २००१ (विसं. २०५७) बाट घलेगाउँमा बास बस्ने पर्यटकको तथ्यांक लिन थालेको हो । १९ वर्षको अवधिमा १ लाख ६५ हजार १ सय ५२ पर्यटकले घलेगाउँमा बास बसेका छन् ।

यसमा बाह्य पर्यटक ५ हजार ६ सय ९९ छन् । पर्यटन व्यवस्थापन समिति, ग्रामीण पर्यटन घलेगाउँका अध्यक्ष प्रेम घलेका अनुसार २०५६ देखि स्थानीयले पर्यटन प्रवर्द्धनका कार्यक्रम सञ्चालन गरेका थिए । १२ घरबाट सञ्चालन गरिएको होमस्टे अहिले ३४ घरमा पुगेको छ । ‘सुरुमा पर्यटकीय गाउँ भयो । त्यसपछि सार्क भिलेज भयो । अहिले स्मार्ट भिलेजका रूपमा अघि बढाइएको छ,’ उनले भने, ‘पर्यटक आगमन दिनानुदिन बढेको छ ।’ गत वर्ष सन् २०१८ भरि घलेगाउँ आउने पर्यटक यस वर्ष सन् १०१९ को आधा महिनामै आइसकेको उनले बताए ।

घलेगाउँ चेकपोस्टकी पर्यटक सहायक ललिता गुरुङका अनुसार सन् २०१८ मा १७ हजार १ सय २ पर्यटक भित्रिएकामा यस वर्ष सन् २०१९ को ६ महिनाको अवधिमा मात्रै १८ हजार ७ सय ६२ पर्यटक भित्रिसकेका छन् । यस अवधिमा २ सय ४६ बाह्य पर्यटक भित्रिएका छन् ।

गत वर्ष ६६३ आएका थिए । उनका अनुसार सन् २००८ बाट बाह्य पर्यटकको तथ्यांक लिन थालिएको हो । २०७२ को भूकम्प र नाकाबन्दीका कारण पर्यटन क्षेत्रमा असर पर्दा घलेगाउँमा आउने पर्यटकको संख्या हवात्तै घटेको थियो । सन् २०१५ (आव २०७१/७२) मा २५ हजार ५ सय ७७ पर्यटक भित्रिएकामा सन् २०१६ मा १३ हजार ४ सय ५ मात्रै पर्यटक आएका थिए ।

सन् २०१७ मा ११ हजार २ मात्रै पर्यटक भित्रिएका थिए । सन् २०१८ बाट भने पर्यटक आगमन बढेको पर्यटन सहायक गुरुङले बताइन् । ‘भूकम्प गयो, नाकाबन्दी भयो । गाउँमा पर्यटक आएनन् । अहिले शान्ति भएको छ । गाउँमा पर्यटक धमाधम आएका छन्,’ उनले भनिन् ।

घलेगाउँमा सन् २००१ (आव २०५७/०५८) मा ६२ जना पर्यटक बास बसेका थिए । २००२ मा ७५, २००३ मा १ सय ३०, २००४ मा २ सय २५, २००५ मा ३ सय ४, २००६ मा ५ सय ८ र २००७ मा ८५५ पर्यटक घलेगाउँ आएका थिए । २००८ देखि पर्यटक आगमन ४ अंक र २०११ बाट ५ अंकले आगमन भएको थियो ।

सन् २००८ मा १ हजार ७ सय ८०, २००९ मा ३ हजार २ सय ९१ र २०१० मा ६ हजार ४ सय ५२ पर्यटक घलेगाउँ आएका थिए । यस्तै सन् २०११ मा १० हजार ८ सय ६९, २०१२ मा १० हजार ५५, २०१३ मा २० हजार ५ सय ९३ र सन् २०१४ मा २४ हजार १ सय ५ पर्यटक घलेगाउँभित्रिएका थिए ।

पर्यटन व्यवस्थापन समितिका सचिव उमलबहादुर विकका अनुसार स्वच्छ खानेपानी, सडक, बिजुली, इन्टरनेट, टेलिफोन, सरसफाइ, व्यवस्थापन सबै पक्ष राम्रो भएकाले पर्यटक घलेगाउँ आउन रुचाउँछन् । ‘कतिपय पर्यटक अग्रिम जानकारी नदिईकन आउनुहुन्छ । हामीले फूलमालाले स्वागत गर्न सकेका छैनौं । जाने बेलामा भने टीका र फूलमाला लगाएर बिदाइ गर्छौं,’ उनले भने ।

समितिका कार्यालय सचिव दीर्घ घलेका अनुसार कहिलेकाहीँ तीन सयभन्दा बढी पर्यटक एकैदिन आइदिँदा व्यवस्थापनमा हम्मे पर्छ । ‘धेरैपटक होमस्टेभन्दा बाहिरका घरमा लगेर पर्यटकलाई राख्ने गरेका छौं । घलेगाउँबाट माछापुच्छ्रे, अन्नपूर्ण, लमजुङ, हिमालचुली, मनासलु, गणेशलगायत दर्जन हिमशृंखला देख्न सकिन्छ ।

घलेगाउँ आउने पर्यटकलाई उनीहरूको चाहनाअनुरूप गुरुङ संस्कृति घाँटु, सोरठी, कृष्णचरित्रलगायत पौराणिक नृत्य देखाउने गरिन्छ । गाउँमा नमुना चिया बगान, तिजे उत्तरकन्या मन्दिर, क्व्होइँबो धीं (गुरुङ पुरोहितको पाठशाला) छ । सूर्योदय र सूर्यास्तको मनोरम दृश्य, गोर्खा आर्मी पार्क, पर्यटन संग्रहालय, रंगाशालालगायतले घलेगाउँलाई आकर्षित बनाएको छ ।

प्रकाशित : जेष्ठ २५, २०७६ ०८:२३
पूरा पढ्नुहोस्
प्रतिक्रिया
पठाउनुहोस्