नाका सम्बोधनले स्थानीय खुसी

राजबहादुर शाही

मुगु — जिल्लाको तिब्बत जोड्ने उत्तरी नाक्चेनाङला नाका आगामी बजेटमा समेटिएपछि स्थानीयले खुसी व्यक्त गरेका छन् । लामो समयदेखि वर्षेनि न्यून बजेट विनियोजन गरी सडक निर्माणको काममा ढिलाइ हुँदा स्थानीय निरास थिए । 

बजेट भाषणमै पहिलोपल्ट उत्तरी नाकाबारे सम्बोधन भएपछि छिट्टै नाका सञ्चालन हुनेमा उनीहरू आशावादी छन् । मुगुको उत्तरी नाकालाई सरकारले सम्बोधन गरेपछि हर्षित भएको नागरिक सञ्जालका संयोजक चित्रबहादुर मल्लले बताए । ‘अब संघीय सरकारले निर्माणको कामलाई तीव्रता देओस्,’ उनले भने, ‘गमगढीदेखि तिब्बत सीमासम्म करिब ८५ किलोमिटर लम्बाइ रहेको नाकामा अहिलेसम्म १६ किलोमिटर मात्र ट्र्याक खोलिँदा हामी लामो समयदेखि निरास भएका थियौं, अब धेरै आशा पलाएको छ ।’

संघीय सरकारले यस वर्ष बजेटमै सम्बोधन गरेकाले छिटो नाका खुलेर दुई देशको व्यापार सुरु हुने आशा जागेको उद्योग वाणिज्य संघका अध्यक्ष कमल बुढाले बताए । ‘अब सरकारले नेपाली सेनालाई सडक निर्माणको जिम्मा दिन जरुरी छ,’ उनले भने, ‘सेनाले जिम्मा लिए लक्ष्यअनुसार नै सडक निर्माणको काम हुनेछ ।’ ठेक्का प्रवृत्तिले उत्तरी नाकाको काम कछुवाको गतिमा अगाडि बढेको उनको भनाइ छ । बजेट मन्तव्यमा पर्यटकीयस्थल राराको विकास र गमगढीदेखि रारासम्मको सडक मार्ग स्तरोन्नति गर्ने योजनासमेत समावेश भएकाले आफूहरू उत्साही भएको उनले जनाए ।

२०६३ सालदेखि सडक निर्माण सुरु गरिएको चीन जोड्ने सडकमा अहिलेसम्म करिब १० करोड रुपैयाँ बढी रकम खर्च भइसकेको छ । अति छोटो र सहज मानिएको यो सडक खोल्न सकिए कर्णाली प्रदेश र छिमेकी राष्ट्र चीनबीच व्यापारिक सम्बन्ध सुमधुर हुने देखिएको प्रतिनिधिसभा सदस्य मोहन बानियाँले बताए ।

उनका अनुसार आगामी वर्षका लागि सडकमा करिब ५० करोड रुपैयाँ बजेट विनियोजन गरिएको छ । ‘कार्यान्वयन कसरी हुन्छ ? त्यो हेर्न बाँकी छ,’ उनले भने, ‘अहिलेको बजेट भाषणबाट स्थानीयमा ठूलो आशापलाएको छ ।’

जिल्ला समन्वय समिति प्रमुख पूर्णबहादुर रोकायाले राराको विकास, सडकको स्तरोन्नतिदेखि चिनियाँ नाका खोल्ने विषय बजेट मन्तव्यमै समेटिनु सुखद् भएको बताए । उनले बजेट कार्यान्वयनमा समयमै ध्यान दिन जरुरी रहेको जनाए ।

तिब्बत जोड्ने सडक निर्माणको काममा वर्षौंदेखि लापरबाही हुँदा स्थानीयवासीलाई तिब्बती हाटबजारबाट दैनिक उपभोग्य वस्तु ओसारपसार गर्न घोडा, खच्चर र चौंरीको प्रयोगगर्नुपर्ने बाध्यता रहेको उनको भनाइ छ ।

प्रकाशित : जेष्ठ १८, २०७६ ०८:१४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

त्रिशूली 'थ्री ए’ को परीक्षण युनिट बन्द

कृष्ण थापा

नुवाकोट — राष्ट्रिय प्रसारण लाइनमा जोडिएको साता नबित्दै ६० मेगावाटको माथिल्लो त्रिशूली ‘थ्री ए’ जलविद्युत् आयोजनाको विद्युत् परीक्षण उत्पादन बन्द भएको छ । दोस्रो युनिट बनाउनुपर्ने र प्रसारण लाइनका काम बाँकी नै रहेकाले पहिलो युनिटबाट परीक्षणका रूपमा उत्पादित बिजुली बन्द गरिएको हो । 

जेठ २ गते नेपाल विद्युत् प्राधिकरणका कार्यकारी निर्देशक कुलमान घिसिङले नुवाकोटको किस्पाङ गाउँपालिका ५ सिम्लेस्थित कन्ट्रोल रूममा रहेको स्विच दबाएर आयोजनाबाट उत्पादित विद्युत् राष्ट्रिय प्रसारण प्रणालीमा जोडिएको घोषणा गरेका थिए । आयोजनाको विद्युत् सिम्लेमा रहेको विद्युत्गृहबाट २२० केभी डबल सर्किट प्रसारण लाइनमार्फत काठमाडौंको मातातीर्थमा रहेको सबस्टेसनमा जोडिएको छ ।

पहिलो युनिटबाट परीक्षणका रूपमा लगातार ७२ घण्टा विद्युत् उत्पादन गरिसकेको छ । उपकरण, सुरुङ, बाँधस्थलमा रहेका बालुवा थिग्राउने पोखरीका संरचनाहरूको पुनःपरीक्षण थालिएको छ । यो परीक्षण सकिएपछि आयोजनाबाट नियमित विद्युत् उत्पादन सुरु हुने आयोजनाले जनाएको छ । आयोजनाको दोस्रो युनिट (३० मेगावाट) असारको दोस्रो सातामा सञ्चालनमा ल्याउने गरी काम गरिरहेको प्राविधिकले बताए । आयोजना पूर्ण रूपमा सञ्चालनमा आएपछि ८ प्रतिशत ऊर्जा थप भई खपत हुनेछ ।

काठमाडौंको मातातीर्थसम्मको २२० केभी डबल सर्किट प्रसारण लाइनको निर्माण गरेको छ । यसबाट त्रिशूली नदी बेसिनमा निर्माणाधीन र निर्माण हुने जलविद्यत् आयोजनाको विद्युत् राष्ट्रिय प्रसारण प्रणालीमा जोड्न पूर्वाधारसमेत तयार भएको छ । कुल अनुमानित लागत १२ करोड ५८ लाख डलर रहेको आयोजनाको नेपाल सरकार एवं प्राधिकरणको लगानी र चिनियाँ एक्जिम बैंकको सहुलितपूर्ण ऋणमा निर्माण भएको हो ।

इन्जिनियरिङ, खरिद र निर्माण (ईपीसी) मोडलमा सिभिल विद्युत्गृह, बाँध, सुरुङलगायतका संरचना र इलेक्ट्रोमेकानिकल तथा हाइड्रो मेकानिकलको कामको ठेक्का सम्झौता चाइना गेजुवा ग्रुप अफ कम्पनीले सीजीजीसीसँग ०६७ साल जेठ दोस्रो साता गरेको थियो । प्रसारण लाइनको ठेक्का चाइना वाटर एन्ड इनर्जी (सीडब्लूई) ले ०७१ साल जेठ दोस्रो साता पाएको थियो ।

प्रकाशित : जेष्ठ १८, २०७६ ०८:१३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT