इलाम र कन्याम बगान पनि खुल्ने

शुक्रबार इलाम र कन्याम बगानका आन्दोलनरत श्रमिकहरुसँग श्रम, रोजगार तथा सामाजिक सुरक्षा मन्त्री गोकर्ण विष्ट र नेपाल चिया विकास निगमका अध्यक्ष सुवास संघाईले संयुक्तरुपमा चिया बगान खुलेको घोषणा गरेका हुन् ।

यसअघि झापालगायत क्षेत्रका बगान र कारखाना खुलेर सञ्चालनमा आएपनि यी दुई बगान बन्द थिए । श्रम मन्त्रालयका सचिव महेशप्रसाद दाहाल प्रदेश सभाका सदस्य सहित स्थानीय जनप्रतिनिधिसमेत सम्मिलित भेलामा बगान खुल्ने घोषण गरिएपछि श्रमिक उत्साहित भएका छन् । सरकारले स्थायीरुपमा चियाको समस्या समाधान गर्दै रोजगारीको अवसर र विदेशी मुद्रा आर्जनको स्रोत बनाउने मन्त्री बिष्टको भनाई थियो ।

आन्दोलनका कारण इलाम र कन्यामका स्थायी र पार्टटाइम गरी ३ सय श्रमिक समस्यामा थिए । गत वर्षको साउनमा सरकारले चिया श्रमिकको न्यूनतम् पारिश्रमिक मूल्य ३ सय ८५ रुपैयाँ तोकेको थियो । तर अहिलेसम्म पनि दैनिक २ सय ६५ रुपैयाँमा काम गरिरहनु परेको उनीहरुको गुनासो छ । श्रमिकहरुले साउन १ गतेदेखिकै बढेको ज्याला पाउनुपर्ने, दशैं पेश्कीलगायत अन्य सेवा सुविधा पाउनु पर्ने माग राखेका छन् ।

पहाडी बगानमा आम्दानी कम हुने र सरकारले पनि आफूहरुसँग सल्लाह नगरी सेवा सुविधा बढाएकाले थेग्नै नसक्ने अवस्थामा पुगेको निगमको जिम्मा पाएको त्रिवेणी संघाई ग्रुपको भनाई छ । सरकारले पनि व्यवस्थपनलाई बजारिकरण लगायतमा सघाउने भएपछि श्रमिक आन्दोलन टुंग्याउन सहमत भएको निगमका अध्यक्ष सुवास संघाईले बताए ।