कर्णाली करिडोरले छुँदै हुम्ला

जयबहादुर रोकाया

हुम्ला — चालु आर्थिक वर्षभित्रै हुम्ला पुग्ने गरी कर्णाली करिडोरको निर्माण तीव्र गतिमा भइरहेको छ । असार मसान्तभित्र करिडोर हुम्लाको दक्षिणी क्षेत्र ताजाकोट र अदानचुलीमा जोडिने निर्माण कम्पनीले जनाएको छ ।

करिडोरको कालिकोट खुलालुदेखि हुम्लाको सलीसल्लासम्मको खण्ड नेपाली सेनाले निर्माण गरिररहेको छ । उक्त खण्डमा पर्ने कवाडीखोलाको बेलिब्रिज (पुल) बन्ने बित्तिकै करिडोर अदानचुली गाउँपालिकाको दोमुख पुग्नेछ । ‘सेनाले पुल बनाउन थालेकाले हुम्ला अब छिट्टै कर्णाली करिडोरसँग जोडिने आशा पलाएको छ,’ हुम्ला कांग्रेस जिल्ला सभापति धनपति रोकायाले भने, ‘अहिले पनि हुम्ला र बाजुराको सीमा क्षेत्र धरलाचौरसम्म गाडी गुड्न थालेका छन् ।’ कवाडीखोलामा पुल निर्माणको काम तीव्र रूपमा भइरहेको उनले बताए ।


करिडोरको खुलालु–सिमकोट खण्ड २ सय किलोमिटर छ । सरकारले खुलालुदेखि हुम्ला, सलीसल्लासम्मको सडक निर्माण जिम्मा सेनालाई दिएको छ । सलीसल्लादेखि सिमकोटसम्मको खण्ड भने सडक विभागले ठेकेदारमार्फत गरिरहेको छ । यो खण्ड निर्माणका लागि ठेकेदार कम्पनीले हेलिकप्टरबाट स्काभेटर लगेर काम गरिरहेको छ ।


ठेकेदार तेजबहादुर महतले सजिलो ठाउँमा स्काभेटरबाट काम भए पनि कडा चट्टान भएको ठाउँमा भने विस्फोटक पदार्थबाट काम गर्नुपर्ने अवस्था रहेको बताए । ‘सेनाले विस्फोटक पदार्थ प्रयोगमा आनाकानी गरिरहेको छ,’ उनले भने, ‘यसले भने केही ढिलाइ हुन सक्छ ।’


कर्णाली करिडोरअन्तर्गतको हिल्सा–सिमकोट ९५ किलोमिटर खण्डमध्ये ७१ किलोमिटर ट्र्याक खुलिसकेको छ । यो खण्डमा गाडीसमेत गुडिरहेका छन् । दुई वर्षअघि नै हिल्सा–सिमकोट जोड्ने लक्ष्य रहे पनि च्याछडाको भीर फुटाउन नसक्दा ढिलाइ भइरहेको आयोजना कार्यालयका सूचना अधिकारी वीरेन्द्रबहादुर शाहीले बताए । भीर फुटाउन विस्फोटक पदार्थको समस्या रहेको उनले बताए ।


राष्ट्रिय सडक सञ्जालसँग नजोडिए पनि जिल्लाभित्र भने आआफ्नो गाउँमा सडक लग्ने होड नै चलेको छ । स्थानीय तहले पनि सडकलाई नै प्राथमिकता दिएका छन् । अर्कोतिर कर्णाली प्रदेश सरकार मातहतको पूर्वाधार विकास कार्यालयले पनि प्रदेश सरकारबाट प्रस्तावित ६ वटा सडकका लागि सर्भे र लगत स्टिमेट थालेको छ । यी सडकका लागि प्रदेश सरकारले १९ करोड रुपैयाँ विनियोजित गरेको कार्यालय प्रमुख पूर्णबहादुर रोकायाले बताए ।

प्रकाशित : वैशाख १५, २०७६ ०८:४६
प्रतिक्रिया
पठाउनुहोस्
ADVERTISEMENT

सुरु भयो शैक्षिक सत्र

जयबहादुर रोकाया

हुम्ला — फागुनबाट नयाँ शैक्षिक सत्र सुरु हुने हुम्लामा हिमपातका कारण चैत पहिलो सातादेखि विद्यालय खुलेका छन्  । माघ र फागुनमा पटकपटक भएको भारी हिमपातका कारण विद्यालय भवन हिउँले पुरिएका थिए  ।

तापक्रम बढेर विद्यालयमा जमेको हिउँ पग्लिएपछि पठनपाठन सुचारु भएको हो । हिउँ पग्लेर विद्यालय आउजाउ गर्न सहज भएपछि जिल्लाका सबै विद्यालय सञ्चालनमा आएको शिक्षा विकास तथा समन्वय एकाइ प्रमुख वर्ष फडेराले बताए ।

जिल्लाका सबै विद्यालयले फागुन २३ गतेसम्म विद्यार्थी भर्ना अभियान सञ्चालन गरेका थिए । २४ गतेपछि पढाइ सुरु गर्ने तालिका बनाए पनि हिमपातका कारण चैतबाट नियमित पढाइ हुन थालेको हो । विद्यालय सञ्चालनमा आए पनि दोस्रो सातादेखि भने पढाइ प्रभावित हुने भएको छ । फागुन ८ गतेदेखि एसईईको परीक्षा हुने भएकाले परीक्षा नसकिएसम्म पढाइ प्रभावित हुने भएको हो ।


हिमालपारिको बस्ती भनेर चिनिने लिमीका दुई आधारभूत विद्यालय भने वैशाखपछि मात्रै सञ्चालनमा आउनेछन् । लिमी आउजाउ गर्ने बाटो हिमपातका कारण बन्द भएकाले बर्सेनि हिउँ पग्लेर बाटो खुलेपछि मात्रै विद्यालय सञ्चालनमा आउने गरेका छन् । लिमी जिल्लाको सबैभन्दा बढी हिमपात हुने बस्ती हो । नाम्खा गाउॅपालिकाको लिमीका तीन बस्तीमा एक/एक विद्यालय भए पनि तिल गाउॅमा रहेको विद्यालय भने गत वर्ष नै बन्द भइसकेको छ ।

एकाइ प्रमुख फडेराले तिल गाउॅमा विद्यार्थी नै नभएकाले विद्यालय बन्द गरिएको जनाए । विद्यालय बन्द भएपछि दरबन्दीका शिक्षकलाई गाउँपालिकाअर्न्तगतका अन्य विद्यालयमा सरुवा गरिएको थियो । लिमीको हल्जी र जाङ गाउँमा दुई विद्यालय सञ्चालनमा छन् । यी दुबै विद्यालयले पाॅच कक्षासम्म अध्यापन गर्न पाउने अनुमति लिएका छन् । विद्यालयमा दुई/दुई शिक्षकको दरबन्दी छ ।


विद्यालय सञ्चालनमा आए पनि चंखेली र सर्केगाड गाउँपालिकामा रहेका विद्यालयमा भने पाठ्यपुस्तक पुगेका छैनन् । यी गाउँपालिकामा रहेका विद्यालयका लागि पुस्तक उपलब्ध गराउने जिम्मा लिएका एजेन्टले हिमपातका कारण ढुवानी गर्न नसकेको जनाउँदै आएका छन् । गाउँपालिकामा मुगुको गमगढी भएर पुस्तक ढुवानी हुने गरेका छन् । हिमपातका कारण बन्द भएको मुगुको नाग्मा–गमगढी सडक दुई दिनअघि मात्र सुचारु भएको छ ।

प्रकाशित : चैत्र ६, २०७५ १४:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×