बैंकमा ३९ अर्ब थपियो
काठमाडौँ — वाणिज्य बैंकहरुमा सोमबार मात्र करिब ३९ अर्ब रुपैयाँ निक्षेप थपिएको छ । स्थानीय तहको खातामा रहेको रकम मध्ये ५० प्रतिशत वाणिज्य बैंकमै राख्न पाउने व्यवस्थापछि एकै पटक उक्त रकम बैंकमा आएको हो ।
सरकारले गत साता नै ‘ग’ वर्गको खातामा रहेको स्थानीय तहको बचतको ५० प्रतिशत रकम सम्बन्धित बैंकलाई आफ्नो खातामै राख्न दिने निर्णय गरी कार्यान्वयनका लागि महालेखा नियन्त्रक कार्यालय र राष्ट्र बैंकलाई निर्देशन दिएको थियो । सोही निर्णय अनुसार सोमबार बैंकहरुले उल्लिखित रकम पाएका हुन् ।
‘सोमबार नै बैंकहरुले करिब ३९ अर्ब रुपैयाँ पाएका छन्,’ राष्ट्र बैंक बैकिङ विभाग प्रमुख झलक शर्मा आचार्यले भने,‘यो रकम सरकारी कारोबार गर्न अनुमति पाएका सबै वाणिज्य बैंकहरुमा गएको छ ।’ हाल २८ वटा वाणिज्य बैंक सञ्चालनमा रहे पनि २७ वटाले मात्र सरकारी कारोबार गर्न अनुमति पाएका छन् ।
सरकारको पछिल्लो निर्णयले करिब एकै पटक ठूलो रकम बैकिङ क्षेत्रमा थपिएकाले तरलता (लगानीयोग्य रकम) अवस्था सहज हुने बैंकर्स संघका अध्यक्ष ज्ञानेन्द्रप्रसाद ढुङगानाले बताए ।
प्रकाशित : मंसिर १७, २०७५ १७:१४