यती ‘कार्बन न्युट्रल एयरलाइन्स’

कान्तिपुर संवाददाता

काठमाडौँ — यती एयरलाइन्स मुलुकको पहिलो श्ून्य कार्बन उत्सर्जन (कार्बन न्युट्रल) उन्मुख एअरलाइन्स भएको छ । संयुक्त राष्ट्रसंघीय विकास काक्रर्यक्रम (यूएनडीपी) सँगको सहकार्यमा यतीले शुक्रबार राजधानीमा एउटा कार्यक्रम आयोजना गर्दै कार्बन न्युटरल एयरलाइन्सका रूपमा रूपान्तरण गर्ने कार्यको थालनी गरिएको जनाएको छ ।

कार्बन न्युटरल भनेको शून्य कार्बन उत्सर्जन गर्ने अभियान हो । तारा एयरका ६ वटासहित १४ वटा जहाज उडान गर्दै आएको यस कम्पनीका प्रमुख कार्यकारी अधिकृत उमेशचन्द्र राईका अनुसार नागरिक उड्डयन प्राधिकरण र राष्ट्रसंघीय विकास कार्यक्रमको सहकार्यमा यती एअरलाइन्स कार्बन न्युट्रलको दिशामा अघि बढ्ने नेपालकै पहिलो वायुसेवा हो । हाल यो अभियान यतीमा लागू भइसकेको छ भने तारामा सुरु भइसकेको छैन ।
‘नेपालमा यो नयाँ विषय हो, धेरैलाई यसबारे जानकारी नै छैन,’ नागरिक उड्डयन प्राधिकरणका महानिर्देशक सञ्जीव गौतमले भने । उनले यतीको यस निर्णयले उड्डयन क्षेत्रलाई वातावरणमैत्री बनाउने तथा हरित गृह ग्यास कम गर्ने राष्ट्रिय तथा अन्तर्राष्ट्रिय प्रयासमा योगदान पुर्‍याउन मद्दत हुने बताए ।
विश्वभर हुने कुल कार्बन उत्सर्जनमा हवाई यातायात क्षेत्रको हिस्सा २ प्रतिशत हाराहारी छ । प्रारम्भिक तथ्यांकअनुसार सन् २०१७ मा यती एअरलाइन्सले १८ हजार १ सय ३३ टन कार्बन उत्सर्जन गरेको थियो । यसको मुख्य स्रोत यसका वायुयानहरूले प्रयोग गर्ने इन्धन थियो । ‘यत्रो कार्बन न्युट्रलाइज गर्न ४ लाख ७० हजार रूख बिरुवालाई दस वर्षको समय अवधि लाग्छ,’ यतीले विज्ञप्तिमा भनेको छ ।
सन् ०१६ को दाँजोमा यसले ०१७ मा प्रति यात्रु ७ प्रतिशत र प्रतिकिमि ११ प्रतिशतका दरले कार्बन उत्सर्जन घटाएको दाबी गरेको छ । यसको जाँच यूएनडीपीले गर्ने गर्छ । कार्बन उत्सर्जन घटाउन यतिले जहाज (जेटस्ट्रिम) लाई हटाउँदै एटीआर विमान थप्ने, कम्पनीमा प्रयोग हुने कागज, हवाई उपकरण पुनप्र्रयोग गर्ने, हरेक वर्ष देशका विभिन्न भागमा रूख रोप्ने अभियान चलाउँदै आएको छ ।

प्रकाशित : माघ १५, २०७४ ०७:४५
प्रतिक्रिया
पठाउनुहोस्

रसुवागढीमा एकीकृत चेकपोस्ट

कान्तिपुर संवाददाता

रसुवा — रसुवागढी सीमामा शुक्रबारदेखि एकीकृत चेकपोस्ट सञ्चालनमा आएको छ । प्रिफयाब भवन निर्माण भएपछि चेकपोस्ट संचालनमा आएको हो । सीमामा रहेका सुरक्षा चेकपोस्ट, भन्सार र अध्यागमन कार्यालयमा भूकम्पले क्षति गरेको थियो । 

भूकम्प गएको ३२ महिनापछि भन्सार सुधार कार्यक्रमअन्तर्गत १ करोड ७ लाखको लागतमा ३ कोठे प्रिफयाब भवन निर्माण गरिएको हो । ६६ औं अन्तर्राष्ट्रिय भन्सार दिवसको अवसर पारेर शुक्रबारदेखि उक्त भवनमा एकीकृत चेकपोस्ट सञ्चालन गरिएको छ । प्रमुख जिल्ला अधिकारी चोमेन्द्र न्यौपानेले एकीकृत चेकपोस्टको उद्घाटन गरेका हुन् । निर्माण गरिएको एकीकृत चेकपोस्टमा अध्यागमन, भन्सार र सुरक्षा निकायका नेपाल प्रहरी र सशस्त्र प्रहरी रहने रसुवा भन्सार कार्यालयका प्रमुख भन्सार अधिकृत गोपाल कोइरालाले बताए । उनले भने, ‘एक–एक वटा कोठामा अध्यागमन, भन्सार र सुरक्षा निकायका नेपाल प्रहरी र सशस्त्र प्रहरी रहनेछन् ।’ नाका प्रवेश गर्ने बित्तिकै अध्यागमन र भन्सार कार्यालय हुनुपर्छ । सीमामा एकीकृत चेकपोस्ट सञ्चालन भएसँगै भन्सार तथा अध्यागमन कार्यालय खोज्दै हिँड्नुपर्ने बाध्यता हटेको प्रमुख जिल्ला अधिकारी चोमेन्द्र न्यौपानेले बताए ।

प्रकाशित : माघ १५, २०७४ ०७:४५
पूरा पढ्नुहोस्
प्रतिक्रिया
पठाउनुहोस्