काठमाडौं — सेयर कारोबार यस साता झण्डै ५६ प्रतिशतले बढयो । गत साता बजारमा २ अर्ब ३२ करोड ७ लाख रुपैयाँ बराबरको सेयर कारोबार भएकोमा यो साता बढेर ३ अर्ब ६१ करोड ५७ लाख रुपैयाँ पुगेको हो । गत साताको तुलनामा यो साताको कारोबार रकम ५५.८० प्रतिशतले बढी हो ।

करिब ३५ हजार ८ सय ५० कारोबारबाट १ सय ७७ कम्पनीका ६८ लाख ४ हजार १ सय ६० कित्ता सेयर खरिदविक्री भए । गत साता करिब २५ हजार कारोबारबाट १ सय ७१ कम्पनीका ४३ लाख ७७ हजार ३ सय ७० कित्ता सेयर खरिद बिक्री भएको नेप्सेले जनाएको छ ।

कारोबार रकम उच्च अंकले बढेपनि नेप्से परिसूचकमा भने कमी आएको छ । गत साताको तुलनामा यो साता समग्र नेप्से परिसूचक २४.२४ प्रतिशतले घटयो । आइतबार बजार खुल्दा १ हजार ५ सय ५४.५५ अंकमा रहेको नेप्से बिहीबार बन्द हुँदा १ हजार ५ सय ३०.३१ अंकमा छ । तर, साताको पहिलो दिनको तुलनामा नेप्से परिसूचक १०.६५ अंकले बढेको देखिन्छ । आइतबार नेप्से परिसूचक १ हजार ५ सय १९.६६ मा बन्द भएको थियो ।

साप्ताहिक कारोबारमा बैकिङ समूहको बजार हिस्सा ३९ प्रतिशत पुगेको छ । गत साता यो समूहको यस्तो हिस्सा ३५ प्रतिशत थियो । करिब एक महिना अघि २८ प्रतिशतको हाराहारीमा रहेको बैंकिङ समूहको हिस्सा पछिल्ला साताहरुमा बढदो क्रममा छ । सोही अवधिमा कुल कारोबारमा बिमा समूहको हिस्सा २०.४ प्रतिशत छ । गत साता कुल कारोबारमा बिमा समूहले १८.४७ प्रतिशत अंश ओगटेको थियो । यो साता लघुवित्त संस्थाको सेयर कारोबार हिस्सा उल्लेख्य रुपमा बढेको छ । गत साताको तुलनामा यो साता कुल कारोबारमा लघुवित्त समूह अन्तरगतका कम्पनीहरुको कारोबार हिस्सामा सामान्य कमी आएको छ । गत साता लघुवित्त कम्पनीहरुको हिस्सा साढे २०.८४ प्रतिशत थियो । यसैगरी, जलविद्युतको २.६८ प्रतिशत, संस्थापक सेयरको ७.३८ प्रतिशत र विकास बैंकको ७.८१ प्रतिशत रहेको नेप्सेले जनाएको छ ।

साप्ताहिक कारोबारमा बैकिङ, जलविद्युत र बिमा समूहका लगानीकर्ताको सम्पत्ति घट्यो । ती समूहको परिसूचक ऋणात्मक रहेपछि सेयरधनीको सम्पत्तिमा कमी आएको हो । पाँच दिनको कारोबारमा बिमा समूहको परिसूचक सबैभन्दा बढी १ सय ४२.५७ अंकले घटयो । यसैगरी, बैकिङ समूहको परिसूचक २२.४८, होटलको ३.९७, विकास बैंकको ६८.४८ र जलविद्युतको २२.१८ प्रतिशतले घटे । सोही अवधिमा वित्त कम्पनी, उत्पादन तथा प्रशोधन, व्यापार(ट्रेडिङ) र ‘अन्य’ समूहको परिसूचक क्रमश: ७.५१, १७.९३, १७.१४ र २.९८ अंकले बढेको नेप्सेले जनाएको छ । यद्यपि आइतबारको तुलनामा भने विकास बैंक बाहेक सबै समूहको परिसूचक बढे । 

साप्ताहिक कारोबार रकम (१९ करोड १४ लाख ४० हजार रुपैयाँ) का आधारमा नविल बैंक सबैभन्दा अघि छ । कारोबार सेयर संख्या (३ लाख ५४ हजार कित्ता) का आधारमा नेपाल बैंकको संस्थापक अग्रस्थानमा छ । तर, कारोबार संख्या (१ हजार ९ सय ४७ वटा) का आधारमा हिमालयन पावर पार्टनर सबैभन्दा अघि रहेको नेप्सेले जनाएको छ । 

यो साता नेपाल स्टक एक्सचेन्जको कारोबार कक्ष नियमित कारोबारका लागि पाँचै दिन खुला रह्यो । विगतमा जस्तै गत साता पनि ऋणपत्रतर्फ संस्थागत तथा सरकारी ऋणपत्रको कारोबार भएन । उक्त अवधिमा मिर्मिरे माइक्रो क्रेडिट डेभलपमेण्ट बैंक, हाम्रो विकास बैंक र स्वरोजगार लघुवित्त विकास बैंकको हकप्रद सेयर सूचीकृत भएको नेप्सेले जनाएको छ ।