हिमालयको दोस्रो एयरबस आयो

हिमालय एयरलाइन्सद्वारा जारी विज्ञप्ती अनुसार, जहाजलाई स्वागत गर्न विमानस्थलमा आयोजना गरिएको कार्यक्रममा पर्यटन मन्त्री जिवनबहादुर शाही सहभागी थिए । विमानलाई स्वागत गर्न ५१ दशमलव ०१ प्रतिशत सेयर रहेको यती एयरलाइन्स समूहकातर्फबाट प्रशासन समूहका उपाध्यक्ष विजय श्रेष्ठ, अपरेसनतर्फकै उपाध्यक्ष क्याप्टेन जतिन्दर पाल सिहं ढिल्लन लगायत उपस्थित थिए । ०५४ मा नेपालमा दर्ता भएको यस एयरलाइन्समा ४८ दशमलव ९९ प्रतिशत लगानी चिनियाँ कम्पनी तिब्बत एयरलाइन्सको छ ।

यो विमानमा पनि पहिलेको विमान जस्तै १ सय ५८ वटा सिट छन् । जस्मा ८ वटा बिजनेस श्रेणीका रहेका छन् भने बाँकी इकोनमी श्रेणीका रहेका छन् । यसको पहिलो विमान गत वर्ष फागुन २६ गते काठमाडौंमा ल्याइएको थियो ।

हिमालयले विमान थपिएसँगै अब काठमाडौंबाट मलेसियाको क्वाललमपुर र बर्माको याङगुनमा सेवा सञ्चालन गर्ने जनाएको छ । यी दुई रुटका लागि यस एयरलाइन्सले अनुमति पाइसकेको छ । यसले मलेसिया सातामा ५ दिन र म्यान्मारमा दुई दिन उडान गर्ने भएको छ । लेभर रुट भनिने मलेसिया र काठमाडौंमा अब हिमालयसहित ५ वटा एयरलाइन्स पुगेका छन् । यो रुटमा नेपाल एयरलाइन्सले पनि सातामा २८ वटासम्म उडान भर्ने अनुमति पाएको छ ।

यसले २०१७ भित्रै थप दुईटा एयरबस ल्याउँदै यो वर्ष कुल विमान संख्या चार पुर्‍याउने घोषणा गरेको छ । मंगलबारअघि यसले एउटा मात्रै एयरबसबाट कतारको राजधानी दोहो र श्रीलंकको राजधानी कोलम्बोमा उडान भर्दै आएको थियो ।