१७.१२°C काठमाडौं
काठमाडौंमा वायुको गुणस्तर: १५७

अन्तराष्ट्रिय विमानले भारतमा तेल भर्न थाले

आन्तरिकका लागि २५ दिनसम्मलाई पुग्ने इन्धन
सुरज कुँवर

काठमाडौं — विमानहरुलाई हवाई इन्धन उपलब्ध गराउने सिनामंगलस्थित आयल निगमको हवाई इन्धन डिपोले २५ दिनसम्मका लागि पर्याप्त इन्धन रहेको बताएको छ । डिपो प्रमुख प्रदीप यादवका अनुसार, भारतले गरेको नाकाबन्दीका कारण इन्धन आपुर्तीमा समस्या आइलागे पनि आन्तरिक उडान, चार्टर र हेलिकप्टर उडानका लागि करिब एक महिनालाई पुग्ने इन्धन छ ।

विमानहरुलाई हवाई इन्धन उपलब्ध गराउने सिनामंगलस्थित आयल निगमको हवाई इन्धन डिपोले २५ दिनसम्मका लागि पर्याप्त इन्धन रहेको बताएको छ ।

डिपो प्रमुख प्रदीप यादवका अनुसार, भारतले गरेको नाकाबन्दीका कारण इन्धन आपुर्तीमा समस्या आइलागे पनि आन्तरिक उडान, चार्टर र हेलिकप्टर उडानका लागि करिब एक महिनालाई पुग्ने इन्धन छ । ‘आन्तरिक उडानमा जतिसुकै भए पनि २५ दिनसम्मलाई पुग्ने इन्धन जगेडा राखेका छौं । आन्तरिक यात्रुका लागि दसैं लक्षित उडानलाई समस्या हुने छैन,’ डिपो प्रमुखले भने ।

उनले हाल भइरहेको आन्तरिक उडानको संख्या साविकभन्दा वृद्धि भए पनि जगेडा इन्धनले कम्तिमा पनि २५ दिन थेग्ने बताए । त्रिभुवन अन्तराष्ट्रिय विमानस्थलका अनुसार, दसैं आसपासमा दैनिक आउने/जाने गरी ३ सय हाराहारी आन्तरिक उडान हुने गरेका छन् । यसपटक तराईमा भइरहेको बन्दका कारण उडान संख्या अघिल्लो वर्षको दाँजोमा बढ्ने अनुमान व्यवसायीहरुले गरेका छन् । विनाशकारी भुकम्प र नाकाबन्दीको प्रभाव कायमै भएकाले अहिले २ सय हाराहारी आन्तरिक उडान भइरहेका छन् ।

यसैबीच मंगलबार १२ बजेपछि काठमाडौं उडान गर्ने अन्तर्राष्ट्रिय विमानहरुले कलकत्ताबाट इन्धन आपुर्ति थालेका छन् ।

एयरलायन्स अपरेसन कमिटी नेपालका अध्यक्ष भरत श्रेष्ठका अनुसार, मंगलबार मध्यान्नदेखि अन्तराष्ट्रिय उडानहरुले कलकत्ताबाट इन्धन भरेर तथा काठमाडौंबाट फर्किदा कलकत्तबाट इन्धन लिई गन्तव्यतर्फ जान थालेका छन् । ‘हामीले नागरिक उड्यन प्राधिकरणको सिफारिसमा मंगलबार मस्कटका लागि उडान भर्ने ओमन एयर र चीनबाट आएको एउटा एयर एम्बुलेन्सलाई मात्रै इन्धन उपलब्ध गरायौं,’ यादवले भने । उनका अनुसार, ओमनलाई १२ सय लिटर र एयर एम्बुलेन्सलाई ११ सय लिटर इन्धन दिइएको थियो ।

विमानस्थलमा रहेको डिपोबाट सबैभन्दा धेरै इन्धन किन्नेमा युरोपबाट काठमाडौं आउने टर्किस विमान हो । यसले एउटा उडानमा ३० हजारदेखि ४० हजार लिटर इन्धन भर्छ । टर्किसपछि धेरै उडान भर्नेमा कोरियन एयर हो । यसले २५ हजार लिटर हाराहारी इन्धन खरिद गर्छ । सार्क क्षेत्र आपपासका क्षेत्रीय विमानहरुले १० हजारदेखि १५ हजार लिटर हाराहारी तेल भर्ने गरेका थिए ।

तर, मंगलबारदेखि अन्तराष्ट्रिय उडानहरुले भारतको कलकत्ता र दिल्लीबाट तेल भर्न टेक्निकल उडान गर्न थालेका छन् । डिपोले राष्ट्रिय ध्वजावहाकलाई पनि नेपाल बाहिरबाटै तेल भरेर आउन अनुरोध गरेको छ । ‘निगमलाई बाहिरबाटै तेल भनेर ल्याउन अनुरोध गरेका छौ, यसलाई इन्धन आपुर्तीमा रोकिहालेका छैनौं,’ डिपो प्रमुख यादवले भने ।

यता घरेलु विमान कम्पनीहरुले उडाउने जहाजहरुले एउटा उडानमा कम्तिमा ४ सय लिटरदेखि २५ सय लिटरसम्म इन्धन खपत गर्छन् । सबैभन्दा थोरै खपत गर्नेमा हेलिकप्टर पर्छ । यसले एउटा उडानका लागि ४ सय लिटरसम्म इन्धन खरिद गर्छ ।

नाकाबन्दीअघिको अवस्थामा विमानस्थलमा रहेको डिपोले आन्तरिक उडानलाई दैनिक ५० हजार लिटर इन्धन बिक्री गथ्र्यो भने अन्तर्राष्ट्रिय विमानहरुलाई दैनिक २ लाख ५० हजार लिटर इन्धन बिक्री गथ्र्यो । तर मंगलबार अरु दिन जस्तो २ लाख ५० हजार लिटर हाराहारी इन्धन बिक्री गरेन । मंगलबारको तथ्यांक अनुसार, डिपोले विमानस्थलमा १ लाख २० हजार लिटर हाराहारी बिक्री गरेको छ ।

प्रकाशित : आश्विन १२, २०७२ १९:५९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?