क्यानमा आईसीटी सम्मेलन हुने
काठमाडौ — सूचना प्रविधिको महामेला आईसीटी इन्फोटेकका अवसरमा कम्प्युटर एसोसिएसन अफ नेपाल (क्यान) ले नेपालको सूचना तथा सञ्चार प्रविधि क्षेत्रको विकास, विस्तार र प्रवर्द्धनका लागि आवश्यक रणनीति निर्माणका निम्ति सार्थक अन्तरक्रिया गर्ने उद्देश्यले क्यान आईसीटी सम्मेलन गर्ने भएको छ ।
क्यान इन्फोटेक पुस १८ देखि २३ गतेसम्म भृकुटीमण्डपमा हुँदैछ । 'मोबाइल टेक्नोलोजी फर स्मार्ट सोसाइटी' मूल विषयमा सम्पन्न हुन लागेेको सम्मेलनमा मोबाइल टेक्नोलोजीमा नवीनतम प्रविधि तथा भ्यालु एडेड सर्भिसेस, एम-गभर्नेन्स, एम-कमर्स र पेमेन्ट, एम-बैंकिङ, एम-एजुकेसन विषयमा राष्ट्रिय तथा अन्तर्राष्ट्रिय विषय विज्ञहरूले कार्यपत्र प्रस्तुत गर्नेछन् । सामाजिक परिवर्तनमा मोबाइल टेक्नोलोजीको भूमिका विषयमा समूहगत छलफल समेत गरिनेछ ।
दुई दिनसम्म चल्ने उक्त सम्मेलनमा मोबाइल मेडिया विज्ञ डा. मदनमोहन राव प्रमुख वक्ताका रूपमा रहने छन् । सम्मेलनको पहिलो दिन मोबाइल इन्नोभेसनमा राष्ट्रिय र अन्तर्राष्ट्रिय वक्ताहरूबाट बहस चलाइनेछ ।
