पराइ भूमिमा पसिना

आफ्नै परिवेश
युवाका आँखामा विदेशी भूमिको सपना अचम्मसँग नाचेका छन् ।
झमक घिमिरे

काठमाडौँ — गए साता युवाले औपचारिक, अनौपचारिक कार्यक्रम गरेर अन्तर्राष्ट्रिय युवा दिवस मनाए । यस पंक्तिकार युवाका मनोभावना, इच्छा, आकांक्षा, दु:ख, सुख, पीडा, व्यथासँग नजिकैबाट परिचित छे । समृद्ध नेपालको नारा निकै जोडतोडले घन्किरहेको छ ।

नेपालमा काम नपाएर अर्थात रोजगारी नेपाली भूमिमा नपाएर दिनदिनै युवा जनशक्ति बाहिरिरहेका छन् । यसलाई विस्तारै रोक्न सकिएन भने हाम्रा नेताहरूले देखेको समृद्धिको सपना तुहिने मात्र होइन, देश जर्जर हुनेछ । हाम्रा युवा पनि यस विषयमा गम्भीर हुन आवश्यक छ ।

अर्काको भूमिमा गएर जे पनि गर्न तयार हुने हाम्रा जवान पाखुरी किन आफ्नै भूमिमा केही गर्न तयार हुँदैनन् ? सरकार समृद्धिको नारा दिएर चुपचाप बसेर हँुदैन । युवा जनशक्तिलाई रोकेर यही पसिना बगाउने वातावरण बनाउन सकिँंदैन भने समृद्धिको सपना देखेर के काम ? कृषि, उद्योगधन्दा, पर्यटन आदि हरेक क्षेत्रमा युवा जनशक्ति चाहिएको छ । आज कृषि क्षेत्र अस्तव्यस्त छ । कृषियोग्य जमिन भूमाफियाको कब्जामा छ । जमिन अन्धाधुन्द प्लटिङ गरिएको छ । बसाइँ–सराइ भोगिनसक्नु छ । उब्जाउयोग्य जमिनमा धमाधम मानबस्ती बढ्दैछ ।

सरकारले विशेष नीति ल्याएर यसलाई रोक्न सकेन भने यो समस्या विकराल बन्नेछ । यो विषय कहाँनेर युवासँग जोडिएको छ भने उनीहरूले श्रम गर्ने कहाँ ? उनीहरूले पसिना बगाउने ठाउँ कहाँ ? त्यो ठाउँ सुरक्षित गर्न पनि भूमाफियालाई जथाभावी जमिन प्लटिङ गर्नबाट रोक्नु आवश्यक छ ।

पंक्तिकारसँग निकै युवाले प्रश्न गर्ने गरेका छन्– यहाँ बसेर के गर्ने ? विदेश गयो भने दुई–चार पैसा त हुन्छ । आफ्नो जन्मभूमि बसेर के गर्ने भन्ने मानसिकता उनीहरूमा छ । आफ्ना घरपरिवारसँग दु:खसुख बाँडेर विदेशमा बगाउने पसिना यहीं बगाउने नि भन्दा उनीहरू मौन बस्छन् । एकछिन गमेर जवाफ दिन्छन्, ‘सही कुरा गर्नुभयो ।’ विदेशी भूमिमा पैसाको बोट छ, गएर ट्याप्प–ट्याप्प टिपेर ल्याउनलाई ? रगत–पसिना बगाएर पनि ज्यानको सुरक्षा छैन भने किन आफ्नो देशमा रगत–पसिना बगाउन कञ्जुस्याइँ ? आफ्नै भूमिमा गरेर आफ्नै परिवारसँग ढिँडो–रोटी खान किन लाज ?

हाम्रा युवा आफ्नो भूमिमा काम किन गर्न चाहँदैनन् ? उनीहरूका आँखामा विदेशी भूमिको सपना अचम्मसँग नाचेका छन् । कतिका सपना मूर्त हुन्छन् भने कतिका बीचैमा तुहिएर झर्छन् । नेपाली समाजको साँच्चै समृद्धि चाहन्छौं भने नेपाली युवाले एकपटक आफ्नो भूमिको माटो छोएर सोच्नैपर्छ । आफ्नो मातृभूमिको लागि पसिना बगाउन तयार नभएसम्म समृद्धि र विकासको सपना नदेखे हुन्छ । सरकारले विशेष युवामुखी कार्यक्रम ल्याएर युवालाई यहीं स्वरोजगार बनाउन सहयोग गर्नुपर्छ ।

प्रत्येक परिवर्तनका आन्दोलनमा उल्लेखनीय सहभागिता जनाएका युवाले अब राष्ट्र निर्माणमा पनि सहभागी हुनु आवश्यक छ । सरकारले पनि युवाको क्षमता, दक्षता अभिवृद्धि गर्दै रोजगार बनाउनेतर्फ ध्यान दिनुपर्छ ।

प्रकाशित : भाद्र ४, २०७५ ०७:५०
प्रतिक्रिया
पठाउनुहोस्

‘प्रेस कुण्ठित गर्ने प्रावधान संशोधन हुनुपर्छ’

कान्तिपुर संवाददाता

काठमाडौँ — प्रमुख प्रतिपक्षी कांग्रेसले मुलुकी अपराध (संहिता) ऐन २०७४ का कतिपय प्रावधानले विचार अभिव्यक्ति तथा प्रेस स्वतन्त्रतालाई प्रभावित पारेको ठहर गर्दै तत्काल संशोधन गर्नुपर्ने धारणा अघि सारेको छ ।

संहिताको दफा २९३ देखि ३०८ सम्मको गोपनीयताविरुद्धको कसुरसँग जोडिएका कतिपय प्रावधान प्रेस तथा अभिव्यक्ति स्वतन्त्रतालाई कुण्ठित बनाउने खालका रहेकाले त्यसलाई संशोधन गर्नुपर्ने आवाज कांग्रेसले उठाएको हो ।

कांग्रेस केन्द्रीय कार्यालयमा आइतबार आयोजित पत्रकार सम्मेलनमा प्रवक्ता विश्वप्रकाश शर्माले प्रेसको शिरमाथि तरबार राख्ने काममा कांग्रेसको समर्थन हुन नसक्ने बताए । उनले कांग्रेस नेतृत्वको सरकारकै पालामा विधेयक पारित भए पनि त्यस्तो प्रावधान ल्याइनु आफ्नै पार्टीको समेत कमजोरी रहेको स्वीकार गरे । ‘सरकारले प्रेस संकुचित बनाउने प्रावधान हटाउने अग्रसरता लिओस्,’ उनले भने, ‘कांग्रेसले पूर्ण समर्थन गर्नेछ ।’

‘पौने दुई सय वर्ष पुरानो मुलुकी ऐनलाई बदलिएको समाजअनुकूल परिमार्जन गर्न कांग्रेसले गरेको नेतृत्व हाम्रा लागि गौरवपूर्ण छ,’ पत्रकार सम्मेलनमा वितरित विज्ञप्तिमा छ, ‘तर अभ्यासमा आउनुपूर्व नै अनुभूत भइसकेका केही कमजोर प्रावधान आवश्यक संशोधन गरेर मात्रै अघि बढ्नुपर्छ ।’ कांग्रेसले चिकित्सा पेसालाई मर्यादित बनाउन संहितामा संशोधन आवश्यक रहेकोसमेत उल्लेख गरेको छ ।

लापरबाहीबाट कुनै बिरामीको मृत्यु भएमा उपचार गर्ने चिकित्सकलाई जन्मकैदसम्मको सजाय हुने प्रावधानको दुरुपयोग हुन सक्ने उल्लेख गर्दै मुलुकभरका चिकित्सकले विरोध जनाइरहेका बेला कांग्रेसले संहिता संशोधनको माग गरेको हो । ‘चिकित्सकको पेसागत मर्यादा एवं प्रहरी प्रशासनलाई अपराध अनुसन्धानमा पर्न सक्ने असर र पेसा व्यवसायको स्वतन्त्रतालाई प्रभावित गर्ने विषयमा गम्भीर ध्यानाकर्षण भएको छ,’ कांग्रेसले भनेको छ, ‘सम्बन्धित सरोकारवाला पक्षसँगको संवादमार्फत उक्त संहितामा संशोधन र सुधार गर्दै जानुपर्छ ।’

कांग्रेसले सरकार राष्ट्रियता, लोकतन्त्र, संघीयता, सुशासन, मूल्यवृद्धि, समृद्धि यात्रा र न्यायालयको मुद्दामा चुकेको निष्कर्ष निकालेको छ । यस्तै, संघीयता असफल बनाउने प्रयत्न सरकारबाटै भएको आरोपसमेत कांग्रेसले लगाएको छ । ‘संघीयता कमजोर बनाउने, विरुद्धमा जनमत तयार पार्ने र संघीयता नै असफल बनाउने योजनाका साथ सरकार अघि बढेको छ,’ शर्माले भने ।

कांग्रेसले स्थानीय तहले लिने कर व्यवस्थित बनाउन पनि सरकारसँग माग गरेको छ । स्थानीय तहले जथाभावी कर संकलन गर्न थालेको विषयमा चौतर्फी विरोध हुन थालेपछि आफ्नो पार्टीबाट विजयी स्थानीय तहका प्रमुख, उपप्रमुखलाई भदौ ११ गते प्रशिक्षण दिने भएको छ ।

प्रकाशित : भाद्र ४, २०७५ ०७:३८
पूरा पढ्नुहोस्
प्रतिक्रिया
पठाउनुहोस्
×