कहिलेकाहीँ मालिकको बेचैनी धेरै नै बढ्थ्यो । त्यस्तो अवस्थामा मालिकले प्रोफेसरको चिठ्ठी दोहोर्याइ तेहेर्याइ पढ्नुहुन्थ्यो । त्यो चिठ्ठी, जो हामी अमलापुर आउनुभन्दा केही दिनअघि आएको थियो । अथवा भनौँ त्यो चिठ्ठी नै थियो, जसले मालिकलाई महत्त्वाकांक्षी बनाएर पहाडतिर डोर्याएको थियो । पटनाको धन्दा बन्द गर्नुपरेको अवस्थामा मालिकले पठाउनुभएको नैराश्य भावको चिठ्ठीको आशावादी जवाफ थियो त्यो ।