काठमाडौँ — टोफल आईबीटी परीक्षालाई निरन्तर रुपमा परिस्कृत गर्दै सहज र सुविधाजनक बनाउनका लागि ईटीएसले आगामी केही महिनाभित्र नै प्रणालीमा परिवर्तन गर्ने भएको छ । जुलाइबाट लागू हुने गरी टोफल आईबीटी परीक्षाको समयलाई छोट्याइएको छ । अब परीक्षा दुई घण्टाभन्दा कम समयमा नै सकिने ईटीएसले जनाएको छ ।

जबकि हाल परीक्षा दिन तीन घण्टा लाग्ने गर्दथ्यो । परीक्षा अवधिभर सुव्यवस्थित निर्देशन र वहाव कायम रहने, पठन खण्ड छोटो हुने र अंकभार नभएका सबै प्रश्नहरू पनि हटाइने भएको छ ।

जुलाईबाट परीक्षाका लागि रजिस्ट्रेसन प्रक्रिया पनि सरल हुनेछ । ‘परीक्षामा सामेल हुन चाहनेहरुले आफैं अकाउन्ट बनाएर टोफल आईबीटीका लागि इच्छाएको मितिमा पहिलाभन्दा सरल रुपमा रजिस्टर गर्न सक्नेछन्’ ईटीएसद्वारा जारी विज्ञप्तिमा उल्लेख छ । २६ जुलाइबाट परिक्षार्थीले प्राप्त गर्ने अंक पनि पारदर्शी हुने उसको दाबी छ । ईटीएसका सीईओ अमित सेवकले भने ‘यी परिवर्तनहरू हाम्रा ग्राहक र सरोकारवालाको आकांक्षा बमोजिम विकसित गरिएको हो, किनकि उनीहरूलाई सेवा प्रदान गर्नु नै हाम्रो पहिलो प्राथमिकता हो ।’

टोफल आईबीटी परीक्षाका लागि पहिले नै दर्ता गराइसकेका परीक्षार्थीले पनि नयाँ परिवर्तनलाई अनुभव गर्न चाहेमा निशुल्क आफ्नो परीक्षा मिति परिवर्तन गर्न सक्ने वा लागू हुनु अगावै पनि परीक्षामा सामेल हुन सक्ने उनको भनाइ छ । नयाँ विकसित टोफल आईबीटी निशुल्क अभ्यास सामाग्रीको अद्यावधिक संस्करण टोफलको वेबसाइटमा उपलब्ध भइसकेका छन् । थप नि:शुल्क तथा स:शुल्क परीक्षा तयारी सामाग्री केही सातामा अद्यावधिक हुने ईटीएसले जनाएको छ ।